Дар Бохтар доир ба пешгирии омилҳои хатарзои террористӣ машварат доир шуд

ДУШАНБЕ, 12.02.2022 /АМИТ «Ховар»/. Дар маркази маъмурии вилояти Хатлон — шаҳри Бохтар дар мавзӯи “Ихтилофи ақидавӣ ва амалии ҳизбу ҳаракатҳои сиёсӣ-динии ифротии муосир бо исломи суннатӣ (мазҳаби ҳанафӣ)”  бо иштироки васеи намояндагони ташкилоту идораҳо ва корхонаву муассисаҳо машваратии вилоятӣ баргузор гардид, хабар доданд дар мақомоти иҷроияи ҳокимияти давлатии шаҳр ба АМИТ “Ховар”. 

Дар машварат муовини Раиси вилояти Хатлон Фирӯза Шарифӣ, муовини аввали сардори Раёсати Кумитаи давлатии амнияти миллии Ҷумҳурии Тоҷикистон дар вилояти Хатлон Фирдавс Холиқзода, диншинос Нуруллоҳ Қамар ва дигар масъулин ширкат доштанд.

Дар оғози ҳамоиш   аз таъриху пайдоиши дину мазҳабҳои мухталиф, ақида ва идеологияҳои гуногун сухан гуфта, чандин масъалаҳои марбут ба дини ислом  мавриди  таҳлилу баррасӣ қарор гирифтанд. Зикр шуд, ки дини мубини ислом тарғибгари дӯстию рафоқат, муҳаббату самимият ва башардӯстию инсонпарварӣ мебошад, аммо мутаассифона, баъзе одамон  ин ҳамаро дуруст сарфаҳм нарафта, дар зери ниқоби ислом ба терроризму экстремизм даст мезананд, ки оқибати хуб ба бор намеоварад.

Иштирокчиён зикр карданд, ки дар шароити имрӯзаи ҷаҳонишавӣ ва бархӯрди тамаддунҳо дилхоҳ давлат эҳтимоли бо хатар рӯ ба рӯ шудан дорад. Норомии   минтақаҳои зиёди олам,  бахусус буҳрони печидаи кишвари ҳамсоя- Афғонистон моро водор месозад, ки  бо иродаи қавӣ ва мустаҳкам марзу буми худро ҳимоя намоем ва ба ҳеҷ  ваҷҳ зиракии сиёсиро аз даст надиҳем. Ба намояндагони ташкилоту идораҳо, аз ҷумла   ходимони дин муроҷиат карда, гуфта шуд, ки нигоҳдории амнияту осудагӣ дар ҷомеа  ва пос доштани хоки ин сарзамин танҳо  вазифаи  мақомоти амнияту ҳифзи ҳуқуқ не, балки бар уҳдаи ҳар фарди ин меҳан мебошад.

Мувоини Раиси вилояти Хатлон Фирӯза Шарифӣ иброз дошт, ки “роҳи тайкардаи кишвари соҳибистиқлоли мо давоми 30 соли гузашта ва ҳамчунин  дастовардҳое, ки  дар ин муддат ба онҳо ноил гаштем, ин нуктаи бисёр муҳимро бори дигар возеҳу равшан собит сохт, ки мардуми тоҷик метавонад дар шароити мураккабу буҳронии ҷаҳони муосир бо нангу номуси ватандорӣ, ҳисси баланди миллӣ ва ифтихору сарфарозӣ Ватани муқаддаси хешро ҳифз кунад, онро боз ҳам обод намояд ва нуфузу обрӯи Тоҷикистони азизро дар арсаи байналмилалӣ баланд бардорад”.

АКС аз манбаъҳои боз