Кумитаи байналмилалии олимпӣ самборо ба рӯйхати бозиҳои олимпӣ шомил намуд

ДУШАНБЕ, 22.07.2021 /АМИТ «Ховар»/. Кумитаи байналмилалии олимпӣ (IOC) Федератсияи байналмилалии самборо ба таври доимӣ пазируфт. Ин тасмим дар иҷлосияи Кумитаи байналмилалии олимпӣ, ки 20  июл дар шаҳри  Токиои Япония дар арафаи оғози Бозиҳои олимпӣ баргузор гардид, гирифта шуд. Дар ин бора  аз Федератсияи  самбои   Тоҷикистон  ба  шореҳи варзиши АМИТ «Ховар» Меҳрони Қурбон хабар  доданд.

Кумитаи байналмилалии олимпӣ дар як ҷаласа дар Токио ба ғайр аз Федератсияи байналмилалии самбо (FIAS) ба тарафдории эътирофи боз панҷ федератсияи байналмилалии варзишӣ овоз дод: Иттиҳоди байналмилалии черлидинг (ICU), Федератсияи байналмилалии ассотсиатсияҳои муай-тай (IFMA), Федератсияи байналмилалии айсштокспорт (IFI), Ассотсиатсияи умумиҷаҳонии ташкилоти кикбоксинг (WAKO) ва Федератсияи умумиҷаҳонии лакросс (WL).