ФУТБОЛ. Пагоҳ бозиҳои ҷавобии даври нимфинали Ҷоми Тоҷикистон-2021 оғоз мешаванд

ДУШАНБЕ, 26.11.2021 /АМИТ «Ховар»/. 27-28 ноябр дар варзишгоҳҳои мамлакат бозиҳои ҷавобии даври нимфинали Ҷоми Тоҷикистон-2021 оид ба футбол миёни дастаҳои футболи  «Истиқлол»-и шаҳри Душанбе ва «Эсхата»-и шаҳри  Хуҷанд ва «Равшан»-и  шаҳри Кӯлоб бо  «Хуҷанд»-и шаҳри Хуҷанд  баргузор мегарданд, иттилоъ медиҳад шореҳи варзиши АМИТ «Ховар» бо истинод ба Федератсияи футболи Тоҷикистон.    

Чанд рӯз пеш,  бозиҳои аввали даври нимфинали Ҷоми Тоҷикистон-2021 оид ба футбол хеле ҷолиб  баргузор шуда буданд. Дар ин давр дастаи футболи «Истиқлол»-и  шаҳри Душанбе бар  дастаи футболи  «Эсхата»-и шаҳри  Хуҷанд бо ҳисоби 4:3 ғалаба кард.

Қобили зикр аст, ки бозии дастаҳо дар Варзишгоҳи марказии ҷумҳуриявии шаҳри Душанбе  дар сатҳи баланд доир гашт. Футболбозони дастаи «Истиқлол»-и  шаҳри Душанбе ҳамаи голҳоро дар нимаи аввали бозӣ ба нишон расониданд. Манучеҳр Ҷалилов дар дақиқаи 8-ум, Алишер Ҷалилов дар дақиқаи 25, Манучеҳр Сафаров дар дақиқаи 28, Рёта Нома дар дақиқаи 38 дарвозабони дастаи  «Эсхата»-и шаҳри  Хуҷандро маҷбур карданд, ки тӯбро аз дохили дарвоза берун орад.

Дар ҳайати дастаи  «Эсхата»-и  шаҳри  Хуҷанд  Ҷаҳонгир Эргашев ду тӯб, Аҳрорҷон Иноятов як тӯб ба ҳадаф расонданд.

Дар бозии дигари нимфинали Ҷоми Тоҷикистон-2021 дастаи футболи «Хуҷанд»-и шаҳри Хуҷанд дар майдони худ ба дарвозаи дастаи  «Равшан»-и  шаҳри Кӯлоб 4 голи беҷавоб зад. Дилшод Бозоров ду гол, Нозим Бобоҷонов ва Комрон Турсунов якголӣ ба нишон расониданд.

                                               АКС: ФФТ