Татбиқи «Барномаи рушди нақлиёти барқӣ дар Ҷумҳурии Тоҷикистон барои солҳои 2022-2026» истифодаи электромобилҳоро афзоиш медиҳад

Апрель 27, 2022 11:30

ДУШАНБЕ, 27.04.2022. /АМИТ «Ховар»/. Тавре қаблан иттилоъ додем, аз ҷониби Вазорати нақлиёт Лоиҳаи «Барномаи рушди нақлиёти барқӣ дар Ҷумҳурии Тоҷикистон барои солҳои 2022-2026» таҳия гардида, 1 апрели соли 2022 барои баррасию мувофиқа ба вазорату идораҳои дахлдор равон гардид. Вазорату идораҳои марбута хулосаҳояшонро оид ба ин лоиҳа  ба вазорати нақлиёт пешниҳод намуданд. АМИТ «Ховар» бо истинод ба Вазорати нақлиёти мамлакат хабар медиҳад, ки бо дарназардошти пешниҳодот ба лоиҳа тағйирот ворид гардида, он  аз ҷониби Комиссияи байниидоравии машваратӣ дар соҳаи нақлиёти автомобилӣ бори дигар мавриди баррасӣ қарор мегирад.

-Таҳияи «Барномаи рушди нақлиёти барқӣ дар Ҷумҳурии Тоҷикистон барои солҳои 2022-2026» аз Паёми Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба Маҷлиси Олии мамлакат сарчашма мегирад. Барнома аз 9 боб иборат буда,  ҳадафи асосии он-  фароҳам овардани самти нави рушди иқтисодӣ дар заминаи ташаккули саноати мошинсозӣ- истеҳсоли нақлиёти барқӣ, муҳайё намудани шароити мусоид барои зиёд кардани нақлиёти барқии истифодашаванда, васеъ намудани инфрасохтори нақлиёти барқӣ ва кам кардани таъсири манфӣ ба муҳити зист мебошад,- гуфт Вазири нақлиёти кишвар Азим Иброҳим.

Мавриди зикр аст, ки Тоҷикистон миёни кишварҳои ИДМ  неруи барқи аз лиҳози экологӣ тоза ва арзон истеҳсол мекунад. Аз ин рӯ, истифодаи нақлиёти барқӣ дар ҷумҳурӣ  аз ҳар ҷиҳат мувофиқу самараноктар аст. Махсусан дар замони болоравии арзиши сӯзишворӣ, ки дар як соли охир таъсири бади худро ба тамоми самту соҳаҳо расонидааст. Истифодаи электромобилҳо на танҳо аз лиҳози иқтисодӣ фоидаовар аст, балки аз лиҳози экологӣ низ хеле муфид буда,  вобастагии мамлакатро  аз як қатор маҳсулоти воридотӣ коҳиш медиҳад.

Ёдовар мешавем, ки 10 январи соли равон бори аввал дар шаҳри Душанбе аз ҷониби ширкати «Як таксӣ»  8 адад электромобили тамғаи Volkswagen Е- Lavada мавриди истифода қарор дода шуд. Иттилоъ дода шуд,  ки  рӯзҳои наздик боз 100 адад мошини дигар вориди пойтахт гарданд. Дар ин рӯз 8 адад воситаҳои нақлиёти мазкур дар кӯчаҳои шаҳри Душанбе ба фаъолият шурӯъ намуданд.

Нақлиёти мазкур аз лиҳози самаранокии иқтисодӣ вобаста ба арзиши истифодаи қувваи барқ дар муқоиса бо воситаҳои нақлиётие, ки дигар намуди сӯзишвориро истифода менамоянд, бартарӣ дорад. Тибқи таҳлилҳои мутахассисон, дар як сол хароҷоти истифодаи қувваи барқ дар электробус ва электромобилҳо 27,5 фоизи хароҷоти нақлиёти бо дигар намуди сӯзишвориҳо фаъолияткунандаро ташкил медиҳад.

Хизматрасониҳои техникӣ ва нигоҳдории электромобилҳо дар муқоиса бо нақлиёти бо дигар намуди сӯзишворӣ фаъолияткунанда арзиши камтарин талаб намуда, ҳангоми истифода ва ё хизматрасонӣ ба мусофирон дар шаҳр, интиқолдиҳии бемамониат сатҳи пасти садо ва сафари бароҳатро барои мусофирон муҳайё менамояд.

Зимни ба истифода додани электромобилҳо  муовини Раиси шаҳри Душанбе Фирдавс Саидзода иброз дошт, ки рушди босуботи иҷтимоию иқтисодии шаҳри Душанбе талаботи навро нисбат ба тамомои соҳаҳо, аз ҷумла, соҳаи нақлиёти мусофирбарӣ пеш оварда, имкон медиҳад, ки дар оянда ҷиҳати бештар намудани вазъи соҳа ва амалисозии ҳадафҳои стратегӣ дар доираи Барномаи мақсадноки давлатии рушди комплекси нақлиёти Ҷумҳурии Тоҷикистон то соли 2025 ва барномаи  «Шаҳри сабз» тадбирҳои судманд андешида шаванд.

-Дар чаҳорчӯби  барномаи  “Шаҳри сабз” мақомоти шаҳри  Душанбе 104 адад троллейбуси бесим (15 километр), якчанд автобуси барқӣ ва як троллейбуси барқии бидуни тамос (40 километр) харидорӣ кард, ки онҳо  дар реҷаи санҷишӣ кор мекунанд, -афзуд Фирдавс Саидзода.

Тавре раиси кумитаи Маҷлиси намояндагони Маҷлиси Олии Ҷумҳурии Тоҷикистон оид ба иқтисод ва молия Файзулло Машраб изҳор дошт «дар Кодекси нави андоз омадааст, шаҳрвандоне, ки аз электромобил истифода мебаранд, нисбат ба истифодабарандагони автомобил андози камтар месупоранд, ки ин як роҳи ҳавасмандкунии аҳолӣ дар роҳи рушди электромобил мебошад. Ман боварии комил дорам, ки ба хотири рушди ин самт дар ҷумҳурӣ имтиёзу қонунгузориҳои мусоид пешниҳод карда мешаванд».

                                                                                                       Рухсораи НУР,
АМИТ «Ховар»

АКС аз АМИТ «Ховар» ва манбаъҳои боз

 

Апрель 27, 2022 11:30

Хабарҳои дигари ин бахш

Масъалаи кушодани парвозҳо дар масири Душанбе-Пекин ва Душанбе-Сиян баррасӣ шуд
Ҳамкории Тоҷикистон бо Фонди кувайтии рушди иқтисодиёти Араб баррасӣ шуд
Дар Тоҷикистон беш аз 3 ҳазор тонна маҳсулоти макаронӣ истеҳсол гардидааст
Муовини Сарвазири Тоҷикистон дар ноҳияи Мастчоҳ бо ҳолати заминҳои кишоварзӣ ва вазъи обрасонӣ шинос шуд
Дар ноҳияи Ҷаббор Расулов 9 анбор барои захираи пиёз фаъолият доранд
Байни Тоҷикистон ва Корея оид ба рушди соҳаи геология Ёддошти тафоҳум ба имзо расид
Душанбе мизбони Шурои байниҳукуматии Лоиҳаи минтақавии «CASA-1000» мегардад
Аз вилояти Хатлон беш аз 200 тонна маҳсулоти кишоварзӣ содирот гардид
«INFOCM 2025». Намояндагони Тоҷикистон дар Форуми байналмилалӣ оид ба минералҳои муҳим иштирок доранд
«Тамғаи писандидаи Тоҷикистон-2025». Дар Душанбе намоиш-фурӯши молу маҳсулоти ватанӣ баргузор мегардад
Дар Хуҷанд Намоишгоҳи байналмилалии савдо «Суғд-2025» доир мегардад
Дар Тоҷикистон ҳаҷми истеҳсоли қолин афзоиш ёфтааст