Донишгоҳи байналмилалии сайёҳӣ ва соҳибкории Тоҷикистон дар Суғд ва Хатлон филиалҳо таъсис дод

Февраль 9, 2022 13:44

ДУШАНБЕ, 09.02.2022 /АМИТ «Ховар»/. Донишгоҳи байналмилалии сайёҳӣ ва соҳибкории  Тоҷикистон дар вилоятҳои Суғду Хатлон филиалҳои худро таъсис дод.

Ректори Донишгоҳи байналмилалии сайёҳӣ ва соҳибкории Тоҷикистон Убайдулло Асрорзода имрӯз дар ҷараёни нишасти матбуотӣ ба намояндагони воситаҳои ахбори  омма гуфт, ки ин тадбир бо мақсади  омодасозии  кадрҳои баландихтисос барои соҳаҳои мухталифи иқтисоди миллӣ  бо дарназардошти иқтидор  ва рушди минтақаҳои мамлакат андешида шудааст.

Убайдулло Асрорзода доир ба фаъолияти таълимию тарбиявӣ, илмию байналмилалӣ ва хоҷагидории Донишгоҳи байналмилалии сайёҳӣ ва соҳибкории Тоҷикистон дар соли гузашта гузориш дода, зикр намуд, ки «соли гузашта дар  фаъолияти Донишгоҳ соли дастовард ва муваффақият буд, зеро дар ин сол дар радифи таҷлили 30-солагии ҷашни Истиқлолияти  давлатии Ҷумҳурии Тоҷикистон бо иштироки Асосгузори сулҳу ваҳдати миллӣ- Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  ва Раиси Маҷлиси миллӣ, Раиси шаҳри Душанбе муҳтарам Рустами Эмомалӣ  ду бинои нави таълимӣ дар донишгоҳ ба истифода дода шуд. Маҳз бо ифтитоҳи биноҳои замонавӣ дар донишгоҳ 9 озмоишгоҳи  таълимӣ, китобхонаи илмӣ-электронии муосир, толори маҷлисгоҳ барои 600 нафар, 37 синфхона ва  22 утоқи корӣ ташкил гардид».

«Ҳамзамон бо Қарори Ҳукумати Ҷумҳурии Тоҷикистон  27 январи соли равон ба ин муассисаи олии мамлакат  мақоми Донишгоҳи байналмилалии сайёҳӣ ва соҳибкории Тоҷикистон дода шуд, ки он барои ҳайати устодону донишҷӯёни донишгоҳ ифтихори бузург буда, дар назди роҳбарият ва кулли омӯзгорону донишҷӯён вазифаҳои нав  ва масъулиятнок мегузорад»,-афзуд Ректори Донишгоҳи байналмилалӣ.

Зикр шуд, ки роҳбарият ва ҳайати устодону профессорони донишгоҳ  дар самти баланд бардоштани  сифати таълиму тарбия, ки дар Паёми Пешвои миллат зикр гардида буданд, корҳои  мушаххас анҷом доданд. Ин аст, ки шурӯъ аз соли 2021  ҷараёни баргузории  дарсҳои кушода, иштирок дар дарсҳои ҳамдигар  аз ҷониби бахши  идоракунии сифати  таҳсилот ва  коршиносони  он  таҳти назорати қатъӣ қарор дода шудааст. Ҳамзамон дар ин давра аз ҷониби комиссияи  озмунӣ, ки дар қисми таълимӣ  таъсис дода шудааст, бо омӯзгороне, ки  бори аввал ба кор қабул мегарданд,  суҳбатҳо гузаронида шуда, ҳангоми қабул ба кор ба неруи илмӣ, таҷрибаи педагогӣ, масъулиятнокӣ, тахассуснокӣ ва хоҳиши ба кори илмӣ машғул шудан аҳамияти  ҷиддӣ дода шуд.

Ҳамзамон намояндагони воситаҳои ахбори омма  бо имконияти таҳсил дар Донишгоҳи байналмилалии сайёҳӣ ва соҳибкории Тоҷикистон шинос гардида, аз озмоишгоҳҳои  муҳосибӣ, гумрукӣ, зеҳни сунъӣ, сайёҳӣ, сайёҳии кӯҳӣ,  сервиси сайёҳӣ, меҳмонхонаи таълимӣ, бонки таълимӣ ва китобхонаи илмӣ-электронии Донишгоҳи байналмилалии сайёҳӣ ва соҳибкории Тоҷикистон боздид намуданд.

 

АКСҲО: АМИТ «Ховар».   

Февраль 9, 2022 13:44

Хабарҳои дигари ин бахш

Имрӯз даври ниҳоии Озмуни ҷумҳуриявии «Илм–фурӯғи маърифат» оғоз мегардад
Рӯзи дарҳои кушоди Академияи хурди илмҳои Тоҷикистон баргузор шуд
КИТОБ-МУАРРИФИ ДАСТОВАРДҲОИ АДИБОН. Бардошт аз баргузории Намоишгоҳи байналмилалии «Китоби Душанбе»
Байни «Тоҷикфилм» ва шаш киностудияи кишварҳои ИДМ ва хориҷи наздик Ёддошти тафоҳум ба имзо расид
Намоишгоҳи байналмилалии «Китоби Душанбе» оғоз гардид
Шоҳҷоизаи Синамоҷашнвораи дуюми байналмилалии «Тоҷи Сомон»-ро коргардони тоҷик Муҳиддин Музаффар соҳиб шуд
«КИТОБИ ДУШАНБЕ». Пагоҳ дар Душанбе намоиши сенздаҳуми байналмилалӣ оғоз мегардад
Эмомалӣ Раҳмон: «Таҷлили Меҳргон далели эҳтиром ба фарҳанги қадима ва суннатҳои созандаи миллати тоҷик аст»
Имрӯз дар Фестивали «Оши палов» намудҳои гуногуни ин таоми миллӣ омода карда шуданд
СЕБҲОИ ТОҶИКИСТОН БО ТАМЪИ ЛАЗИЗАШОН МАШҲУРАНД. Дар Душанбе Иди себ ва ангур таҷлил гардид
Дар Душанбе Иди Меҳргон ба таври тантанавӣ таҷлил гардид
Имрӯз ҷашни Меҳргон бо баргузории Фестивал-намоиши маҳсулот ва техникаи кишоварзӣ оғоз мегардад