1 сентябр дар Хуҷанд муассисаи таҳсилоти миёнаи умумии таълимаш бо забони русӣ ба истифода дода мешавад

ДУШАНБЕ, 07.04.2022 /АМИТ «Ховар»/. 1 сентябри соли равон дар маҳаллаи Темурмалики шаҳри Хуҷанд муассисаи таҳсилоти миёнаи умумии таълимаш бо забони русӣ барои 1224 ҷойи нишаст, ки маблағгузори он Федератсияи Русия мебошад, ба истифода дода мешавад. Сохтмони мактаби мазкур дар доираи муносибатҳои дуҷонибаи Ҷумҳурии Тоҷикистон ва Федератсияи Русия дар соҳаи маориф ва илм ба роҳ монда шудааст.

Давоми се соли оянда дар Тоҷикистон панҷ мактаби русӣ ба истифода дода мешаванд. Миёни Ҳукумати Ҷумҳурии Тоҷикистон ва Ҳукумати Федератсияи Русия оид ба сохтмон ва муҷаҳҳазгардонии моддию техникии муассисаҳои таҳсилоти миёнаи умумӣ дар шаҳрҳои Душанбе, Кӯлоб, Хуҷанд, Бохтар ва Турсунзода, ки таҳсилашон ба забони русист, созишнома ба имзо расидааст.

Тавре аз маркази матбуоти Вазорати тандурустӣ ва ҳифзи иҷтимоии аҳолии мамлакат иттилоъ доданд, бо мақсади иҷрои дастуру супоришҳои Пешвои миллат муҳтарам Эмомалӣ Раҳмон  таҳти роҳбарии намояндаи Ҳукумати Ҷумҳурии Тоҷикистон, Вазири тандурустӣ ва ҳифзи иҷтимоии аҳолии кишвар Ҷамолиддин Абдулозода ва Раиси шаҳри Хуҷанд Фирдавс Шарифзода давоми 10 рӯз дар ҷамоату маҳаллаҳои шаҳри мазкур бо мақсади огоҳӣ аз раванди корҳои сохтмонию бунёдкорӣ дар соҳаи маорифи шаҳр ба муносибати 25-солагии Рӯзи Ваҳдати миллӣ ва 30-солагии Иҷлосияи 16-уми Шӯрои Олии Ҷумҳурии Тоҷикистон ва  ҷиҳати бурдани корҳои фаҳмондадиҳӣ бо мардум суҳбату мулоқот доир мешаванд.

Зимни боздид ба Вазири тандурустӣ ва ҳифзи иҷтимоии аҳолӣ иттилоъ дода шуд, ки мактаб аз 3 ошёна ва таҳхона иборат буда, дорои тамоми инфрасохтори таълимӣ мебошад. Дар сохтмони мактаб беш аз 300 нафар сохтмончиёни маҳаллӣ ба кор фаро гирифта шудаанд.

Ҷамолиддин Абдуллозода ба масъулини сохтмон ҷиҳати босифат анҷом додани корҳои сохтмонӣ ва истифодаи васеи маҳсулоти ватанӣ дастуру супоришҳо дод. Ба масъулини соҳаи шаҳрсозӣ дастур дода шуд, ки атрофи бинои таълимиро ба тартиб дароварда, барои тибқи талаботи замони муосир қомат афрохтани иншооти атроф тадбирҳо андешанд.

Вазири тандурустӣ ва ҳифзи иҷтимоии аҳолии мамлакат ва раиси шаҳри Хуҷанд аз ҷараёни сохтмони кӯдакистон дидан намуда, иброз доштанд, ки кӯдакистони бунёдшаванда бо назардошти талаботи замони муосир сохта шуда, дар он беҳтарин шароити тарбияву ба камолрасонии кӯдакон муҳайё карда мешавад.

Бинои кӯдакистони мазкур аз 3 ошёна ва таҳхона иборат буда, дар атрофи он дигар иншооти зарурӣ барои тарбияи кӯдакон бунёд карда мешаванд. Фармоишгари иншоот Мақомоти иҷроияи ҳокимияти давлатии шаҳр буда, пудратчии он ширкати «Сохтмонворидот» мебошад. Баъди истифодаи ин муассисаи таълимӣ беш аз 180 нафар кӯдакон ба тарбия фаро гирифта мешаванд.

Ҳамчунин дар шаҳри Хуҷанд МТМУ №28 бо маблағгузории Мақомоти иҷроияи ҳокимияти давлатии шаҳр бо харҷи 18 миллион сомонӣ сохта мешавад, ки гурӯҳи корӣ аз ҷараёни сохтмони он дидан намуд.

Тибқи лоиҳа, иншоот аз чор ошёна ва таҳхона иборат буда, дорои 23 синфхона ва дигар иншооти ёрирасон мебошад. Фармоишгари иншооти сохташаванда Идораи сохтмони асосии шаҳри Хуҷанд, пудратчӣ Ҷамъияти дорои масъулияти маҳдуди «Сохтмонворидот» ва лоиҳакаш КФД «Суғдшаҳровар» мебошад. Мактаб барои 1280 нафар хонанда дар ду баст пешбинӣ шудааст. Алҳол дар иншооти номбурда то 100 нафар сохтмончиёни маҳаллӣ фаъолият доранд.

Ёдовар мешавем, ки бо Амри Президенти Ҷумҳурии Тоҷикистон муҳтарам Эмомалӣ Раҳмон  аз 30 марти соли 2022  бо мақсади иҷрои дастуру супоришҳои Асосгузори сулҳу ваҳдати миллӣ -Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, ки  дар маҷлиси Ҳукумати Ҷумҳурии Тоҷикистон дода буданд, намояндагони Ҳукумати Ҷумҳурии Тоҷикистон ва Дастгоҳи иҷроияи Президенти Ҷумҳурии Тоҷикистон аз 2 то 10 апрели соли равон ба  вилоятҳо ва шаҳру ноҳияҳо сафарбар гардидаанд.

АКСҲО: Вазорати тандурустӣ ва ҳифзи иҷтимоии аҳолии ҶТ