Ғолибони Чемпионати Осиё оид ба бокс бори аввал дар таърихи ин чорабинӣ аз AIBA мукофотпулӣ мегиранд

Май 23, 2021 09:15

ДУШАНБЕ, 23.05.2021 /АМИТ «Ховар»/. Ғолибони Чемпионати Осиё оид ба бокс бори аввал дар таърихи ин чорабинӣ аз AIBA мукофотпулӣ мегиранд. Дар ин бора АМИТ «Ховар» бо истинод ба Кумитаи миллии олмпии Тоҷикистон хабар медиҳад.

Фонди ҷоизавии Чемпионати Осиё-2021 400 000 доллари ИМА-ро ташкил медиҳад ва он ба ғолибон, барандагони медалҳои нуқра ва биринҷӣ дар ҳар як вазн тақдим карда мешавад.

Барои варзишгароне, ки дар вазни худ (ҳам мардон, ҳам бонувон) ҷойи аввалро мегиранд, мукофот 10 000 доллари ИМА мебошад. Барои ҷои дуюм ҷоизаи пулӣ 5000 доллари ИМА ва барои ду ҷои сеюм, ҳар кадом 2500 доллари ИМА-ро ташкил медиҳад.

«Мо стратегияи дар аввал ба нақша гирифташударо иҷро мекунем. Боксчиён бояд барои меҳнати пурмашаққаташон мукофот гиранд. Маблағ на танҳо варзишгаронро ҳавасманд мекунад, балки пойдории молиявии онҳо ва оилаҳояшонро низ таъмин менамояд. Мо танҳо ба хотири муштзанҳоямон кор мекунем, онҳо нафарони муҳимтарини созмони мо ҳастанд. Ба ҳамаи ширкаткунандагони Чемпионати Осиё муваффақият ва тансиҳатӣ мехоҳам», — гуфтааст президенти AIBA Умар Кремлев.

Ёдрас мешавем, ки Чемпионати Осиё-2021 оид ба бокс дар шаҳри Дубайи Амороти Муттаҳидаи Араб то 1 июн идома мекунад. Дар ин чорабинии қоравӣ дастаи мунтахаби Тоҷикистон дар ҳайати 11 нафар ширкат доранд.

Бонувон

-51кг – Сумайя Қосимова

-54кг – Руҳафзо Ҳақназарова

-57кг – Миҷгона Самадова

-60кг – Шоира Зулқайнарова

Мардон

-56кг – Бахтовар Сагизов

-60кг – Абдураҳмон Ёқубов

-64кг – Баҳодур Усмонов (чемпиони феълии Осиё)

-75кг – Абдумалик Болтаев

-81кг – Шаббос Негматуллоев

-91кг – Ҷасур Қурбонов

+91кг – Сиёвуш Зуҳуров

Онҳоро дар ин сафар мураббиён Мирзо Шамсиев, Парвиз Ахмедов ва Хуршед Ҷӯраев ҳамроҳӣ мекунанд.

Дар намуди бокс варзишгарони мо ду роҳхати Бозиҳои олимпиро ба даст овардаанд. Баҳодур Усмонов дар вазни 64кг ва Шаббос Негматуллоев дар вазни 81кг, ки ҳар ду аз дастгирии молиявии Кумитаи миллии олимпии То ҷикистон бархурдоранд, кишвари моро дар Бозиҳои олимпии Токио, ки аз 23 июл то 8 августи 2021 баргузор мешавад, намояндагӣ мекунанд. Чемпионати Осиё як имкони хуби омодагии варзишгарон ба Олимпиада мебошад.

АКС аз КМО Тоҷикистон

Май 23, 2021 09:15

Хабарҳои дигари ин бахш

Таҳкими ҳамкорӣ байни Тоҷикистон ва вилояти Форси Эрон дар бахши ҷавонон ва варзиш баррасӣ гардид
Дар Ҳисор мусобиқаи «CAFA Nations Сup 2025» дар гурӯҳи «В» оғоз мешавад
Ҳайати Кумитаи кор бо ҷавонон ва варзиши Тоҷикистон бо Академияи Кумитаи миллии олимпии Эрон шинос шуд
Барномаи иҷроии ҳамкорӣ байни Тоҷикистон ва Эрон дар соҳаи варзиш ва ҷавонон ба имзо расид
Бо иштироки ҷавонони Тоҷикистон ва Эрон ҳамоиш доир гардид
Дар Теҳрон густариши ҳамкории Тоҷикистон ва Эрон дар самти ҷавонон ва варзиш баррасӣ гардид
Ғолиби «Ҷоми Раиси ВМКБ» аз намуди волейбол муайян карда шуд
«Tojiktelecom» сарпарасти расмии мусобиқаи бонуфузи байналмилалии Осиёи Марказӣ ва Ҷанубӣ — CAFA Nations Cup 2025 гардид
ФУТБОЛ. Бозии ниҳоии Ҷоми Тоҷикистон-2025 байни «Регар-ТадАЗ» ва «Эсхата» дар Хуҷанд доир мегардад
Дар Тоҷикистон лоиҳаи «Football For Schools»-и ФИФА амалӣ карда мешавад
ҶОМИ ТОҶИКИСТОН. Дастаҳои футболи «Регар-ТадАЗ» ва «Эсхата» ба финали ин мусобиқа роҳ ёфтанд
Дар вохӯрии дастаҳои Тоҷикистон ва Ҳиндустон автомобили BYD ба бозӣ гузошта мешавад