Дар Душанбе ҷаласаи Шӯрои вазирони корҳои хориҷии давлатҳои узви СҲШ баргузор шуд

Июль 14, 2021 14:50

ДУШАНБЕ, 14.07.2021 /АМИТ «Ховар»/. 13-14 июл дар Душанбе таҳти раёсати Вазири корҳои хориҷии Ҷумҳурии Тоҷикистон Сироҷиддин Муҳриддин ҷаласаи Шӯрои вазирони корҳои хориҷии давлатҳои узви Созмони Ҳамкории Шанхай (ШВКХ СҲШ) баргузор гардид. Дар ин бора АМИТ «Ховар» бо истинод ба Вазорати корҳои хориҷии Тоҷикистон хабар медиҳад.

Пеш аз ҷаласа вазирони корҳои хориҷиро Президенти Ҷумҳурии Тоҷикистон, Раиси Шӯрои Сарони давлатҳои аъзои СҲШ муҳтарам Эмомалӣ Раҳмон ба ҳузур пазируфтанд.

Дар ҷараёни ҷаласа роҳбарони идораҳои сиёсати хориҷӣ оид ба натиҷаҳои фаъолияти СҲШ дар тӯли 20 сол табодули афкор намуда, вазифаҳои вобаста ба рушди минбаъдаи ҳамкориро дар чаҳорчӯбаи Созмон муҳокима карданд. Инчунин оид ба масъалаҳои мубрами байналмилалӣ ва минтақавӣ мубодилаи афкор сурат гирифт.

Дар ҷаласа таъкид шуд, ки СҲШ бо такя ба «рӯҳи Шанхай» дар тӯли ду даҳсола ҷойгоҳи худро ҳамчун созмони бонуфузи байнидавлатии намуди нав ва иштирокчии бонуфузи низоми муносибатҳои байналмилалӣ мустаҳкам намуд.


Вазирон ба мувофиқа расиданд, ки корҳои муштарак дар самти пешбурди рӯзафзуни ҳамаи масъалаҳои рӯзномаи гуногунҷабҳаи СҲШ ба таҳкими рушди Созмон ва баланд бардоштани нуфузи байналмилалии он мусоидат мекунанд.

Дар ҷараёни ҷаласа зикр карда шуд, ки мутобиқи Нақшаи чорабиниҳои асосии СҲШ то имрӯз зиёда аз 50 чорабинии  механизмҳои гуногуни ҳамкории СҲШ, аз ҷумла 7 чорабинӣ дар сатҳи вазоратҳо баргузор шуданд.

Дар ин замина, вазирон омодагии худро барои то моҳи сентябр дар сатҳи баланд ва пурмазмун баргузор намудани боз тақрибан 30 чорабинии дигари мақомоти СҲШ, ба шумули 12 чорабинӣ дар сатҳи роҳбарони вазорату идораҳо иброз намуданд.

Роҳбарони ҳайатҳо иброз доштанд, ки дар доираи омодагӣ ба ҷаласаи Шӯрои сарони давлатҳо дар Душанбе риояи тамоми талаботи зиддиэпидемиологӣ ниҳоят муҳим аст.


Ҷониби Тоҷикистон иттилоъ дод, ки тибқи қарори Кумитаи тадорукот, ҳамаи шахсоне, ки ба корҳои муқаддамотии омодасозии баргузории ҳамоиш ҷалб шудаанд, бидуни истисно, эм карда шудаанд в ё ҳоло эм карда мешаванд.

Дар ҷараёни ҷаласа вазирон таъкид карданд, ки рушди устувор дар фазои СҲШ бидуни таъмини сатҳи муносиби амниятӣ ғайриимкон аст. Қарори ШВКХ дар бораи ба саммити Душанбе пешниҳод намудани Барномаи таҷдидшудаи ҳамкории давлатҳои узви СҲШ дар мубориза бо терроризм, сепаратизм ва экстремизм барои солҳои 2022-2024 ба имзо расид.

ШВКХ СҲШ ба вазъи Афғонистон таваҷҷуҳ зоҳир намуда, аз дурнамои бад шудани вазъ дар ин кишвар дар натиҷаи ихроҷи неруҳои эътилоф изҳори нигаронии амиқ карда шуд.

Роҳбарони ҳайатҳо масъалаҳои минбаъд амиқтар намудани ҳамкориро дар соҳаи иқтисодиёт муҳокима карданд. Вазирон нақшаи чорабиниҳои муштаракро барои рафъи оқибатҳои манфии иҷтимоӣ ва  иқтисодии пандемияи COVID-19 ҳамчун асос қабул карданд.

Самти фарҳангӣ ва гуманитарӣ дар маркази диққати вазирон буд.

Низомнома дар бораи гимни СҲШ, ки ташаббускори он Тоҷикистон мебошад, бори аввал дар таърихи Созмон мувофиқа карда шуд.

Дар ҷараёни мулоқот масъалаҳои таҳкими мавқеъгирии СҲШ дар арсаи байналмилалӣ баррасӣ шуданд. Таҳким ёфтани нуфузи СҲШ дар арсаи хориҷӣ зикр карда шуд ва масъалаҳои ҳамкории Созмон бо СММ ва муассисаҳои махсусгардонидашудаи он баррасӣ шуданд. Вазирон аз қабули қатънома дар бораи «Ҳамкории СММ ва СҲШ» дар ҷараёни 75-умин Ассамблеяи Генералии СММ истиқбол карданд.

Аъзои Шӯро оид ба васеъ кардани таркиби мақоми шарики муколамаи СҲШ мубодилаи афкор намуданд. Қарорҳои ШВКХ дар бораи додани ин мақом ба Арабистони Саудӣ ва Миср имзо шуданд, ки барои тасдиқ ба Шӯрои сарони давлатҳо пешниҳод хоҳанд шуд.

Вазирон ҳисоботро дар бораи фаъолияти котиботи СҲШ дар соли гузашта ва лоиҳаи Маърӯзаи дабири кулли СҲШ-ро дар бораи фаъолияти Созмон дар давраи ҳисоботӣ  тасдиқ карданд.

Дар фарҷоми ҷаласа вазирони корҳои хориҷӣ изҳори боварӣ карданд, ки натиҷаҳои он дар таҳкими минбаъдаи ҳамсоягии нек, дӯстӣ, ваҳдат, эътимоди тарафайн ва ҳамкории мутақобилан судманд байни давлатҳои узви СҲШ саҳми сазовор хоҳанд гузошт.

Ёдовар мешавем, ки ҷаласаи ШВКХ СҲШ чорабинии калидӣ дар роҳи саммити ҷашнии СҲШ, ки 16-17 сентябри соли 2021 дар Душанбе баргузор мешавад, гардид.

АКСҲО аз АМИТ «Ховар» ва ВКХ ҶТ

Июль 14, 2021 14:50

Хабарҳои дигари ин бахш

Дар Киев ҳамкории Тоҷикистон ва Украина дар соҳаи маориф ва илм баррасӣ шуд
Сироҷиддин Муҳриддин бо Фиристодаи махсуси Швейтсария оид ба масъалаҳои об дар Осиёи Марказӣ мулоқот намуд
Абдуҷаббор Азизӣ дар конфронси байналмилалии СҲШ иштирок намуд
Ҷаласаи дуюми роҳбарони вазорату идораҳои ҳифзи муҳити зисти давлатҳои узви СҲШ ҷамъбаст гардид
Вазирони мудофиаи давлатҳои аъзои СҲШ аз бадшавии босуръати вазъ дар Афғонистон изҳори нигаронӣ карданд
Дар Душанбе ҷаласаи дуюми роҳбарони вазорату идораҳои ҳифзи муҳити зисти кишварҳои узви СҲШ оғоз гардид
Даври нахустини машваратҳои сиёсӣ миёни Тоҷикистон ва Баҳрайн баргузор гардид
Террористон метавонанд зери ниқоби гуреза ба Тоҷикистон ворид шаванд
Сироҷиддин Муҳриддин: «То имрӯз ба Тоҷикистон дархост барои фароҳам овардани шароит барои баргузории музокироти байниафғонӣ ворид нашудааст»
Президенти Тоҷикистон бо сафари давлатӣ ба Туркманистон мераванд
Вазири корҳои хориҷии Тоҷикистон сафирони Чин ва Покистонро ба ҳузур пазируфт
Бознашри мақола ва мусоҳибаи Пешвои миллат, Президенти Тоҷикистон дар ВАО-и Ӯзбекистон

Маводҳои таҳлилӣ