Дастаи мунтахаби олимпии футболи Тоҷикистон дар Туркия ҷамъомади таълимиву тамринӣ мегузаронад

ДУШАНБЕ, 15.03.2022 /АМИТ «Ховар»/. Дастаи мунтахаби олимпии то 23-солаи Тоҷикистон оид ба футбол дар доираи омодагӣ ба марҳилаи ниҳоии Ҷоми Осиё-2022 таҳти роҳбарии сармураббӣ Мубин Эргашев дар Туркия ҷамъомади таълимиву тамринӣ мегузаронад, иттилоъ медиҳад шореҳи варзиши АМИТ «Ховар» бо истинод ба Федератсияи футболи Тоҷикистон.

Дар ҷамъомади таълимиву тамринӣ дар Анталия, ки аз 19 то 31 март баргузор мешавад, дастаи мунтахаби олимпии Тоҷикистон се бозии рафиқона анҷом медиҳад. Аввалин ҳарифи футболбозони тоҷик дастаи мунтахаби олимпии Кувайт мебошад. Вохӯрии дастаҳо 23 март баргузор мешавад.

Дар бозии дуюм дар Анталия дастаи мунтахаби олимпии Тоҷикистон 26 март бо ҳамсолонашон аз Урдун бозӣ мекунад. Шогирдони Мубин Эргашев бозии ниҳоии рафиқонаро 29 март бо дастаи мунтахаби миллии Афғонистон анҷом медиҳанд.

Марҳилаи ниҳоии Ҷоми Осиё-2022 аз 1 то 19 июн дар шаҳри Тошканди Ҷумҳурии Узбекистон баргузор шуда, дастаи мунтахаби олимпии Тоҷикистон дар гурӯҳи «D» баромад мекунад. Ҳарифони дастаи мунтахаби олимпии то 23-солаи Тоҷикистон дастаҳои мунтахаби олимпии Арабистони Саудӣ, Амороти Муттаҳидаи Арабӣ ва Ҷопон мебошанд.

Бозиҳои санҷишӣ

23 март (чоршанбе)

Тоҷикистон (U-23) – Кувайт (U-23)

26 март (шанбе)

Тоҷикистон (U-23) — Урдун (U-23)

29 март (сешанбе)

Тоҷикистон (U-23) – Дастаи мунтахаби Афғонистон

АКС: Федератсияи футболи Тоҷикистон