Форуми минтақавии соҳибкории Рашт-2021 баргузор шуд

Ноябрь 3, 2021 10:06

РАШТ, 03.11.2021 /АМИТ «Ховар»/. Дар доираи дастуру супоришҳои Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, Раиси Шўрои машваратӣ оид ба беҳтар кардани фазои сармоягузорӣ, муҳтарам Эмомалӣ Раҳмон 2 ноябри соли 2021 дар ноҳияи Рашт Форуми минтақавии соҳибкории Рашт — 2021 таҳти унвони «Рушди соҳибкории агросаноатӣ» ва ҷаласаи 7-уми Шурои соҳибкорию сармоягузорӣ дар водии Рашт ба иштироки намояндагони доираҳои соҳибкориву сармоягузорӣ, вазорату идораҳо, мақомоти иҷроияи маҳаллии ҳокимияти давлатӣ, шарикони рушд ва коршиносон баргузор гардид.

Ҷаласаро Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Раиси Шӯрои соҳибкорию сармоягузорӣ дар водии Рашт Саъдӣ Қодирзода ифтитоҳ намуда, қайд намуд, ки бо иқдоми Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон, муҳтарам Эмомалӣ Раҳмон ва Ҳукумати мамлакат дар самти беҳсозии фазои соҳибкориву сармоягузорӣ, раванди ободониву созандагӣ, сохта ва ба истифода додани иншоотҳои таъиноти гуногун дар водии Рашт тадбирҳои судманд андешида мешавад, ки он ба мунтазам беҳтар гардидани сатҳу сифати зиндагии мардум ва дар маҷмуъ ноҳияҳои минтақа мусоидат менамояд.

Дар ҷаласа, аз ҷумла вобаста ба саҳми Шўрои машваратии назди Президенти Ҷумҳурии Тоҷикистон оид ба беҳтар кардани фазои сармоягузорӣ дар самти баррасӣ, пайгирӣ ва дарёфти роҳҳои ҳалли масъалаҳои бахши хусусӣ, тавсеаи фаъолияти заршуӣ, таъсиси бизнес-инкубатор дар ноҳияи Рашт, роҳандозии озмоишгоҳи хокшиносӣ, ҷамъоварӣ ва банду басти меваҳо, ба роҳ мондани ҷамъоварӣ ва коркарди меваю сабзавот, пусту пашм ибрози назар карда шуд.

Зимни ифтитоҳи Форум, Раиси Кумитаи давлатии сармоягузорӣ ва идораи амволи давлатии Ҷумҳурии Тоҷикистон, Раиси Шӯрои соҳибкорию сармоягузорӣ дар водии Рашт Саъдӣ Қодирзода қайд намуд, ки бахшида ба таҷлили ҷашни бузурги миллӣ, 30 — солагии Истиқлолияти давлатии Ҷумҳурии Тоҷикистон ва Рӯзи соҳибкорон дар водии Рашт бори нахуст Форуми минтақавии соҳибкории Рашт-2021 таҳти унвони «Рушди соҳибкории агросаноатӣ» баргузор мегардад.

Ҳадафҳои Форум шиносоӣ бо имкониятҳои соҳибкорӣ дар самти васеъ намудани истеҳсол ва коркарди маҳсулоти кишоварзӣ, баланд бардоштани ҷолибияти сармоягузории водии Рашт, ҷустуҷўи роҳҳои муосиргардонии дастрасӣ ба воситаҳои молиявӣ, дарёфти бозорҳои фурӯш, баррасӣ ва дарёфти роҳҳои ҳалли мушкилоту монеаҳои мавҷудаи соҳибкорию сармоягузорӣ дар минтақа ба ҳисоб меравад.

Дар кори Форум мавзуъҳои имконияти рушди соҳаи кишоварзӣ ва арзёбии заминаҳои мавҷуда дар водии Рашт, дарёфти роҳҳо ва усулҳои афзоиш додани истеҳсоли маҳсулоти ғизоӣ, роҳандозии усулҳои нави ҷалби сармояи дохиливу хориҷӣ дар тақвияти коркарди маҳсулоти кишоварзӣ, афзалиятҳои технологияҳои муосир дар баланд бардоштани суръат ва сифати маҳсулот, омодасозии лоиҳаҳои сармоягузорӣ дар самти коркарди маҳсулоти кишоварзӣ мавриди баррасӣ қарор дода шуд.

Дар форум намояндагони шарикони рушд, аз ҷумла Барномаи рушди СММ дар Тоҷикистон, КВД “Хӯрокворӣ”-и Вазорати саноат ва технологияҳои нави Ҷумҳурии Тоҷикистон, Вазорати кишоварзии Ҷумҳурии Тоҷикистон, роҳбарони ҶДММ “Рахш — а — ЛТД”, шаҳри Ваҳдат, ҶСК «Кафолат», шаҳри Душанбе, ҶДММ “Баракат — Исфара”, шаҳри Исфара, ташкилоти ҷамъиятии «Рӯшноӣ», ноҳияи Рашт, ташкилоти ҷамъиятии байналмилалии “Сурхоб”, ноҳияи Тоҷикобод ва дигарон баромад намуданд.

Ҳангоми мубодилаи афкор баромадкунандагон вобаста ба таваҷҷуҳи хоссаи Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва саҳми Шўрои машваратии назди Президенти Ҷумҳурии Тоҷикистон оид ба беҳтар кардани фазои сармоягузорӣ дар самти баррасӣ, пайгирӣ ва дарёфти роҳҳои ҳалли масъалаҳои бахши хусусӣ, имконияти истифодабарӣ аз хизматрасониҳои “Саноатсодиротбонк”, тавсеаи фаъолият оид ба ҷамъоварӣ ва банду басти меваҳо, бунёди корхонаҳои истеҳсоли таҷҳизот ва васоили банду басти меваҳо, ба роҳ мондани ҷамъоварии пусту пашм ибрози назар намуданд.

Ҳамзамон, аз иштирокчиён ва дигар соҳибкорону сармоягузорон даъват ба амал оварда шуд, ки нерў ва иқдомоти дастаҷамъонаи худро барои таҳкими муносибатҳои созанда, таъмини рақобати солим ва рушди иқтисодиёти водии Раштонзамин ва дар ин замина, саҳми шоистаи худро дар таъмини рушди иқтисодиёти мамлакатамон равона менамоянд.

Дар форум шаш санади ҳамкорӣ ҷиҳати ба роҳ мондани ҳамкориҳо дар самти фароҳамоварӣ ва эҷоди мавзеъҳои сайёҳӣ ва бунёди иншооти хизматрасонӣ, ба роҳ мондани ҳамкориҳо дар самтҳои сайёҳӣ, оид ба ҳамкориҳо дар самти банду баст ва коркарди аввалияи мева, ҳамкориҳо дар соҳаи агросаноатӣ ва баланд бардоштани ҳосилнокии маҳсулот ва дар самти занбурпарварӣ, истеҳсол ва содироти асал ба имзо расонида шуд.

     АКСҲО: АМИТ «Ховар» 

Ноябрь 3, 2021 10:06

Хабарҳои дигари ин бахш

Тоҷикистон: Дар беш аз 590 ҳазор гектар шудгор гузаронида шудааст
РУШДИ КИРМАКПАРВАРӢ. Дар Ҷамоати деҳоти Саразми шаҳри Панҷакент 30 ҳазор бех ниҳоли тут шинонида шуд
Кишоварзони ноҳияи Абдураҳмони Ҷомӣ дар беш аз 8 ҳазор гектар пунбадона кишт менамоянд
Баҳодур Шерализода дар Самарқанд доир ба омодагӣ ба Конференсияи байналмилалии сатҳи баланд оид ба ҳифзи пиряхҳо маълумот дод
Дар шаҳри Душанбе иҷрои «Барномаи фишанги ҳамоҳангсозии сиёсат» баррасӣ гардид
Ҳаҷми гардиши савдои хориҷии Тоҷикистон ва Узбекистон соли 2024 1,74 маротиба зиёд гардид
Барномаи савдои электронӣ дар Тоҷикистон ба баланд бардоштани малакаи рақамию молиявии аҳолӣ ва соҳибкорон равона шудааст
Оё дар Тоҷикистон низоми кишти пунбадона тағйир меёбад? Шарҳи коршиносон дар ин мавзуъ
Дар шаҳри Гулистон Бизнес-форуми Тоҷикистон ва Тотористон баргузор гардид
Имконоти сайёҳии Тоҷикистон дар Намоишгоҳи байналмилалии сайёҳии «Лето-2025» муаррифӣ шуданд
Ҳайати Тотористон бо фаъолияти як қатор корхонаҳои саноатии вилояти Суғд шинос гардид
Дар ноҳияи Кӯшониён дар 320 гектар гармхона бунёд карда шудааст