Харитаи роҳи Чаҳорчӯби нави ҳамкорӣ оид ба рушди устувори СММ дар Тоҷикистон муаррифӣ шуд
ДУШАНБЕ, 15.07.2021 /АМИТ «Ховар»/. 15 июл дар бинои Вазорати корҳои хориҷӣ чорабинии муштараки Вазорати рушди иқтисод ва савдо ва Дафтари Ҳамоҳангсозии доимии Созмони Милали Муттаҳид дар Ҷумҳурии Тоҷикистон зери унвони «Муаррифӣ ва тасдиқи харитаи роҳи Чаҳорчӯби нави ҳамкории СММ оид ба рушди устувор» баргузор гардид. Дар ин бора АМИТ «Ховар» бо истинод ба Вазорати корҳои хориҷии Ҷумҳурии Тоҷикистон хабар медиҳад.
Дар ҳамоиш муовинони роҳбарони вазорату идораҳои давлатӣ ва коршиносони онҳо, роҳбарони муассисаҳои тахассусии СММ, аъзои тими кишварии он ва намояндагони ҷомеаи шаҳрвандӣ иштирок намуданд.
Чорабинии мазкур бо мақсади баланд бардоштани сатҳи огаҳии мақомоти давлатӣ аз раванди таҳияи Чаҳорчӯби нави ҳамкории СММ оид ба рушди устувор дар Тоҷикистон барои солҳои 2023-2026, ки ҷиҳати татбиқи барномаҳои муштараки Созмони Милали Муттаҳид дар кишвари мо замина фароҳам меорад, барпо гардид.
Ҳамоишро аз ҷониби Тоҷикистон муовини якуми Вазири рушди иқтисод ва савдо Ашӯрбой Солеҳзода ва аз тарафи СММ – Ҳамоҳангсози доимии Созмони Милал дар Ҷумҳурии Тоҷикистон Сезин Синаноғлу ифтитоҳ намуданд. Дар қисмати ифтитоҳӣ ҳамчунин муовини Вазири корҳои хориҷӣ Музаффар Ҳусейнзода суханронӣ карда, роҷеъ ба марҳилаҳои ҳамкории Тоҷикистону СММ дар соҳаҳои гуногун ва мавқеи кишвари мо нисбат ба Чаҳорчӯби номбурдаи ҳамкорӣ изҳори назар намуд. Ҳамзамон тазаккур дода шуд, ки таҳкиму густариши ҳамкорӣ бо СММ ва ниҳодҳои тахассусии он аз авлавияти сиёсати хориҷии Ҷумҳурии Тоҷикистон ба ҳисоб меравад.
Сипас коршиносони тими кишварии СММ дар Тоҷикистон ба ширкаткунандагон роҷеъ ба ҷанбаҳои асосии Харитаи роҳи Чаҳорчӯби нави ҳамкории СММ оид ба рушди устувор маълумот ва рӯнамоиҳо ироа карда, ба саволҳои ҳозирин посухҳои мушаххас доданд.
Шоёни зикр аст, ки пешнависи ниҳоии Чаҳорчӯби нави ҳамкории СММ оид ба рушди устувор то моҳи июни 2022 омода ва ба Ҳукумати Ҷумҳурии Тоҷикистон ҷиҳати баррасӣ ва тасдиқи баъдӣ ироа хоҳад шуд.
АКСҲО аз ВКХ ҶТ
Сафири Тоҷикистон бо мушовири Президенти Федералии Австрия оид ба сиёсати хориҷӣ мулоқот намуд
Конфронси чоруми Душанбе дорои хусусияти фарогир, амалӣ ва ба оянда нигаронида хоҳад буд
Сироҷиддин Муҳриддин бо муовини Дабири кулли СММ оид ба масъалаҳои иқтисодӣ ва иҷтимоӣ Ли Ҷунҳуа мулоқот намуд
Дар Ню-Йорк бо ибтикори Тоҷикистон бахшида ба Рӯзи ҷаҳонии пиряхҳо ҳамоиш баргузор гардид
Ҳайати Тоҷикистон дар чорабинии сатҳи баланд бахшида ба Рӯзи ҷаҳонии об дар Ню-Йорк иштирок намуд
Дар Сеул китоби «Анъанаҳои Наврӯз дар масири Шоҳроҳи абрешим» рӯнамоӣ гардид
Раванди оби Душанбе табодули афкор ва назарҳоро дар бораи нақши захираҳои об таъмин менамояд
Дар Донишгоҳи Ҳирошима Ҷашни байналмилалии Наврӯзро таҷлил намуданд
Ҳамкории Тоҷикистон бо сохтори СММ оид ба масоили коҳиши офатҳои табиӣ баррасӣ гардид
Намояндаи доимии Тоҷикистон бо мудири кулли ЮНЕСКО мулоқот намуд
Дар Москва ҷашни байналмилалии Наврӯзро бо шукуҳу шаҳомати хосса таҷлил намуданд
Муаррифии Тоҷикистон дар Намоишгоҳи байналмилалии китоб дар шаҳри Минск идома дорад
