«Амонатбонк» ва БАТР дурнамои тавсеаи ҳамкориро баррасӣ карданд

ДУШАНБЕ, 01.04.2022 /АМИТ «Ховар»/. Вазъи бахши молиявии Бонки давлатии амонатгузории Ҷумҳурии Тоҷикистон «Амонатбонк»  бо дарназардошти таъсири пандемия ва дигар омилҳои берунии вазъи ҷаҳон дар мулоқоти Раиси Раёсати Бонки давлатии амонатгузории Ҷумҳурии Тоҷикистон «Амонатбонк» Сироҷиддин Икромӣ бо ҳайати  расмии Бонки Аврупоии Таҷдид ва Рушд /БАТР/  таҳти роҳбарии директори Институти молиявии БАТР оид ба кишварҳои Осиёи Марказӣ Ҷорҷ Орлов  дар Душанбе баррасӣ гардид.

АМИТ «Ховар» бо истинод ба БДА Ҷумҳурии Тоҷикистон «Амонатбонк» хабар медиҳад, ки  дар мулоқот мусоҳибон атрофи тақвияти ҳамкории «Амонатбонк» ва БАТР  ибрози назар намуданд.

Дар ҷараёни мулоқот Раиси Раёсати «Амонатбонк» Сироҷидин Икромӣ рӯнамои фаъолияти молиявии  «Амонатбонк»-ро пешкаши ҳайати Бонки Аврупоии Таҷдид ва Рушд намуд.

Директори Институти молиявии БАТР оид ба кишварҳои Осиёи Марказӣ Ҷорҷ Орлов ба фаъолияти БДА Ҷумҳурии  Тоҷикистон «Амонатбонк» ҳамчун бонки давлатӣ баҳои баланд дода, омодагии худро ҷиҳати густариши ҳамкории мутақобилан судманд баён намуд.

АКСҲО: БДА ҶТ «Амонатбонк»