НИШАСТИ МАТБУОТӢ. Соли гузашта ҳолатҳои қисман риоя нагардидани муқаррароти қонунгузории хизмати давлатӣ мушоҳида шуданд

Февраль 15, 2022 14:43

ДУШАНБЕ, 15.02.2022 /АМИТ «Ховар»/. Соли сипаригардида санҷишҳо дар баъзе аз минтақаҳои мамлакат нишон доданд, ки фаъолияти мақомотро вобаста ба таъмини иҷрои талаботи соҳаи хизмати давлатӣ дар маҷмӯъ қаноатбахш арзёбӣ кардан мумкин аст. Зеро дар онҳо ҳолатҳои қисман риоя нашудани муқаррароти қонунгузории хизмати давлатӣ зимни татбиқи технологияҳои кадрии озмун барои ишғоли мансабҳои холии хизмати давлатӣ, баҳодиҳии фаъолият, аттестатсияи хизматчиёни давлатӣ, ҷойивазкунии (ротатсияи) кадрҳои роҳбарикунандаи хизмати давлатӣ, фаъолияти комиссияҳо оид ба одоби хизматчии давлатӣ, таҳия ва истифодаи дастурамалҳои мансабӣ, риояи талаботи тахассусӣ, пешбурди парвандаҳои шахсии хизматчиёни давлатӣ мушоҳида карда мешавад. Ин матлабро имрӯз зимни нишасти матбуотии Агентии хизмати давлатии назди Президенти Ҷумҳурии Тоҷикистон директори ин ниҳод Ҷумъа Давлатов ба хабарнигорон иброз намуд.

Ба гуфти мавсуф, ҷараёни иҷрои қонунгузории хизмати давлатӣ дар дастгоҳҳои марказии Вазорати нақлиёт, Хадамоти давлатии назорат ва танзим дар соҳаи нақлиёт, Кумитаи давлатии сармоягузорӣ ва идораи амволи давлатӣ, кумитаҳои андоз, ҳифзи муҳити зист ва баъзе сохторҳои маҳаллии онҳо, мақомоти иҷроияи ҳокимияти давлатии вилояти Суғд, шаҳру ноҳияҳои Хуҷанд, Истиқлол, Мастчоҳ, Ҷаббор Расулов, Бохтар, Абдураҳмони Ҷомӣ, Вахш, Восеъ, Дўстӣ, Ёвон, Мўъминобод, Ҷайҳун, Ховалинг, Ванҷ, Дарвоз, Сино, Фирдавсӣ, Турсунзода, Нуробод, Сангвор, Тоҷикобод, Файзобод ва Шаҳринав мавриди санҷиш қарор дода шуд.

«Яке аз омилҳои муҳими интихобу ҷобаҷогузории кадрҳо баргузории озмун барои ишғоли мансабҳои холии маъмурии хизмати давлатӣ ба ҳисоб меравад. Мақомоти давлатии зикршуда дар ин самти фаъолият Низомнома дар бораи тартиби гузаронидани озмун барои ишғоли мансабҳои холии маъмурии хизмати давлатиро, ки бо фармони Президенти Ҷумҳурии Тоҷикистон аз 10 марти соли 2016 тасдиқ карда шудааст, ба асос гирифта бошанд ҳам, зимни татбиқи он ба баъзе камбудиҳо роҳ додаанд», афзуд мавсуф.

Дар ҷараёни нишаст зикр шуд, ки то 1 январи соли 2022 шумораи хизматчиёни давлатии шаҳрвандӣ 18701 нафар, теъдоди занҳо 4518 нафар ё 24,1 фоиз, теъдоди ҷавонони то 35-сола 9128 нафар ё 48,8 фоиз, синни миёнаи хизматчии давлатӣ 37 солро ташкил медиҳад.

Инчунин гуфта шуд, ки Агентии хизмати давлатӣ оид ба масъалаҳои вазъи ҷалби занон ба хизмати давлатӣ, мусоидат ба фарогирии бештари бонувон ба хизмати давлатӣ ва мансабҳои роҳбарикунандаи он мунтазам тадбирҳои мушаххас меандешад. Зеро дар баъзе вазорату идораҳо, мақомоти иҷроияи ҳокимияти давлатии шаҳру ноҳияҳо вобаста ба ҷалби занону духтарон ба хизмати давлатӣ тадбирҳои дахлдор андешида намешаванд.

АКС: АМИТ «Ховар»

Февраль 15, 2022 14:43

Хабарҳои дигари ин бахш

Пешвои миллат: «Ба ҷойи ҳаҷҷу умраи такрорӣ анҷом додани амалҳои дорои садақаи ҷория савоби бамаротиб бештар дорад»
Президенти Тоҷикистон: «Шахсоне, ки имконияти молиявӣ надоранд, набояд ба хотири савоб аз дигарон қарз гирифта, қурбонӣ кунанд»
Аз ифлосшавии ҳавои атмосферӣ эҳтиёт намоед! Аз 6 то 9 июн дар Тоҷикистон чангу ғубор ба амал меояд
Эмомалӣ Раҳмон: «Оростани дастурхони пурдабдаба ва меҳмондории зоҳирпарастонаву намоишкоронаро дини мубини ислом, шариат ва таълимоти мазҳаби ҳанафӣ маҳкум мекунад»
ТОҶИКИСТОН – ВАТАНИ ОРЗУҲОИ ҶАВОНӢ. Дар Душанбе моҳвораи ҷавонон ҷамъбаст гардид
Вобаста ба омилҳои рушди сармояи инсонӣ дар Душанбе конфронс доир гардид
110 нафар соҳиби шаҳодатномаи маҳфили «Пайравони Пешвои миллат» гардиданд
Агентии обуҳавошиносӣ бо таҷҳизоти зарурии техникӣ таъмин мегардад
Падару модар дар таълиму тарбияи кӯдак чӣ ҳуқуқ ва уҳдадорӣ доранд?
Кӯдаконро аз иттилооти ба саломатӣ ва инкишофи онҳо зараровар ҳифз бояд намуд
Ба муносибати Рӯзи байналмилалии ҳифзи ҳуқуқи кӯдак дар боғи «Курӯши Кабир» чорабинии тантанавӣ баргузор шуд
Рӯзи байналмилалии ҳифзи кӯдакон аҳамияти кӯдаконро дар ҳаёт ва ҷомеаи мо ҳамчун узви муҳими ҷомеа таъкид менамояд