РОҲИ САФЕД! Миёни Тоҷикистон ва Узбекистон боз як хатсайри нави автобус роҳандозӣ шуд

ДУШАНБЕ, 24.02.2022 /АМИТ «Ховар»/. Шимоли Тоҷикистон ва шарқи Узбекистонро боз як хатсайри байналмилалии автобус ба ҳам пайваст намуд: хатсайри автобус аз шаҳри Хуҷанди вилояти Суғди Ҷумҳурии Тоҷикистон ба шаҳри Қуқанди вилояти Фарғонаи Ҷумҳурии Узбекистон ба роҳ монда шуд. Дар ин бора ба АМИТ «Ховар» дар Ширкати «Asian Express» иттилоъ доданд.

Хатсайри автобусии Хуҷанд-Қуқанд-Хуҷанд тавассути ширкати «Asian Express» ба ҷуз аз рӯзи душанбе ҳар рӯз ҳаракат мекунад. Автобус аз Хуҷанд ба Қуқанд ва баргашта аз он ҳаракат мекунад. Он соати 8-и субҳ аз истгоҳи парки таксиҳои шаҳри Хуҷанд, ки дар қасабаи 16 –ум воқеъ аст, ҳаракат менамояд. Вақти сафар 4 соат буда, нархи роҳкиро 104 сомонӣ (100 ҳазор сум) аст.

Макони ниҳоии хатсайр «Янгибозор» (Бозори нав)-и шаҳри Қуқанд буда, сафари бозгашт ба Хуҷанд бегоҳ соати 20:00 сурат мегирад.

Дар ҳамин ҳол, АМИ «УзА» хабар дод, ки аввалин автобуси сафарӣ аз Хуҷанд ба Қуқанд расид, ки масири он аз гузаргоҳи марзии «Андархон» гузаштааст. Мусофиронро ҳокими ноҳияи Бешариқи вилояти Фарғонаи Узбекистон Расулҷон Ҷӯраев пешвоз гирифта, ба шаҳрвандон роҳи сафеду бехатар таманно намуд.

Дар сурати маъруф шудани хатсайри Хуҷанд — Қуқанд ҳаракати автобусҳоро васеъ кардан мумкин аст.

Ёдовар мешавем, ки қаблан намояндагони Тоҷикистон ва Узбекистон ҷаласаи навбатии комиссияи муштараки ҳамлу нақли байналмилалии автомобилӣ баргузор карданд.

Зимни мулоқот ҷонибҳо оид ба масъалаи аз нав ба роҳ мондани ҳаракати автобусҳо миёни ду кишвар, ки ба далели пандемияи коронавирус мутаваққиф шуда буд, ибрози назар карданд.

Аз моҳи октябри соли сипаригардида ширкатҳои Тоҷикистон ва Узбекистон ҳамарӯза аз Хуҷанд ба шаҳри Тошканди Ҷумҳурии Узбекистон ду сафар ба роҳ мемонанд.

АКС аз манбаъҳои боз