Бо дастури Пешвои миллат имрӯз Сарвазири мамлакат аз мавзеъҳои бар асари сел зарардидаи Кӯлоб боздид намуд

Май 12, 2021 11:37

ДУШАНБЕ, 12.05.2021 /АМИТ «Ховар»/. Тавре АМИТ «Ховар» қаблан иттилоъ дод, дар натиҷаи боришоти боронҳои пай дар пайи  11 майи соли 2021 дар як қатор ноҳияҳои вилояти Хатлон ва ноҳияҳои тобеи марказ сел омад, ки дар натиҷа ба ҳалокати одамон, вайроншавии манзилҳои истиқоматӣ ва шусташавии роҳҳои автомобилгард  боис гардид. Дар пайи ин ҳодиса, бо дастури Президенти мамлакат, Пешвои миллат муҳтарам Эмомалӣ Раҳмон Комиссияи ҳукуматӣ таҳти роҳбарии Сарвазири мамлакат Қоҳир Расулзода субҳи барвақти имрӯз ба шаҳри Кӯлоб сафар кард.

Дар шаҳри Кӯлоб Қоҳир Расулзода ҳамроҳ бо Раиси вилояти Хатлон Қурбон Ҳакимзода ва ҳайати ҳамроҳонаш аз мавзеъҳои бар асари сел зарардида боздид намуда, бо сокинон суҳбат кард.

Иттилоъ дода шуд, ки бар асари сел дар шаҳри Кӯлоб даҳҳо хонаҳои истиқоматии сокинон, садҳо метр роҳҳои автомобилгарди маҳаллӣ, роҳи автомобилгарди маркази шаҳр дар назди муассисаи таълимии рақами 53, иншооти маданию маишӣ ва хизматрасонӣ, 4 пули мошингузар ва чорвои шаҳрвандон талаф ёфтаанд.

Офати табиӣ бештар ба сокинони маҳаллаҳои Хати роҳу Корвонгузар,  Ҷумъа Алӣ, Нонвойи поён, Куҳнашаҳр ва сокинони кӯчаи Даминзода хисороти калон расонидааст. Инчунин, зеристгоҳҳо ва чанд адад трансформатор, хатҳои интиқоли барқ ва сутунпояҳо валангор гардидаанд. Дар қисмати ҷанубии шаҳр стансияи насоси ба номи Назаров, ки беш аз 5 ҳазор аҳолиро бо оби ошомиданӣ таъмин менамояд, зери обу лой монда, насосу  муҳаррикҳояш корношоям гардиданд. Иншооти обу ташноби шаҳр низ бар асари сел зарар дидааст.

Сарвазири мамлакат Қоҳир Расулзода ба мақомоти иҷроияи ҳокимияти давлатии шаҳри Кӯлоб, вазорату идораҳо ва шахсони масъул барои расонидани кумаки аввалия ба зарардидагон, ташкили хаймаҳои муваққатӣ, таъминот бо сару либос ва маводи ғизоӣ дастур дод.

Инчунин, супориш дода шуд, ки Комиссияи ҳукуматӣ иборат аз мутахассисон ташкил карда шуда, дар муҳлати кутоҳтарин зарари офати табиӣ муайян карда шавад.

Нимаи дуюми рӯз Сарвазири мамлакат Қоҳир Расулзода ва Раиси вилояти Хатлон Қурбон Ҳакимзода барои шиносоӣ бо вазъи мавзеъҳои аз офати табиӣ зарардидаи ноҳияи Шамсиддин Шоҳин сафар менамоянд.

Ёдовар мешавем, ки шоми рӯзи 11 май бо дастури Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон Сарвазири мамлакат Қоҳир Расулзода, Раиси вилояти Хатлон Қурбон Ҳакимзода, Вазири корҳои дохилӣ Рамазон Раҳимзода ва Раиси Кумитаи ҳолатҳои фавқулода ва мудофиаи гражданӣ Рустам Назарзода ба маҳали аз офатҳои табиӣ зарардидаи шаҳри Кӯлоб, ноҳияҳои Шамсиддини Шоҳин ва Муъминободи вилояти Хатлон сафарбар гардиданд.

Ҳамчунин, дирӯз бо супориши Сарвари давлат муҳтарам Эмомалӣ Раҳмон гурӯҳи кории Ҳукумати Ҷумҳурии Тоҷикистон бо роҳбарии Сарвазири мамлакат Қоҳир Расулзода аз мавзеъҳои бар асари офатҳои табиӣ зарардидаи ноҳияҳои Абдураҳмони Ҷомӣ ва Ёвони вилояти Хатлон боздид ба амал овард.

Бо дастури Сарвари давлат муҳтарам Эмомалӣ Раҳмон гурӯҳи кории Ҳукумати Ҷумҳурии Тоҷикистон хисороти ба хоҷагии халқи ин шаҳру ноҳияҳо расидаро муайян сохта, барои бартараф намудани оқибатҳои офатҳои табиӣ тадбирҳои бетаъхир амалӣ менамояд.

Бояд тазаккур дод, ки мувофиқи маълумотҳои пешакӣ, бар асари ин офати табиии 11 май бавуҷудомада 7 нафар, аз ҷумла 3 нафар дар шаҳри Кӯлоб, 3 нафар дар ноҳияи Шамсиддин Шоҳин ва 1 нафар дар шаҳри Ҳисор ба ҳалокат расидаанд.

Май 12, 2021 11:37

Хабарҳои дигари ин бахш

Президенти Тоҷикистон: «Ҷашни Наврӯз ва истиқлолу озодӣ – ин ду мафҳуми барои ҳар яки мо азизу муқаддас аст»
«КАЪБА ЧӢ МЕРАВӢ, ДИЛЕРО ДАРЁБ…». Андешаҳо дар ҳошияи мулоқоти Президенти Тоҷикистон бо фаъолону намояндагони ҷомеа ва ходимони дин
Пешвои миллат: «Боиси ифтихор аст, ки Наврӯз – калимаи асили тоҷикӣ, яъне «рӯзи нав» ҳоло барои миллионҳо аҳолии сайёра ҳамчун рӯзи ҷашни фархунда вирди забон аст»
Эмомалӣ Раҳмон: «Наврӯз аз ҷумлаи бузургтарин ва маҳбубтарин ҷашнҳои тоҷикон мебошад»
СИЁСИШАВИИ ДИН — ХАТАР БА ФАРҲАНГИ МИЛЛӢ ВА СУБОТИ ҶОМЕА. Андешаҳои профессор Нозим Маҳмадизода дар ин мавзуъ
Президенти Тоҷикистон: «Бо назардошти шароити замона анъанаи неки гузаштагон – сарфаю сариштакориро бояд риоя намоем»
Сулаймон Талбакзода: «Дарси хештаншиносӣ ва хизмат ба халқу Ватанро аз Пешвои миллат бояд омӯзем»
Президенти Тоҷикистон: «Мушкилоти таъмини аҳолии сайёра бо озуқаворӣ моро водор менамояд, ки ҳар қитъа заминро оқилонаву самаранок истифода барем»
Пешвои миллат Эмомалӣ Раҳмон: «Ойинҳои наврӯзӣ аҳли башарро ба таҳаммулгароӣ, бунёдкориву созандагӣ ҳидоят менамоянд»
Пешвои миллат: «Дар шароити кунунӣ зарур аст, ки ба кишти такрорӣ, гирифтани се – чор ҳосил аз заминҳои обӣ эътибори аввалиндараҷа дода шавад»
Наврӯз дар баробари забони тоҷикӣ бунёди худшиносии тоҷиконро низ ташаккул додааст
Пешвои миллат Эмомалӣ Раҳмон: «Мақому ҷойгоҳи Наврӯз он қадар баланд буд, ки ҳеҷ монеа ва қуввае онро натавонист аз байн барад»