Ғолибони Мусобиқаи кушод оид ба пойгаи аспдавонӣ барои дарёфти Ҷоми «Пойтахт-2021» муайян шуданд

ДУШАНБЕ, 26.03.2021 /АМИТ «Ховар»/. Тавре қаблан иттилоъ додем, бахшида ба ҷашни байналмилалии Наврӯз 24 март дар Муассисаи давлатии «Наврӯзгоҳи шаҳри Душанбе   Мусобиқаи кушод оид ба пойгаи аспдавонӣ барои дарёфти Ҷоми «Пойтахт-2021»  дар сатҳи баланд баргузор гардид. Дар мусобиқаи мазкур варзишгарони аз 16-сола боло бо аспҳои 2, 3,  4  ва аз 4-сола болои хоҷагиҳои асппарварии ҷамъиятиву хусусии вилоятҳо, шаҳру ноҳияҳои тобеи ҷумҳурӣ ва шаҳри Душанбе иштирок ва байни ҳам  рақобат  намуданд.

Тавре  мудири бахши варзиши Раёсати кор бо ҷавонон ва  варзиши шаҳри Душанбе Раҷабалӣ Турсунзода   ба шореҳи варзиши АМИТ «Ховар» Меҳрони Қурбон хабар дод, мусобиқаи варзишии аспдавонӣ, ки  хоси ниёгони тоҷикони куҳанбунёд мебошад, дар 9 давр ба масофаи 1000, 1400 ва 1800 метр сурат гирифт.

Дар мусобиқаи мазкур  аспбозон аз минтақаҳои гуногуни Тоҷикистон ширкат варзиданд. Дар сабқат ба масофаи 1000 метр миёни аспҳои омехта асп бо лақаби «ИПО», ки ба он Ориф Зайниддинов савор буд, нахустин шуда,  хатти марраро тай намуд. Дар ҳамин масофа мақоми дуюмро Идибек Сатторов бо аспи «Горизонт» ва зинаи сеюмро  асп бо лақаби «Арпаш» бо ҷилавдории Анушервон Сатторов соҳиб шуданд. Дар масофаи 1000 метр миёни аспҳои зоти тоҷикии 2 сола мақоми аввалро асп бо лақаби «Секретариат» бо натиҷаи 1 дақиқаву 60 сония ба даст овард, ки лаҷоми ӯ дар пойгаҳ дар дасти Фирдавс Саломов буд. Аспҳо бо лақабҳои «Бодом»  ва «Габой» дар зинаҳои дуюм ва сеюм қарор гирифтанд.

Дар масофаи 1400 метр миёни аспҳои 2 ва 3-солаи зоти англисӣ мақоми аввал насиби Азамат Ҷумаев ва асп бо лақаби «Аромат» гардид. Аспҳо бо лақабҳои «Атаман» ва «Рубин» масофаи пешбинишударо дуюму сеюм шуда, тай намуданд. Дар масофаи 1000 метр миёни аспҳои ахалтекинӣ асп бо лақаби «Сарбаланд», ки онро чобуксавор Фирдавс Саломов роҳбарӣ мекард, мақоми аввал ба даст овард. Асп бо тахаллуси «Самарқанд» зери идораи Анушервон Сатторов дуюмин шуда, ба марра расид. Дар ин пойга «Мустанг»  ном асп мақоми сеюмро ишғол кард.

Марҳилаи панҷум аз пойгаҳои аспҳои зоти 3-солаи тоҷикӣ иборат буд ва чобуксавор Меҳроб Бердиев бо аспи соли таввалудаш 2018 бо лақаби «Аввала» аввалин шуда, ба марра расид ва мақоми якумро ишғол намуд.

Асп бо лақаби «Абобил», ки онро Хуршед Сатторов идора мекард, миёни аспҳои зоти тоҷикии 3-сола масофаи 1400 метрро дуюмин шуда, тай намуд. Шоҳрух Ятимов бо аспи туруқи худ, ки бо лақаби «Гавот»  дар пойга ширкат варзид, мақоми сеюмро ишғол намуд.

Дар пойгаи шашум аспҳои зоти омехта дар масофаи 1400 метр ширкат варзиданд. Асп бо лақаби «Красавчик», соли таваллудаш 2016 зери идораи Анушервон Саторов аввалин шуда, хати марраро убур намуд. Асп аз ноҳияи Ховалинг бо лақаби «Гуланг» дуюмин шуда, ба марра расид. Аз ноҳияи Ховалинг ду асп дар ин пойга ҷоизадор шуда,  асп бо лақаби «Белведер»  сеюмин шуда, хати марраро гузашт.

Дар пойгаи 7-ум аспҳои зоти тоҷикии 4-сола баромад намуданд. Аспи Сироҷ Ҳакимов бо лақаби «Талисман»  барандаи зинаи аввал гардид. Асп бо номи «Бомдод»  дар ин мубориза дуюмин шуда, ба марра расид. Аспи ноҳияи Файзобод бо номи «ПРИЗ» мақоми сеюмро аз худ  кард.

Дар пойгаи 8-ум аспҳои зоти омехта суръати дави худро нишон доданд. Асп бо лақаби «Агрегат», ки онро Роҳатшоҳ Бегиҷонзода аз шаҳри Роғун тарбия кардааст, ҳамаи рақибонашро дар пушт гузошта, мақоми аввалро ишғол кард. Инчунин ба хотири ғалабаи аспаш Роҳатшоҳ Бегиҷонзода аз бағалаш най бароварда, садои онро дар ҳузури мардуми баланд кард.

Марҳилаи ниҳоӣ, ки дар он аспҳои аз 4-сола боло дар масофаи 1800 метр байни ҳам суръатсанҷӣ намуданд, мақоми аввалро асп бо лақаби «Фулюарид», соли таввалудаш 2015   бо ҷилавдории чобуксавор Манучеҳр Шарофиддинов ишғол намуд. Дар ин сабқат зинаи дуюмро асп бо лақаби «Паймон» зери идораи Фирдавс Саломов аз худ намуда, асп бо лақаби «Ректор»-и чобуксавор Шоҳрух Ятимов сеюмин шуда, хати марраро убур намуд.

Ёдовар мешавем, ки 24 март дар мусобиқаи пойгаи равон, ки бахшида ба ҷашни байналмилии Наврӯз гузаронида шуд, аспҳои зиёд аз тамоми манотиқи кишвар ширкат варзиданд. Соҳибони аспҳое, ки дар ин 9 пойгаҳ мақомҳои ифтихорӣ ба даст оварданд, бо ҷоизаҳои пулӣ қадрдонӣ гардиданд.

Мусобиқа ҳамасола бо дастгирии Мақомоти иҷроияи ҳокимияти давлатии шаҳри Душанбе баргузор шуда, дӯстдорони ин ҷонвари зеборо дар пойтахти азизамон бо ҳам ҷамъ меорад.