«БИЁ, БО ҲАМ БИХАНДЕМ!». Вазорати фарҳанг таҳти ин унвон Фестивали ҷумҳуриявии телевизионии ҳаҷвнигоронро баргузор менамояд

Февраль 9, 2022 10:58

ДУШАНБЕ, 09.02.2022. /АМИТ «Ховар»/. Вазорати фарҳанги Ҷумҳурии Тоҷикистон бо мақсади ривоҷу равнақ додани фаъолияти гурўҳҳои ҳаҷвнигори шаҳру ноҳияҳои ҷумҳурӣ, пайдо намудани чеҳраҳои нави ҳаҷвнигор, ҷалби ҳарчи бештари мардум ба ҳазлу мутоиба, мусоидат дар фароғату оромиши шаҳрвандон Фестивали ҷумҳуриявии телевизионии ҳаҷвнигоронро  таҳти унвони «Биё, бо ҳам бихандем!» баргузор менамояд, Даври ниҳои он  30-31 март ва гулчини Фестивал 1 апрели соли 2022 дар Филармонияи давлатии Тоҷикистон ба номи Акашариф Ҷўраев баргузор мешавад, хабар доданд ба АМИТ «Ховар» дар  Вазорати фарҳанги мамлакат.

Тибқи иттилои манбаъ, фестивали мазкур дар се давр баргузор гардида, масъулини раёсат, шуъба, бахшҳои фарҳанги Вилояти Мухтори Кўҳистони Бадахшон, вилоятҳои Суғду Хатлон, шаҳри Душанбе ва шаҳру ноҳияҳои тобеи ҷумҳурӣ даври аввали онро моҳи январ дар сатҳи маҳал баргузор намуда, 4 дастаи ҳунарии беҳтаринро ба даври дуюм бо протоколи ҳайати ҳакамон пешниҳод мекунанд. Даври дуюм моҳҳои феврал-март дар маркази минтақаҳои ҷумҳурӣ гузаронида шуда, аз ҳар минтақа 1 дастаи ҳунарӣ ба даври ниҳоӣ роҳхат мегирад. Фестивал аз рўйи 7 номинатсия бо назардошти вақти муайяни давомнокӣ баргузор мегардад: Интермедия (то 4 дақиқа); Аскиягўӣ (то 5 дақиқа); Тақлидкорӣ (то 3 дақиқа); Латифагўӣ (то 8 дақиқа); Суруди ҳаҷвӣ (то 5 дақиқа);  Монологи ҳаҷвӣ (то 4 дақиқа) ва Саҳначаи ҳаҷвӣ (то 7 дақиқа).

Мавзӯъҳо бояд масъалаҳои доғи рўз ва таълиму тарбияи насли наврасро фаро гирифта, ҳазлҳо набояд сабуку коста бошанд. Шумораи аъзои дастаи ҳунарӣ то 10 нафар мебошад. Масъулини дастаҳои ҳунарӣ бояд пеш аз оғози чорабинӣ барнома ва рўйхати иштирокчиёнро ба ҳайати ҳакамон пешниҳод намоянд. Баҳогузорӣ аз 5 то 10 хол аст. Ҳамаи даврҳои Фестивал тавассути шабакаҳои телевизионӣ сабт ва инъикос карда мешаванд.

Дар Фестивал аз рўйи номинатсияҳо чунин мақомҳои ифтихорӣ муқаррар карда шудааст:»Беҳтарин интермедия»; «Беҳтарин аския»; «Беҳтарин тақлидкорӣ»; «Беҳтарин латифа»; «Беҳтарин суруди ҳаҷвӣ»; «Беҳтарин монологи ҳаҷвӣ»; «Беҳтарин саҳначаи ҳаҷвӣ» ва «Иштироки фаъолона».

Ҳамаи иштирокчиён бо Дипломи Барандаи Фестивали ҷумҳуриявии телевизионии ҳаҷвнигорон таҳти унвони «Биё, бо ҳам бихандем!» ва туҳфаҳои хотиравӣ қадршиносӣ мегарданд. Инчунин, аз ҷониби ҳамоҳангсозони Фестивал созмондиҳандагон, иштирокчиёни фаъол, кормандони васоити ахбори омма, муассисаву ташкилотҳо ва шахсони алоҳида тибқи дархост бо мукофоту туҳфаҳои хотиравӣ, аз ҷумла нишонҳои Аълочии фарҳанги Ҷумҳурии Тоҷикистон, Аълочии телевизион ва радиои Тоҷикистон, Ифтихорнома ва Сипоснома сарфароз мегарданд.

Дастгирии иттилоотии фестивалро  АМИТ «Ховар», Телевизиони Тоҷикистон, муассисаҳои давлатии телевизионҳои «Сафина», «Ҷаҳоннамо», «Синамо», «Душанбе», «Шаҳнавоз», рўзномаҳои «Баҳори Аҷам», «Мароми пойтахт», маҷаллаҳои «Тоҷикистон», «Истиқбол», «Хорпуштак», инчунин телевизиону радио ва матбуоти даврии маҳаллӣ ба уҳда доранд.

Февраль 9, 2022 10:58

Хабарҳои дигари ин бахш

АМИТ «Ховар» ва ҶСП «Ширкати байнидавлатии телевизион ва радиои «Мир»» Ёддошти тафоҳум ба имзо расониданд
Дар Душанбе мубодилаи барномаҳои фарҳангӣ ва намоиши филмҳо байни Тоҷикистон ва Чин баргузор гардид
Дар мавзуи ташаккул ва рушди синошиносӣ дар Тоҷикистон конфронси илмӣ доир гардид
Рӯзҳои фарҳанги Ҷумҳурии Тоҷикистон дар Ҷумҳурии Тотористони Федератсияи Русия доир гардид
Ду озмоишгоҳи Институти химияи Академияи миллии илмҳои Тоҷикистон бо технологияи муосир муҷаҳҳаз карда шуд
Рӯзҳои фарҳанги Ҷумҳурии Тоҷикистон дар Федератсияи Русия идома доранд
Ёдгориҳои ёфтшуда аз шаҳристони Ҳулбук арзиши баланди илмӣ дошта, дар байни таҳқиқоти солҳои охир беназир маҳсуб мешаванд
«Шоҳнома»-и Фирдавсӣ бояд машъалафрӯзи ҳар хонадони тоҷик бошад ва анъанаи неки шоҳномасароӣ барқарор шавад
Вобаста ба таъсири зеҳни сунъӣ ба ҳастии инсоният конференсияи ҷумҳуриявӣ баргузор шуд
«ШОҲНОМА — ОРМОНИ МИЛЛӢ». Он мактаби худшиносӣ ва парчами ифтихори миллии мо аст
Ҳамкории Академияи миллии илмҳои Тоҷикистон бо Маркази пажӯҳишӣ ва машваратии TRENDS густариш меёбад
Иштирокдорони Конфронси байналмилалии сатҳи баланд оид ба ҳифзи пиряхҳо аз Чин бо яке аз маконҳои таърихии Тоҷикистон шинос шуданд