ПУТИН ДАР БОРАИ ЭЪТИРОФИ ҶМД ВА ҶМЛ ФАРМОН БА ИМЗО РАСОНИД. Ӯ ба низомиёни Русия супориш дод, ки дар ин ҷумҳуриҳо сулҳро таъмин намоянд

ДУШАНБЕ, 22.02.2022 /АМИТ «Ховар»/. Дирӯз, 21 феврал, Президенти Русия Владимир Путин дар бораи ба расмият шинохтани Ҷумҳурии Мардумии Донетск (ҶМД) ва Ҷумҳурии Мардумии Луганск (ҶМЛ) фармонҳо ба имзо расонид. Фармонҳо дар сомонаи иттилооти ҳуқуқии Русия нашр шудаанд.

Аз фармонҳои Путин бармеояд, ки низомиёни Русия бояд дар қаламрави ҶМД ва ҶМЛ сулҳро таъмин кунанд. Низомиён ин вазифаҳоро то бастани шартномаҳои дӯстӣ, ҳамкорӣ ва ёрии ҳамдигарӣ ба иҷро мерасонанд.

«Вазорати мудофиаи Федератсияи Русия то бастани шартномаи дар банди 3-юми ҳамин фармон зикргардида бояд вазифаи нигоҳ доштани сулҳро дар қаламрави Ҷумҳурии Мардумии Донетск аз ҷониби қувваҳои мусаллаҳи Федератсияи Русия таъмин намояд», — гуфта мешавад дар фармон дар бораи эътирофи ҶМД. Ин гуфтаҳо дар фармон дар бораи эътирофи ҶМЛ низ мавҷуд мебошанд.

Дар ин фармонҳо дар баробари эътирофи соҳибихтиёрӣ ва истиқлолияти ҷумҳуриҳо ҳамчунин ба Вазорати корҳои хориҷии Русия супориш дода шудааст, ки бо «ҷониби Донетск» ва «ҷониби Луганск» доир ба барқарор намудани равобити дипломатӣ гуфтушунид намояд.

Инчунин ба Вазорати корҳои хориҷии Русия супориш дода шудааст, ки бо иштироки мақомоти манфиатдори иҷроия оид ба таҳияи лоиҳаҳои шартномаҳои дӯстӣ, ҳамкорӣ ва ёрии ҳамдигарӣ бо ҶМД ва ҶМЛ гуфтушунид анҷом диҳад.

Қабл аз ин шаби гузашта Владимир Путин ба шаҳрвандони Русия муроҷиат намуда, зимни он изҳор дошт, ки вазъ дар Донбасс хусусияти хатарнок ва тезу тунд гирифтааст. Вай инчунин Украинаро «мустамлика бо низоми лӯхтакмонанд» номида, мақомотро дар фишороварӣ ба аҳолии русу русзабон ва ҷазодиҳии шаҳрвандон айбдор намуд.

«Ман зарур медонам, ки инак тасмими кайҳо гирифта — эътирофи фаврии истиқлол ва соҳибихтиёрии Ҷумҳурии Мардумии Донетск ва Ҷумҳурии Мардумии Луганск қабул карда шавад», — хулоса кард Путин.

Ҳуҷҷатҳоро ҳамчунин роҳбарони ҷумҳуриҳо Денис Пушилин ва Леонид Пасечник имзо карданд.

АКС аз манбаъҳои боз