Нишасти Ҳинд бо таъкид ба ташкили ҳукумати фарогир дар Афғонистон ба поён расид

Ноябрь 11, 2021 14:31

ДУШАНБЕ, 11.11.2021/АМИТ «Ховар»/. Мушовирони амнияти миллӣ ва  котибони шуроҳои амнияти ҳафт кишвари минтақа дар эъломияи ниҳоии нишасти Ҳинд бар зарурати як ҳукумати ошкоро ва фарогир таъкид карданд, ки иродаи тамоми мардуми Афғонистон аст. Дар ин бора имрӯз радиои «Овози тоҷик» бо истинод ба хабаргузории Shafaqna Afghanistan иттило дод.

Ҷаласаи минтақавӣ дирӯз, чоршанбе, таҳти раёсати Аҷит Дуал, мушовири амнияти миллии Ҳиндустон баргузор шуд, гуфта мешавад дар хабар.

Бар асоси баёнияе, ки дар ин нишаст мунташир шуд, вазъи кунунии Афғонистон, бахусус вазъи амниятӣ ва паёмадҳои минтақаӣ ва ҷаҳонии он баррасӣ  гардид.

Ширкаткунандагони мулоқот ба ҳифзи тамомияти арзии Афғонистон таъкид карда, ба дахолати қувваҳои хориҷӣ муқобил баромаданд.

Мушовирони амният ва  котибони  шӯроҳои амнияти миллӣ дар баёния гуфтаанд, ки қаламрави Афғонистон набояд барои паноҳгоҳ, омӯзиш, тарҳрезӣ ва маблағгузории ҳамагуна амалҳоии террористӣ истифода шавад.

Онҳо ҳамчунин хостори ҳамкориҳои дастаҷамъона дар муқобили таҳдиди тундгароӣ, ифротгароӣ, ҷудоихоҳӣ ва қочоқи маводи мухаддир дар минтақа шуданд ва бар зарурати ҳукумати ошкоро ва воқеъан фарогир, ки иродаи тамоми мардуми Афғонистон аст, таъкид карданд.

Мушовирони амният ва дабирони шӯроҳои амнияти ҳафт кишвар ҳамагуна фаъолиятҳои террористиро қотеъона маҳкум карда, пойбандии устувори худро ба мубориза бо терроризм дар ҳама шакл ва зуҳуроташ таъйид карданд.

Дар ин ҳамоиш Русия, Осиёи Марказӣ, Эрон ва Ҳиндустон ширкат доштанд,  аммо Чин ва Покистон даъвати Ҳиндро напазируфтанд. Тоҷикистонгро дар ҳамоиш Котиби шӯрои амнияти Тоҷикистон Насрулло Маҳмудзода намондагӣ кард.

Кишварҳои минтақа дар ҳоле ба ташкили як ҳукумати фарогир дар Афғонистон таъкид мекунанд, ки то ҳол ҳеҷ давлате  ҳукумати Толибонро ба расмият нашинохтааст.

Хотиррасон мешавем: яке аз шартҳои асосии эътирофи байналмилалии Толибон*, ки аз ҷониби СММ пешниҳод шудааст, маҳз ташкили ҳукумати фарогир дар Афғонистон аст. Аз миёни давлатҳои минтақа Тоҷикистон аввалин шуда, ба зарурияти ташкили чунин ҳукумат таъкид карда буд. Ин даъват дар чанд моҳи охир чандин дафъа аз ҷониби Президенти ҶТ Эмомалӣ Раҳмон дар чанде аз ҳамоишу мулоқотҳои сатҳи байналмилалӣ, минҷумла дар саммитҳои СҲШ ва СААД дар Душанбе ва дар иҷлоси 76-уми Маҷмаи умумии СММ садо дод.

_____________________

*«Толибон» — ҳаракати мамнуъ дар Тоҷикистон

АКС аз манобеи боз

Ноябрь 11, 2021 14:31

Хабарҳои дигари ин бахш

Дабири кулли СММ башариятро аз афзоиши хатари яроқи ҳастаӣ ҳушдор дод
Ҳабибулло Воҳидзода: Дар ноҳияҳои наздисарҳадии Тоҷикистон бо Афғонистон беш аз се тонна маводи нашъаовар мусодира гардид
Ҷаласаи Кумитаи зиддитеррористии Шӯрои амнияти СММ дар Ҳиндустон баргузор мегардад
Чин моҳи август раёсати Шӯрои амнияти Созмони Милали Муттаҳидро бар уҳда мегирад
Нақши Тоҷикистон дар мубориза бо муомилоти ғайриқонунии маводи нашъаовар дар минтақа муҳим арзёбӣ шуд
НЭНСИ ПЕЛОСӢ БА ТАЙВАН ОМАД. Сафири ИМА ба Вазорати корҳои хориҷии Чин даъват шуд
ИМА изҳор доштанд, ки ҳаққи гузаронидани амалиёти зиддитеррористӣ дар Афғонистонро нигоҳ медоранд
АЗ-ЗАВОҲИРӢ ДАР АФҒОНИСТОН КУШТА ШУД. Байден амалиёти ИМА-ро барои нобуд кардани роҳбари «Ал-Қоида» комилан муваффақона хонд
АРТИШИ МАРДУМИИ ОЗОДИХОҲИ ЧИН 95-СОЛА ШУД. Имрӯз ҶМЧ солгарди таъсиси қувваҳои мусаллаҳашро таҷлил менамояд
Густариши ҳамкории Тоҷикистон ва Ҷопон доир ба мубориза бар зидди ҷинояткории фаромиллӣ баррасӣ гардид
БУНЁДИ МУДОФИАВӢ БА ХОТИРИ ҲИФЗИ СУЛҲ ДАР ҶАҲОН. 1 август Артиши мардумии озодихоҳи Чин солгарди 95-уми таъсиси худро таҷлил менамояд
Прокуратураи генералии Русия ба суд даъво пешниҳод кард, ки Ҳизби наҳзати исломии Тоҷикистон террористӣ эътироф гардад

Маводҳои таҳлилӣ