Моҳи май дар Тошканд ҷаласаи 8-уми Комиссияи байниҳукуматии Тоҷикистон ва Ӯзбекистон оид ба масъалаҳои тиҷоратию иқтисодӣ баргузор мегардад

ДУШАНБЕ, 26.04.2021 /АМИТ «Ховар»/. Моҳи май дар шаҳри Тошканд ҷаласаи 8-уми Комиссияи байниҳукуматии Тоҷикистон ва Ӯзбекистон оид ба масъалаҳои тиҷоратию иқтисодӣ баргузор мегардад. Масъалаи мазкур дар мулоқоти Вазири рушди иқтисод ва савдои Ҷумҳурии Тоҷикистон Завқӣ Завқизода ва муовини якуми Вазири сармоягузорӣ ва савдои хориҷии Ҷумҳурии Ӯзбекистон Лазиз Қудратов дар Хуҷанд баррасӣ гардид.

Вазорати рушди иқтисод ва  савдои ҷумҳурӣ иттилоъ медиҳад, ки дар мулоқот мусоҳибон аз ҷаласаи 7-уми Комиссияи байниҳукуматии Тоҷикистон ва Ӯзбекистон оид ба масъалаҳои тиҷоратию иқтисодӣ натиҷагирӣ намуданд.

Мусоҳибон ҳамзамон роҳҳои тақвияти ҳамкории дуҷонибаро дар  соҳаҳои тиҷорату иқтисод, сармоягузорӣ, саноат, энергетика, нақлиёт ва кишоварзӣ баррасӣ намуда, вобаста ба ташкили корхонаҳои муштараки саноатӣ пешниҳодҳои мушаххасро ҷонибдорӣ карданд.