ХУРОФОТ ҶАҲОЛАТ АСТ. Дар ҷамоатҳои шаҳри Исфара бо сокинон оид ба хатари таассуб мулоқот доир шуд

Апрель 22, 2022 10:50

ДУШАНБЕ, 22.04.2022 /АМИТ «Ховар»/. Бо ташаббуси Ҳаракати ваҳдати миллӣ ва эҳёи Тоҷикистон дар вилояти Суғд доир ба оқибатҳои ногувори таассубу хурофотпарастӣ ва омилҳои пешгирии он дар ҷомеа силсиламулоқот баргузор гардид, ки он аз Конибодом оғоз шуда, дар ҷамоатҳои шаҳри Исфара анҷом пазируфт. Дар ин бора ба АМИТ «Ховар» дар Кумитаи иҷроияи Ҳаракати ваҳдати миллӣ ва эҳёи Тоҷикистон хабар доданд.

Дар ҳамоиши илмиву маърифатие, ки бо иштироки фаъолони се ҷамоат — Ворух, Сурх ва Чоркӯҳ баргузор гардид, мушовири калони бахши Ёрдамчии Президенти Ҷумҳурии Тоҷикистон оид ба масъалаҳои рушди иҷтимоӣ ва робита бо ҷомеа Нурулло Оқилзода аз Паёми Президенти Ҷумҳурии Тоҷикистон ба Маҷлиси Олии мамлакат ёдовар шуда, гуфт, ки «дар шароити пурҳассос ва равандҳои пуртазоди ҷаҳони муосир доштани сулҳу оромӣ ва ҳифзи ваҳдати милливу якпорчагии Ватан кори саҳлу осон набуда, пеш аз ҳама, бояд ҷавонону наврасон, падарону модарон, аҳли илму маориф ва зиёиён дар канори Пешвои миллат муҳтарам Эмомалӣ Раҳмон истода, дар роҳи решакан намудани ифротгароиву хурофотпарастӣ дар зеҳну замири ҷавонон қадамҳои устувор гузорем».

Раиси Кумитаи иҷроияи Ҳаракати ваҳдати миллӣ ва эҳёи Тоҷикистон Рудобаи Мукаррам бо ёдоварӣ аз Паёми Президенти Ҷумҳурии Тоҷикистон иброз дошт, ки муҳтаво ва мазмуни вожаи хурофот ва ё хурофотпарастӣ пайравии кӯр-кӯрона аз ақоиди беасос ва дур аз воқеият аст. Маҳз барои ҳамин Президенти мамлакат барҳақ таъкид намуданд, ки «хурофот ҷаҳолат аст».

Мавсуф бо пайравӣ аз ҳидоятҳои хирадмандонаи Пешвои миллат муҳтарам Эмомалӣ Раҳмон халқи шарифи Исфара, бахусус сокинони ҷамоатҳои Сурх, Ворух ва Чоркӯҳро ба таҳаммулпазирӣ, муроот, хештандорӣ, ҳамдигарфаҳмӣ, иттиҳоду ҳамбастагӣ, мубориза бо падидаҳои номатлуби ҷаҳони муосир, аз ҷумла ифротгароӣ, даҳшатафканӣ, хурофотпарастӣ ва ҷудоихоҳӣ даъват намуд.


Раиси Шӯрои уламои Маркази исломии Ҷумҳурии Тоҷикистон Саидмукаррам Абдуқодирзода изҳор намуд, ки то замоне, ки хурофотро аз ҷаҳонбинии ҷавонон ва дар маҷмӯъ тамоми қишрҳои ҷомеа ба таври куллӣ берун насозем, ноил гардидан ба дастовардҳои назаррас дар арсаҳои мухталифи илму техника ғайиимкон аст. Аммо чӣ гуна бояд нагузорем, ки ҷавонони мо хурофотзада бошанд? Ин як роҳ дорад ва он ҳам дар Паёми Президенти Тоҷикистон садо дод: «Бинобар ин, падару модарон бояд шароит муҳайё созанд, ки наврасону ҷавонон, чӣ духтару чӣ писар бояд хонанд, илму дониш ва касбу ҳунар омӯзанд».

Аз ҷониби худ муовини Раиси Кумитаи дин, танзими анъана ва ҷашну маросим дар Ҷумҳурии Тоҷикистон Абдураҳмон Ваҳҳобзода иброз намуд, «замони он расидааст, ки тамоми унсурҳои хурофотии боқимонда дар зеҳни мардум, ки мисли заҳри қотил ба ақлу рӯҳи бархе аз гурӯҳҳои ноогоҳ печидаанд, решакан карда шаванд».

Дар ҳошияи вохӯриҳо намояндагон ва фаъолони ҷомеаи шаҳрвандии ҷамоатҳои Сурх, Чоркӯҳ ва Ворухи Исфара аз сиёсати оқилонаи давлат ва Ҳукумати Ҷумҳурии Тоҷикистон дар қиболи муборизаи беамон ба муқобили хурофотпарастӣ, ифротгароӣ ва бегонапарастиву зиёдаравӣ дифоъ намуда, ҳар яке мавқеи созандаи худро дар роҳи ҳифзи истиқлолу озодӣ ва таҳкими Ваҳдати миллӣ дар Тоҷикистон баён доштанд.

АКСҲО: Кумитаи иҷроияи Ҳаракати ваҳдати миллӣ ва эҳёи Тоҷикистон

Апрель 22, 2022 10:50

Хабарҳои дигари ин бахш

Дар ноҳияи Кӯшониён пули дарозиаш 85-метра ба истифода дода шуд
Корҳои кашидани хатти оби нушокӣ аз деҳаи Калтачинор ба маркази ноҳияи Балҷувон оғоз гардиданд
Ба Тоҷикистон беш аз 200 ҳазор воя ваксинаи намуди «Pfizer» ворид карда шуд
Ҳайати Тоҷикистон дар ҷаласаи коршиносони байналмилалӣ дар Истанбул иштирок намуд
«МАКТАБИ СИЁСИИ ПЕШВОИ МИЛЛАТ». Назаре ба кори Конференсияи байналмилалии илмию амалӣ бахшида ба 25-солагии Ваҳдати миллӣ
Шабнам Раҳимзода, муовини якуми Раиси Кумитаи кор бо ҷавонон ва варзиш: «Ваҳдати миллӣ табассуми гумшудаи модари тоҷикро дубора баргардонд»
Раиси КИ ҲХДТ дар ноҳияи Фирдавсӣ: «Аз заиф будани ваҳдати миллӣ дар Афғонистон зиёда аз чор даҳсола аст, ки онҳо ба сулҳу субот намерасанд»
АГЕНТИИ ОБУҲАВОШИНОСӢ ХАБАР МЕДИҲАД: Аз 27 то 30 июн дар Тоҷикистон ҳарорати рӯзонаи ҳаво баланд мешавад
Дар шаҳри Гулистон таҳти унвони «Эмомалӣ Раҳмон – меъмори давлати миллии тоҷикон» конференсия доир шуд
«Ба қадри сулҳу оромии Тоҷикистон бирасем!»,- бардошт аз конференсия дар Кумитаи забон ва истилоҳот
ҲХДТ бахшида ба 25-солагии Рўзи Ваҳдати миллӣ дар Бохтар Конфронси байналмилалии илмӣ-амалӣ доир намуд
Дар Душанбе Фестивал-намоиши «Таомҳои миллӣ» баргузор гардид