Вазорати меҳнат пешниҳоди баланд бардоштани синни баромадан ба нафақаро дастгирӣ накард. Чаро? Роҳбари ин ниҳод Ширин Амонзода шарҳ медиҳад

Июль 30, 2021 13:15

ДУШАНБЕ, 30.07.2021 /АМИТ «Ховар»/. Вазорати меҳнат, муҳоҷират ва шуғли аҳолии Ҷумҳурии Тоҷикистон  пешниҳоди  Агентии суғуртаи иҷтимоӣ ва нафақаи назди Ҳукумати Тоҷикистонро дар бораи баланд бардоштани синни нафақа дар кишвар дастгирӣ накард. Дар ин бора Вазири меҳнат, муҳоҷират ва шуғли аҳолии Ҷумҳурии Тоҷикистон Ширин Амонзода 28 июл зимни нишасти матбуотӣ оид ба натиҷаҳои шашмоҳаи  аввали  соли равон изҳори назар намуд.

  «Дар ин бора суҳбат кардан барвақт аст. Пеш аз ҳама, барои он ки ҳар гуна тасмимгирӣ бояд пас аз таҳлили дақиқи илмӣ гирифта шавад», — гуфт мавсуф. Ба андешаи вазир, мардум бояд барои барқарор кардани неруи ҷисмонӣ, истироҳат ва рушд вақт дошта бошанд.

Маълум аст, ки замони  боло бурдани синни нафақа кайҳо гузаштааст. Дар тамоми ҷаҳон, баръакс, он кам карда мешавад. Илова бар ин, корҳое, ки қувваи зиёди ҷисмонӣ ё вокуниши фаврӣ талаб мекунанд, бешубҳа, барои коргарони калонсол мувофиқ нестанд.

Қаблан, 21 июл директори Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон Дилмурод Давлатзода гуфта буд, ки дар кишвар масъалаи тағйири синни нафақа баррасӣ мешавад. «Мо пешниҳод кардем, ки синни нафақа барои мардон то 65 ва барои занон то 60 боло бурда шавад», — гуфт ӯ.

Давлатзода иброз дошт, ки якчанд вазорату идораҳо, аз ҷумла Вазорати меҳнат ба чунин  пешниҳод   розӣ нашуданд.

«Ҳамин тавр синни нафақаи ҳозира боқӣ мемонад, аммо мо ин масъаларо минбаъд низ ба миён хоҳем гузошт»,-илова намуд сардори Агентии суғуртаи иҷтимоӣ ва нафақа.

Ёдовар мешавем, ки синни ҳозираи баромадан ба нафақа барои мардон 63 ва занон 58 сол аст. Дар кишвар сафи нафақахӯрон афзудааст — зиёда аз 22 ҳазор нафар. Шумораи нафақахӯрон дар Тоҷикистон беш аз 744 ҳазор нафарро ташкил медиҳад. Андозаи нафақаи миёна ба 318 сомонӣ баробар аст.

Бо супориши Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон аз 1 сентябри соли 2020 андозаи маош, нафақа ва стипендия 10-15% зиёд карда шуд. Нафақа барои маъюбони то 18-сола, инчунин барои гурӯҳҳои бекорон ва маъюбони ба парастор ниёзманд 50% зиёд карда шуд.

Ҳоло маоши ҳадди ақал дар Тоҷикистон 400 сомонӣ (41 доллар) ва музди миёнаи моҳонаи номиналӣ 1357 сомонӣ (140 доллар) -ро ташкил медиҳад.

 

АКС аз АМИТ «Ховар»

Июль 30, 2021 13:15

Хабарҳои дигари ин бахш

Ҳайати Бонки ҷаҳонӣ бо татбиқи лоиҳаи «Беҳтар намудани хизматрасонии тиббӣ» дар вилояти Суғд шинос шуд
ОГОҲИИ АГЕНТИИ ОБУҲАВОШИНОСӢ: 21-22 октябр дар Тоҷикистон ҳаво номусоид шуда, борон ва дар доманакӯҳҳо барф меборад
Маликшо Неъматзода зимни сафар ба Бадахшон бо татбиқи ҷамъиятии қонунгузории меҳнат шинос шуд
Вазорати тандурустии Тоҷикистон аз татбиқи муваффақонаи ислоҳоти маблағгузорӣ дар соҳаи тандурустӣ хабар дод
Татбиқи «Лоиҳаи фавқулодаи муқовимат ба вируси COVID-19 дар Тоҷикистон» мавриди баррасӣ қарор гирифт
Мушкилоти муҳоҷирони тоҷик дар деҳаи Шубини шаҳри Воронежи Федератсияи Русия ҳал гардид
15 октябр — Рӯзи умумиҷаҳонии мубориза бо саратони ғадуди ширӣ. 90 фоизи гирифторони ин бемориро занҳои аз 40-сола боло ташкил медиҳанд
Дар Тоҷикистон мехоҳанд Шӯрои ҷамъиятӣ оид ба ҳуқуқи маъюбон таъсис диҳанд
Риояи тозагӣ зиндагии мардумро бароҳат, гуворо ва бехатар мегардонад. 15 октябр — Рӯзи умумиҷаҳонии дастони тоза
Ваколатдор оид ба ҳуқуқи инсон аз муассисаи ислоҳии ЯС 3/1-и Сарраёсати иҷрои ҷазои ҷиноятии Вазорати адлия дидан намуд
Дар ноҳияи Кӯшониён бинои анбори маҳсулоти ғайриозуқа барои аҳолии аз офати табиӣ зарардида ифтитоҳ ёфт
Ҳазорон нафар шаҳрвандони Тоҷикистон дар Русия ба «афви муҳоҷиратӣ» дохил шудаанд