«ВАҲДАТ — БАҚОИ МИЛЛАТ АСТ». Таҳти ин унвон дар Китобхонаи миллӣ ҳамоиши сиёсӣ-фарҳангӣ доир шуд

Июнь 23, 2021 16:05

ДУШАНБЕ, 23.06.2021 /АМИТ «Ховар»/. Имрӯз дар шаҳри Душанбе Федератсияи иттифоқҳои касабаи Ҷумҳурии Тоҷикистон дар ҳамкорӣ бо Муассисаи давлатии «Китобхонаи миллӣ Тоҷикистон» бахшида ба 24-умин солгарди Рӯзи  Ваҳдати миллӣ ҳамоиш сиёсӣ-фарҳангӣ таҳти унвони «Ваҳдат — бақои миллат аст» баргузор гардид.

Тавре хабарнигори АМИТ «Ховар» иттилоъ медиҳад, дар ҳамоиш роҳбарият ва фаъолони ташкилотҳои иттифоқҳои касаба, кормандони Китобхонаи миллӣ, ҳунармандони шинохта, донишҷӯён ва аҳли зиё иштирок карданд.

Ҳамоишро муовини аввали директори Китобхонаи миллии Тоҷикистон Салима Раҷабзода ифтитоҳ намуда,  доир  ба  ваҳдату ягонагӣ ва саҳми он дар  таърихи навини Тоҷикистон  ибрози андеша намуд.

Сипас дар назди ҳозирин  Раиси Федератсияи иттифоқҳои касабаи мустақили Тоҷикистон Маликшо Неъматзода дар мавзӯи  “Ваҳдати ӯ халқи моро шод кард” маърӯза  намуд. Номбурда, аз ҷумла зикр кард, ки   “Ваҳдати миллӣ ба саҳифаи таърихи халқи тоҷик маҳз бо ҷаҳду талошҳои пайвастаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҳамчун замони нави ташаккулёбии давлатдории Тоҷикистон ворид гашт. Ин иди фархунда тимсоли сулҳ, ҳамдигарфаҳмӣ ва осоиш дар ҷомеа, боиси эҳёи иқтисоди кишвар, масъулияти умумии мо барои ҳаёти ҳозираву ояндаи дурахшони Тоҷикистон аст”.

Мавсуф ҳамзамон шеъри  Шоири халқии Тоҷикистон Муҳаммад Ғоибро бо номи “Бахтовар” ба ҳозирин қироат кард:

Гар намерафтӣ ба майдон ҷон ба каф мисли Куруш,

Гар намекардӣ ба ҷои шаҳди ҳастӣ заҳр нӯш,

Гар намебастӣ дами тӯфони баҳри пурхурӯш,

Гар намекардӣ алови  ҷанги марговар хамӯш

Мо намедидем нури чеҳраи  иқболро,

Партави озодиву хуршеди истиқлолро.

“Дар ҷаҳони имрӯза давлатҳои алоҳида бо хатогии хурди сиёсӣ сулҳу ваҳдат ва таъмини амниятро дар дохили кишварашон аз даст дода, ба майдони ҷанг ва бархӯрди манфиатҳои гурӯҳҳои манфиатҷӯ табдил ёфта истодаанд. Ин омилҳои сиёсӣ ба мо ҳушдор медиҳанд, ки роҳу усулҳои ҳифз ва таҳкими абадияти сулҳу ваҳдати миллиро дар кишварамон омӯзем ва сулҳу ваҳдатро дар ватанамон ҷовидонӣ нигоҳ дорем. Мо ба ҳамаи мақсаду ҳадафҳоямон танҳо дар ҳамон сурате мерасем, ки сулҳу ваҳдат дар кишварамон пойдору ҷовидон бошад.  Амалӣ намудани ин ҳама омолҳо дар ҷодаи давлатдорию давлатсозӣ ба дӯши мо  вогузор мебошад, ки ин рисолати бениҳоят пурифтихор ва пуршараф аст. Аммо набояд фаромӯш кард, ки ҳамаи ҳадафҳои мо танҳо дар фазои сулҳу осоиш ва танини ваҳдати миллӣ амалӣ мегарданд.  Мо бояд миллати сарбаланди худро ҳатман ба орзуҳояш расонем,- афзуд Маликшо Неъматзода.

Мавсуф  илова кард, ки “мо ҳанӯз дар сароғози бунёди давлатдории миллии худ қарор дорему ҳадафи асосии мо бунёди давлати мутамаддини миллӣ мебошад ва мутмаин бар онам, ки маҳз бо раҳнамоии оқилонаю дурандешонаи Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мо ин рисолати хешро бо сарбаландӣ  ба ҷо меорем”.

Инчунин дар ҳамоиш сармуҳаррири рӯзномаи “Ваҳдат” Умруддин Юсупов, шоири шинохта Хайрандеш  ва дигарон дар васфи ваҳдат,  сулҳу субот  ва дастоварҳои ба шарофати он ба дастомадаи миллат изҳори назар  намуданд.

Ҳамоиш бо барномаи  фарҳангӣ, ки дар он санъаткорони маъруфи тоҷик Чилахон Хол, Фахриддини Малик ва Шуҳрат Сайнак дар васфи ваҳдати миллӣ ва пойдории он сурудҳо сароиданд, хотима ёфт.

Мавриди зикр аст, ки ҳамасола 27 июн дар мамлакат Рӯзи ваҳдати миллӣ таҷлил карда мешавад.

София ШОИК,
АМИТ «Ховар»

АКС: АМИТ «Ховар»

Июнь 23, 2021 16:05

Хабарҳои дигари ин бахш

Дар ноҳияи Файзобод бо фаъолону собиқадорон ва ходимони дини деҳоти Чашмасор мулоқот доир гардид
Дар ду қисми низомии тобеи Вазорати корҳои дохилии Тоҷикистон дастархони идона ороста гардид
Дар ноҳияи Деваштич маъракаи кишти картошка оғоз шуд
Иҷлосияи нуздаҳуми Маҷлиси вакилони халқи вилояти Хатлон, даъвати шашум доир гардид
Дар пайравӣ ба амалҳои хайрхоҳонаи Президенти Тоҷикистон дар якчанд қисми ҳарбӣ дастурхони идона ороста шуд
Дар Неругоҳи барқи обии «Норак» ҷашни байналмилалии Наврӯз бо шаҳомати хосса таҷлил гардид
Имрӯз дар Тоҷикистон ҳаво тағйирёбанда шуда, борон ва раъду барқ пешгӯӣ мешавад
Наврӯз ҳамчун ҷашни эҳёи табиат истифодаи оқилонаи заминро талқин менамояд
Кишоварзони ноҳияи Зафаробод дар 120 гектар картошкаи барвақтӣ кишт менамоянд
Дар Агентии содироти Тоҷикистон бо намояндагони Агентии назорати давлатии молиявӣ ва мубориза бо коррупсия вохӯрӣ доир шуд
Ба кишоварзони ноҳияи Деваштич барои парвариши картошка ва тухмиҳои хушсифат тавсияҳо дода шуд
Дар ноҳияи Спитамени вилояти Суғд кишти чигит оғоз ёфт