ТАВСИЯИ МУТАХАССИС. Яхобро пас аз рехтани барги дарахтон дар моҳҳои декабр — феврал ду маротиба мондан зарур аст

Январь 5, 2022 14:14

ДУШАНБЕ, 05.01.2022 /АМИТ «Ховар»/. Тадбири муҳими агротехникӣ дар фасли зимистон- ин яхобмонӣ мебошад, ки ба захиракунии намӣ, нест кардани ҳашароту зараррасонҳо ва ҳар гуна касалиҳо,  баланд бардоштани ҳосилхезии замин, ба даст овардани маҳсулоти босифат ва меваҳои лазизу шаҳдбор замина мегузорад. Яхобро пас аз рехтани барги дарахтон моҳҳои декабр — феврал ду маротиба мондан зарур аст. Аз ин рӯ тавсия дода мешавад, ки ба дарахтони мевадиҳанда ва токзоре, ки дар заминҳои обёришаванда ҷойгир мебошанд, дар фасли зимистон яхоб монда шавад. Ин нуктаро доктори илмҳои кишоварзӣ Ҳикматулло Назиров ба хабарнигори АМИТ «Ховар» иброз дошт.

Ба гуфтаи доктори илмҳои кишоварзӣ, яхобмонӣ на танҳо дар боғу токзор гузаронида мешавад, балки он барои гулу буттаҳо, дарахтони ороишӣ низ аҳамияти калон дорад.

Мавсуф зикр намуд, ки боғу токпарварӣ барои  таъмини амнияти  озуқавории кишвар мавқеи хосса дорад. Тавре мушоҳида мегардад, сол то сол ҳарорат баланд гардида, аз таъсири он  дарахтон, аз ҷумла бодому зардолу барвақт гул мекунанд, ки ин зарари калон дорад. Агар кишоварзон обмонии захиравӣ ва яхобмониро  сари вақт гузаронанд, дарахтон дар зимистон карахт шуда, дертар ба нашъунамо сар мекунанд. Сарфи назар аз он ки ҳарорати ҳаво дар зимистон гарм ё сард аст, бояд дар заминҳои кишоварзӣ обмонии захиравӣ ва яхобмонӣ гузаронида шаванд.

Ҳикматулло Назиров иброз намуд, ки дар натиҷаи яхобмонӣ ва обмонии захиравӣ ҳосилнокии боғҳои себ то 70 — 100, олу 50 — 60, олуболу 60 — 80 ва зардолу то 90 — 100 дарсад зиёд мегардад.

Тавсия дода шуд, ки дар заминҳои лалмӣ аз бориши барф истифода намуда, дар атрофи ток ва дарахтон барфро ҷамъ намудани зарур аст.

Ба тавсияи олими соҳаи кишоварзӣ, дар ноҳияҳои вилояти Хатлон, аз ҷумла дар ноҳияҳои Шаҳритӯс, Кӯшониён, Абдураҳмони Ҷомӣ, Фархор, Ҳамадонӣ, Восеъ, Қубодиён, Носири Хусрав, Панҷ, Ҷайҳун ва Дӯстӣ ду маротиба яхоб мондан манфиатбахш аст. Зеро ҳарорати ҳаво дар ин ноҳияҳо баландтар мебошад. Инчунин дар баъзе ноҳияҳои вилояти Суғд низ ду маротиба яхоб мондани дарахтон тавсия дода мешавад.

Фирӯза ДАВЛАТЗОДА,
АМИТ «Ховар»

АКС аз бойгонии АМИТ «Ховар»

Январь 5, 2022 14:14

Хабарҳои дигари ин бахш

ДАРАХТ БИНШОН! Дар ноҳияи Темурмалик беш аз 500 ниҳолҳои ороишӣ шинонида шуд
Дар Истаравшан дар майдони 40 гектар боғи себ бунёд мегардад
ИҚДОМ БА ЗЕБОИПАРАСТИВУ ОЗОДАГӢ. Дар шаҳри Хоруғ Ҳафтаи гулшинонӣ эълон гардид
ДАРАХТ БИНШОН! Дар Мурғоб 4 ҳазор қаламча ва ниҳоли дарахтони бед, ки ба иқлими баландкӯҳи ноҳия мутобиқанд, шинонда шуданд
ДАРАХТ БИНШОН! Дар мавсими имсола дар Хоруғ зиёда аз 3 ҳазор бех дарахтони босамару ороишӣ шинонида мешаванд
Пешвои миллат Эмомалӣ Раҳмон барои бунёди тутзор дар Хоҷагии деҳқонии «Хурсандӣ-2»-и ноҳияи Кӯшониён дарахт шинонданд
ДАРАХТ БИНШОН! Дар ноҳияи Ҷаббор Расулов беш аз 200 бех ниҳолҳои санавбар шинонида шуданд
ДАРАХТ БИНШОН! Дар шоҳроҳи Кӯлоб-Ховалинг ва кӯчаҳои марказӣ беш аз 1000 бех ниҳолҳои ороишию сояафкан шинонида шуданд
ДАРАХТ БИНШОН! Дар Истаравшан беш аз 250 бех ниҳоли ҳамешасабзи санавбар шинонида шуд
Дар ноҳияи Шамсиддини Шоҳин ниҳолхона ташкил гардид
ДАРАХТ БИНШОН! Дар ноҳияи Ашт маъракаи ниҳолшинонӣ идома дорад
ДАРАХТ БИНШОН! Дар пойгоҳи Қувваҳои ҳарбӣ-ҳавоӣ ва мудофиаи зиддиҳавоӣ ҳашари ниҳолшинонӣ доир шуд