ФУТЗАЛ. Дастаҳои «Сипар»-и Хуҷанд ва «Соро компания»-и Душанбе бар ҳарифонашон ғолиб омаданд

ДУШАНБЕ, 23.08.2021 /АМИТ «Ховар»/. 21 август бозиҳои даври ҳафтуми Лигаи касбии футзали Тоҷикистон-2021   дар толорҳои варзишии мамлакат  баргузор  шуданд.

Дар ин бора шореҳи варзиши АМИТ «Ховар» Меҳрони Қурбон бо истинод ба Федератсияи футболи Тоҷикистон иттилоъ медиҳад.

Дар ин давр чемпиони феълии кишвар- дастаи футзали  «Сипар»-и шаҳри Хуҷанд ба дарвозаи дастаи  «Помир»-и шаҳри  Хоруғ 10 голи беҷавоб зад. Дар ҳайати дастаи  «Сипар»-и шаҳри Хуҷанд легионери гурҷистонӣ Нукри Чумбуридзе се тӯб зад ва ё хет-трик анҷом дод.

Дастаи футзали  «Соро компания»-и шаҳри  Душанбе низ ба ҳарифаш- дастаи «Самандар»-и шаҳри  Турсунзода ғолиб омада, 13 тӯб вориди дарвозааш намуд. Дар ҳайти дастаи футзали  «Соро компания»-и шаҳри  Душанбе Фирӯз Сангов се тӯб ба нишон расонид.
Дар бозии дигар дастаи футзали  «Истиқлол»-и шаҳри Душанбе  бар дастаи «Пойтахт» бо ҳисоби 3:2 ғолиб омад. Бо шарофати ду голи Самандар Ризомов ва голи Муҳаммадҷони Асламхон  дастаи футзали  «Истиқлол»-и шаҳри Душанбе соҳиби се хол шуд.

Пас аз натиҷагирии 7 даври Лигаи касбии футзали Тоҷикистон-2021 дастаи «Сипар»-и  шаҳри Хуҷанд бо 22 хол пешсаф аст. Дастаи  «Соро компания»-и шаҳри Душанбе, ки 19 хол дорад, дар ҷои дуюм қарор гирифтааст.

Ёдовар  мешавем, ки  дар даври навбатӣ, 28 август дастаҳои футзали  «Сипар»-и шаҳри Хуҷанд бо «Соро компания»-и шаҳри Душанбе, «Помир»-и шаҳри  Хоруғ бо  футзали  «Истиқлол»-и шаҳри Душанбе ва  «Пойтахт» бо «Самандар»-и шаҳри  Турсунзода байни ҳам  вомехӯранд.

                                                                                                                                              АКС аз ФФТ