Дар Истанбул гардиши савдо ва раванди ҷалби сармояи мустақими туркиро ба Тоҷикистон баррасӣ намуданд
ДУШАНБЕ, 11.04.2022 /АМИТ «Ховар/. 8 апрел дар Истанбул вохӯрии Сафири Ҷумҳурии Тоҷикистон дар Туркия Ашрафҷон Гулов бо Президенти Шӯрои робитаҳои иқтисоди хориҷии Туркия (DEIK) Наил Олпак баргузор гардид. Дар ин бора хабарнигори АМИТ «Ховар» дар Туркия Манижа МАҚСУДОВА хабар медиҳад.
Зимни вохурӣ ҷонибҳо вазъи кунунии ҳамкории иқтисодӣ байни ду кишвар, пеш аз ҳама, гардиши савдо ва раванди ҷалби сармояи мустақими туркиро ба Тоҷикистон, иқдомҳои Ҳукумати Ҷумҳурии Тоҷикистон вобаста ба эълон гардидани солҳои 2022–2026 Солҳои рушди саноатро мавриди муҳокима қарор доданд.
Мувофиқаҳо ҳосил гардиданд, ки ҷиҳати рушди ҳамкорӣ миёни бахши хусусии ду кишвар, аз ҷумла дар соҳаи бонкдорӣ ва энергетика форумҳои сармоягузорию тиҷоратӣ давоми соли ҷорӣ ташкил карда мешаванд.
Ёдовар мешавем, ки 17 ноябри соли 2021 дар Анқара бо ташаббуси Сафорати Ҷумҳурии Тоҷикистон дар Туркия ҷаласаи корӣ ҷиҳати пайгирии мувофиқаҳои ҷаласаи 11-уми Комиссияи байниҳукуматии Тоҷикистон ва Туркия оид ба ҳамкории иқтисодӣ ва дарёфти роҳҳои саривақтӣ ва самараноки татбиқи нақшаи амали муштараки он баргузор гардид.
Дар кори ҷаласа муовини Вазири саноат ва технологияҳои Туркия Четин Алӣ Донмез ва муовини Вазири саноат ва технологияҳои нави Тоҷикистон Умедҷон Солеҳзода иштирок намуданд.
Дар кори ҷаласаи мазкур инчунин масъулини вазорату идораҳо ва намояндагиҳои дипломатии ду кишвар дар шакли маҷозию ҳузурӣ иштирок намудаанд.
Зимни мулоқот иштирокчиён роҳҳои татбиқи бандҳои дахлдори нақшаи амали зикршуда вобаста ба масъалаҳои мубрами ҳамкории дуҷониба, аз ҷумла дар соҳаҳои тиҷорат ва сармоягузорӣ, нақлиёт, саноат, маориф ва илм, кишоварзӣ, муҳоҷират, энергетика, тандурустӣ, фарҳанг ва сайёҳӣ, инчунин санадҳои дар доираи ҷаласаи Комиссия ва Форуми саноатӣ-иқтисодии Тоҷикистон ва Туркия имзошударо баррасӣ карданд.
Дар маҷмӯъ, вохӯрӣ дар фазои ҳамдигарфаҳмӣ ва ҳусни тафоҳум доир гардида, байни ҷонибҳо мусоҳибаи созанда барои дарёфти роҳҳои нави ҳамкории тиҷоратию иқтисодӣ ва омодагӣ ба ташкили ҷаласаи навбатии Комиссия дар шаҳри Анқара дар соли 2022 сурат гирифт.
АКСҲО: Сафорати Ҷумҳурии Тоҷикистон дар Туркия
Ҳайати Тоҷикистон дар намоишгоҳи «Ҳафтаи байналмилалии сабз» дар шаҳри Берлини Олмон иштирок дорад
ФЕСТИВАЛИ АНОРПАРВАРОН. Чӣ бояд кард, то дар бозорҳо анори тоҷикӣ фаровон гардад?
Фурудгоҳҳои байналмилалии Душанбе, Бохтар ва Кӯлоб навсозӣ мешаванд
Ҳамкории Тоҷикистон ва Покистон дар соҳаҳои иқтисоду тиҷорат густариш меёбад
Данғара – Гулистон — аввалин роҳи мошингарди Тоҷикистон, ки бо тарҳи «роҳҳои сабз» навсозӣ мешавад
Беш аз 22 фоиз сармоягузории ба рушди Шабакаи нақлиётии АвруОсиё равонашуда ба кишварҳои Осиёи Марказӣ рост меояд
«ТОҶИКИСТОН-2026». Дар Душанбе Намоишгоҳи байналмилалии универсалӣ доир мегардад
Ҳамкории Тоҷикистон бо Иттиҳоди Аврупо дар соҳаи энергетика ва захираҳои об густариш меёбад
Татбиқи лоиҳаҳои сармоягузорӣ дар самти энергияи барқароршаванда байни Тоҷикистон ва Ҳиндустон баррасӣ шуд
ИСЛОҲОТ ДАР НИЗОМИ ИҶОЗАТДИҲӢ. Тоҷикистон фазои маъмуриро барои соҳибкорону сармоягузорон мусоидтар намуд
Дар Тоҷикистон кадом бахши кишоварзӣ аз андоз аз арзиши иловашуда ва боҷи гумрукӣ пурра озод мебошад?
Лоиҳаи «Барномаи давлатии рушди инноватсионии соҳаи пахтакорӣ барои солҳои 2026-2030» таҳия мегардад
