Дар Бадахшон бо хатмкардагони курси омӯзишии дуалии «Зан — сарвар» мулоқот доир шуд

Май 11, 2022 15:22

ДУШАНБЕ, 11.05.2022 /АМИТ «Ховар»/. Дар шаҳри Хоруғ бо ташаббуси Академияи идоракунии давлатии назди Президенти Ҷумҳурии Тоҷикистон бо хатмкардагони курси омӯзишии дуалии «Зан — сарвар» ва зинаи магистратураи хизмати давлатии Академияи идоракунии давлатии назди Президенти Ҷумҳурии Тоҷикистон аз мақомоти иҷроияи ҳокимияти давлатии ВМКБ вохӯрӣ баргузор гардид, хабар доданд аз Академияи мазкур ба АМИТ «Ховар».

Дар вохӯрӣ Ректори Академияи идоракунии давлатии назди Президенти Ҷумҳурии Тоҷикистон, доктори илмҳои ҳуқуқшиносӣ, профессор Абдухалил Ғафурзода, Раиси Вилояти Мухтори Кӯҳистони Бадахшон Алишер Мирзонабот, ноиби ректор оид ба робитаҳои байналмилалӣ Сомон Исматзода, намояндагони Агентии хизмати давлатии назди Президенти Ҷумҳурии Тоҷикистон, устодону кормандони Академия ва дастгоҳи раиси ВМКБ иштирок намуданд.

Ректори Академия Абдухалил Ғафурзода иброз дошт, ки «Президенти Ҷумҳурии Тоҷикистон муҳтарам Эмомалӣ Раҳмон сиёсати давлатии ҷавононро аз рӯзҳои аввали соҳибистиқлолӣ дар маркази таваҷҷуҳи худ қарор дода, пайваста дархосту пишниҳодҳои ин қишри ояндасози ҷомеаро дастгирӣ менамоянд. Ҳадафи сиёсати пешгирифтаи Пешвои миллат ва Ҳукумати кишвар дар бахши ҷавонон тарбияи кадрҳою мутахассисони ватандӯсту донишманд ва дорои ҷаҳонбинии васеъ мебошад. Ташаккули маърифати сиёсӣ моро водор месозад, ки ба ҳар падидаву ҳаводисе, ки дар кишварамон ва минтақаҳои мухталифи олам ба вуқӯъ меояд, баҳои воқеӣ дода, мавқеи худ ва кишвари худро дар онҳо дақиқ муайян намоем. Ташкили курсҳои омӯзишии дуалӣ ва курсҳои такмили ихтисос барои хизматчиёни давлатӣ аз ҷумлаи тадбирҳоест, ки баҳри татбиқи сиёсати ҷавонпарварони Пешвои миллат муҳтарам Эмомалӣ Раҳмон дар Академияи идоракунии давлатии назди Президенти Ҷумҳурии Тоҷикистон роҳандозӣ мегардад».

Алишер Мирзонабот зикр кард, ки «сиёсати давлатии ҷавонон дар Вилояти Мухтори Кӯҳистони Бадахшон дар қатори дигар манотиқи кишвар дар тӯли 30 соли Истиқлоли давлатӣ таҳти таваҷҷуҳи бевоситаи Пешвои миллат муҳтарам Эмомалӣ Раҳмон қарор дошта, бо кумаку дастгириҳои бевоситаи Ҳукумати кишвар чандин иншооти соҳавӣ дар шаҳру навоҳии вилоят ба истифода дода шуданд. Аз бунбасти коммуникатсионӣ раҳо намудани вилоят барои қишри ҷавон имконият фароҳам овард, ки бобати рушду ривоҷи соҳаҳои гуногуни вилоят камари ҳиммат банданд. Нисфи зиёди соҳибкорону кормандони муваффақи вилоятро имрӯз ҷавонон ташкил дода, дар соҳаи хизмати давлатӣ ва мақомоти намояндагӣ дар аксарияти вазифаҳо кадрҳои ҷавону соҳибтаҷриба фаъолият менамоянд».

Дар ҳамоиш зиёда аз 90 нафар хатмкардагони курси омӯзишии дуалӣ аз рӯи барномаи «Зан – сарвар» ва зинаи магистратураи Академия аз мақомоти иҷроияи ҳокимияти давлатии ВМКБ ва шаҳру ноҳияҳои тобеи он иштирок доштанд.

Зикр шуд, ки ҷавонони вилоят сиёсати пешгирифтаи Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмонро хуб дарк карда, дар маъракаҳои муҳими сиёсӣ фаъолона иштирок намуда, омодаанд, ки бо тамоми неру аз дастовардҳои соҳибистиқлолӣ, арзишҳои волои миллӣ, номусу шараф ва хоки муқаддаси Ватан дифоъ намоянд.

АКС: Академияи идоракунии давлатӣ

Май 11, 2022 15:22

Хабарҳои дигари ин бахш

КӢ ХОДИМИ ДИН ШУДА НАМЕТАВОНАД. Парлумони Тоҷикистон ба қонун дар бораи озодии виҷдон ва иттиҳодияҳои динӣ тағйирот ворид намуд
Наврасони Хоруғ ба лагери дараи Ромити шаҳри Ваҳдат раҳсипор гардиданд
Дар Душанбе «Барномаи давлатии рушди ғизои мактабӣ дар Ҷумҳурии Тоҷикистон барои солҳои 2022-2027» муаррифӣ шуд
13 деҳаи ноҳияи Файзобод бо фарогирии 19717 нафар аҳолӣ бо оби тозаи нӯшокӣ таъмин карда мешаванд
Музаффар Ашуриён дар Форуми 10-уми байналмилалии ҳуқуқӣ дар Санкт-Петербург иштирок дорад
Омӯзгорону касбомӯзони «Маркази таълими калонсолони Тоҷикистон» барои ҳайати Узбекистон дарси маҳорат гузарониданд
Дар Ҷамоати деҳоти Ворухи Исфара пас аз офати табиӣ дастрасӣ ба оби нӯшокӣ ва полезӣ таъмин гардид
МОҲИ ИЮЛ ТОҶИКИСТОНИЁНРО ЧӢ ГУНА ҲАВО ИНТИЗОР АСТ? Ба ин суоли АМИТ «Ховар» муовини Директори Агентии обуҳавошиносӣ Ҷамила Байдуллоева посух дод
ЭҲТИЁТ ШАВЕД, «ЧИЛЛА»-И ТОБИСТОН! Дар Тоҷикистон ин рӯзҳо ҳарорати ҳаво то ба 45 дараҷа мерасад
Дар ноҳияи Кӯшониён пули дарозиаш 85-метра ба истифода дода шуд
Корҳои кашидани хатти оби нушокӣ аз деҳаи Калтачинор ба маркази ноҳияи Балҷувон оғоз гардиданд
Ба Тоҷикистон беш аз 200 ҳазор воя ваксинаи намуди «Pfizer» ворид карда шуд