Дар Тоҷикистон низоми омори сайёҳӣ бо ҷалби коршиносони байналмилалӣ такмил дода мешавад
ДУШАНБЕ, 25.08.2021 /АМИТ «Ховар»/. Дар Тоҷикистон низоми омори сайёҳӣ бо ҷалби коршиносони байналмилалӣ такмил дода мешавад. Масъалаи мазкур дар ҷаласаи ҷамъбастии гурӯҳи корӣ оид ба такмили омори сайёҳӣ, ки бо иштироки коршиноси Созмони ҷаҳонии сайёҳӣ /СҶС/ баргузор гардид, баррасӣ шуд, хабар медиҳад АМИТ «Ховар» бо истинод ба Кумитаи рушди сайёҳии назди Ҳукумати ҷумҳурӣ.
Раиси Кумитаи рушди сайёҳии назди Ҳукумати Ҷумҳурии Тоҷикистон Тоҷиддин Ҷӯразода изҳор намуд, ки ҷиҳати такмили омори сайёҳӣ Кумита ҳамкориро бо ниҳодҳои байналмилалии молиявӣ тақвият дода, дар оянда бо кумаки техникии Бонки Осиёии Рушд ва ҷалби коршиносони Созмони ҷаҳонии сайёҳӣ низоми ёридиҳандаи омори сайёҳӣ TSA (Tourism Satellite Account) ҷорӣ карда шавад. Низоми мазкур қисми ёридиҳандаи низоми омори миллӣ буда, нишондиҳандаҳои соҳаро дар сохтори Маҷмӯи маҳсулоти дохилӣ муайян хоҳад кард.
Дар кори ҷаласа масъулини Агентии омор, Қӯшунҳои сарҳадии Кумитаи давлатии амнияти миллии Ҷумҳурии Тоҷикистон, Бонки миллӣ ва коршиноси байналмилалии Созмони ҷаҳонии сайёҳӣ самаранокии низоми ёридиҳандаи омори сайёҳиро матраҳ намуданд.
Бояд ёдовар шуд, ки аз ҷониби коршиносони Созмони ҷаҳонии сайёҳӣ бо ҷалби вазорату идораҳои марбута, ассотсиатсияҳо ва ширкатҳои сайёҳӣ давоми як моҳ машғулияти омӯзишӣ оид ба аҳамияти соҳаи сайёҳӣ, маркетинг ва низоми омори сайёҳӣ гузаронида шуд.
Мавҷуд будани маълумоти омории мукаммал барои сиёсати таъсирбахши давлатӣ дар соҳаи сайёҳӣ, қабули қарорҳои дахлдор дар соҳаи сайёҳӣ ва ҷалби сармоя ба минтақаҳои мамлакат шароити мусоид фароҳам меорад.
Таъкид гардид, ки дар партави дастуру супоришҳои Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ҷиҳати баланд бардоштани сатҳу сифати хизматрасонӣ, ҷалби доимии сайёҳону меҳмонони хориҷӣ ба ҷумҳурӣ дар назди Кумита гурӯҳи кории доимамалкунанда аз ҳисоби вазорату идораҳои дахлдор таъсис дода шуд, ки вазифаи он мукаммал намудани заминаҳои меъёрии омори сайёҳӣ дар Ҷумҳурии Тоҷикистон мебошад.
Дар мулоқотҳои роҳбарияти Кумитаи рушди сайёҳӣ бо созмонҳои байналмилалӣ ва шарикони рушд низ барои ҷалби сайёҳони хориҷӣ, такмили омори сайёҳӣ, ҷалби сармоя ба рушди инфрасохтори сайёҳӣ бо дарназардошти имтиёзҳои аз ҷониби Ҳукумати мамлакат роҳандозишуда масъалагузорӣ мешавад.
Аксҳо аз Кумитаи рушди сайёҳии назди Ҳукумати ҷумҳурӣ
Дар ноҳияи Шоҳмансур беш аз 14 ҳазор тонна маҳсулоти кишоварзӣ ҷамъоварӣ гардидааст
«Таҷлили Рӯзи Парчами давлатӣ барои баланд бардоштани ҳисси ватандӯстӣ ва бедор кардани эҳсоси ҳифзи марзу бум нақши муассир дорад», — бардошт аз ҳамоиш дар Кумитаи рушди сайёҳӣ
Ҳамкории Тоҷикистон бо Иттиҳоди Аврупо дар бахши энергетика ва захираҳои об тавсеа меёбад
Донишгоҳи байналмилалии сайёҳӣ ва соҳибкории Тоҷикистон ва Донишгоҳи Чиндао Бинҳайи Чин Созишномаи ҳамкорӣ ба имзо расониданд
Дурнамои муносибатҳои сиёсӣ, иқтисодӣ, тиҷоратӣ ва сармоягузории Тоҷикистон ва Индонезия баррасӣ шуд
Дар Душанбе ҷаласаи даҳуми Шурои ҳамоҳангсози миллӣ оид ба рушди соҳаи сайёҳӣ баргузор гардид
Дар Озарбойҷон ташаббусҳои Президенти Тоҷикистон дар самти ҳифзи пиряхҳо таъкид гардиданд
Масъалаҳои фаъолияти дидбонгоҳҳои гумрукии наздисарҳадӣ баррасӣ шуданд
Ҷаласаи 7-уми Комиссияи муштараки ҳамкории тиҷоратӣ, иқтисодӣ ва илмӣ-техникии Тоҷикистон ва Покистон доир мегардад
Дар Душанбе Лоиҳаи дуюми мукаммалгардонии идоракунии молияи давлатӣ баррасӣ гардид
Дар Сингапур имконияти ҳамкории дуҷониба бо Тоҷикистон баррасӣ шуд
Пагоҳ дар вилояти Хатлон Форуми байналмилалии сармоягузорӣ доир мегардад
