Ба Тоҷикистон 100 ҳазору 800 воя ваксинаи «AstraZeneca» ворид гардид

ДУШАНБЕ, 10.09.2021 /АМИТ «Ховар»/. Шаби 9 сентябр аз ҷониби Олмон ба Тоҷикистон  100 ҳазору 800 воя ваксинаи «AstraZeneca» ҳамчун кумаки башардӯстона ворид гардид, хабар медиҳад АМИТ «Ховар» ба истинод ба Вазорати тандурустӣ ва ҳифзи иҷтимоии аҳолии Ҷумҳурии Тоҷикистон.

Кумаки мазкур дар доираи ҳамкории дуҷонибаи Ҷумҳурии Тоҷикистон ва Ҷумҳурии Федеративии Олмон дар чаҳорчӯби механизми ҷаҳонии дастрасии одилона ба ваксинаҳои Ташкилоти умумиҷаҳонии тандурустӣ (COVAX) бар зидди бемории COVID-19 расонида шуд.

Маросими расмии қабули ваксинаҳо имрӯз,  10 сентябр дар Маркази ҷумҳуриявии иммунопрофилактика бо иштироки намояндагони Вазорати тандурустӣ ва ҳифзи иҷтимоии аҳолии  Ҷумҳурии Тоҷикистон ва Сафорати Ҷумҳурии Федеративии Олмон дар Тоҷикистон  ва шарикони рушд баргузор гардид.

Муовини якуми Вазири тандурустӣ ва ҳифзи иҷтимоии аҳолии  Ҷумҳурии Тоҷикистон Ғафур Муҳсинзода зимни мулоқот бо намояндагони Сафорати Ҷумҳурии Федеративии Олмон дар Тоҷикистон ба ҳукумати ин кишвар ҷиҳати таҳвили ваксинаи «AstraZeneca» ба мамлакат изҳори миннатдорӣ баён намуд.

Ваксинаҳои мазкур дар анборҳои махсус нигаҳдорӣ шуда, дар асоси нақшаи пешбинишуда ба аҳолӣ гузаронида мешаванд.

Аксҳо аз Вазири тандурустӣ ва ҳифзи иҷтимоии аҳолии  Ҷумҳурии Тоҷикистон