Дар Душанбе ҷаласаи навбатии Комиссияи муштараки байниҳукуматии Тоҷикистон ва Узбекистон оид ба ҳамкории тиҷоратию иқтисодӣ баргузор шуд

Май 30, 2022 18:36

ДУШАНБЕ, 30.05.2022 /АМИТ «Ховар»/. Имрӯз дар шаҳри Душанбе ҷаласаи навбатии Комиссияи муштараки байниҳукуматии Тоҷикистон ва Узбекистон оид ба ҳамкории тиҷоратию иқтисодӣ баргузор шуд, хабар медиҳад АМИТ «Ховар».

Ҷиҳати иштирок дар ҷаласаи Комиссия Сарвазири Ҷумҳурии Узбекистон Абдулло Орипов имрӯз ба Душанбе ташриф овард.

Дар фурудгоҳи байналмилалии Душанбе меҳмони олиқадрро Сарвазири Ҷумҳурии Тоҷикистон ва дигар шахсони расмӣ истиқбол гирифтанд.

Дар доираи ҷаласа мулоқоти Сарвазири Ҷумҳурии Тоҷикистон Қоҳир Расулзода бо Сарвазири Ҷумҳурии Узбекистон Абдулло Орипов баргузор гардид.


Дар мулоқот вазъ ва дурнамои ҳамкории байниҳукуматии Тоҷикистон ва Узбекистон дар соҳаҳои мавриди таваҷҷуҳи тарафҳо ва масоили рӯзномаи ҷаласаи навбатии Комиссия баррасӣ шуд.


Сипас таҳти раёсати Қоҳир Расулзода ва Абдулло Орипов бо иштироки ҳайатҳои ду ҷониб ҷаласаи нуҳуми Комиссияи муштаракии байниҳукуматии Ҷумҳурии Тоҷикистон ва Ҷумҳурии Узбекистон оид ба ҳамкории тиҷоратию иқтисодӣ баргузор гардид.

Баъд аз баррасии масъалаи рафти иҷрои қарорҳои ҷаласаи ҳаштуми Комиссия дар идомаи ҷаласаи нуҳум масоили рушди минбаъдаи ҳамкории байниҳукуматии Тоҷикистон ва Узбекистон дар соҳаҳои иқтисоду тиҷорат, саноат, сармоягузорӣ ва фаъолияти бонкӣ, нақлиёт, обу энергетика, кишоварзӣ, гумрук, маориф ва илм, фарҳанг, тандурустӣ ва дорусозӣ, сайёҳӣ, ҷавонон ва варзиш, муҳоҷират ва шуғли аҳолӣ, экология ва ҳифзи муҳити зист мавриди баррасӣ қарор дода шуд.


Ҳайатҳо ҳамчунин доир ба муҳимтарин масоили ҳамкории минтақавӣ табодули афкор намуданд.

Тавре таъкид гардид, дар заминаи таваҷчуҳ ва дастгириҳои пайвастаи Сарони давлатҳо муҳтарам Эмомалӣ Раҳмон ва муҳтарам Шавкат Мирзиёев муносибатҳои байнидавлатии Тоҷикистон ва Узбекистон дар тамоми соҳаҳо рушди бемайлон пайдо намуда, натиҷаҳо дар тамоми самтҳои ҳамкорӣ назаррас мебошанд.

Дар соли 2021 гардиши молу маҳсулот байни Тоҷикистон ва Узбекистон 447,8 миллионро ташкил дод, ки нисбат ба соли 2020 34,2 фоиз зиёд мебошад. Ин нишониҳанда дар солҳои охир балантарин арзёбӣ гардида, нисбат ба соли 2015 37 маротиба зиёд мебошад.

Дар ҷаласа ҷонибҳо барои боз ҳам баланд бардоштани нишондиҳандаҳои гардиши молу маҳсулот байни ду давлат ва рушди муносибатҳо дар ҳама соҳаҳои мавриди таваҷҷуҳ ҳавасмандӣ зоҳир намуданд.

Дар охири кори ҷаласа санади ниҳоӣ ба имзо расид.

Қарор дода шуд, ки ҷаласи навбатии Комиссия соли 2023 дар шаҳри Тошканд баргузор карда шавад.


Дар ҳошияи баргузории ҷаласаи нуҳум Сарвазири Ҷумҳурии Узбекистон бо фаъолияти Корхонаи истеҳсоли обҳои ташнашикан ва маҳсулоти машруботии «Сиёма» шинос шуд.

Таъкид гардид, ки дар корхонаи мазкур қариб 20 намуд обҳои рангаи ташнашикани бегаз ва газдор, инчунин машруботи спиртӣ истеҳсол карда мешавад.

Истеҳсоли обҳои хуштаъми сиёма кола, сиёма афлесун ва сиёма нок дар зарфҳои пластикӣ ба роҳ монда шуда, намуди зоҳирӣ ва сифати онҳо ҷавобгӯ ба талаботи стандартҳои ҷаҳонӣ мебошад.


Ҳайати меҳмонон ба шароити корӣ, хатҳои нави истеҳсолот ва банду басти обҳои ташнашикан шинос шуда, ҷиҳати дар оянда ба роҳ мондани ҳамкории тиҷроратӣ изҳори ҳавасмандӣ намуданд.

Ҳамзамон ҳайати Ҷумҳурии Узбекистон аз Қасри теннис ва маҷмааи варзиши обии шаҳри Душанбе боздид ба амал овард.

Мавриди зикр аст, ки Қасри теннис ва маҷмааи варзиши обӣ калонтарин иншооти варзишӣ дар Ҷумҳурии Тоҷикистон ба шумор рафта, он бо тарҳи муосир бунёд гардидааст.


Иншооти варзишӣ бо дастгирии бевоситаи Пешвои миллат Президенти Ҷумҳурии Тоҷикистон муҳтарам Эмомалӣ Раҳмон сохта шуда, дорои ду ҳавзи шиноварӣ – яке нимпӯшида ва дигаре болопӯшида мебошад. Ҳамзамон аз як толори тенниси универсалӣ иборат аст, ки он барои баргузор намудани мусобиқаҳои ҷумҳуриявӣ, минтақавӣ ва байналмилалӣ пешбинӣ шудааст.

Меҳмонон зимни шиносоӣ аз Қасри теннис ва маҷмааи варзиши обӣ ба марҳилаи нави рушд расондани ҳамкориро дар соҳаи варзиш афзалиятнок ва манфиатовар арзёбӣ намуданд.

АКС: АМИТ «Ховар»

Май 30, 2022 18:36

Хабарҳои дигари ин бахш

Дар Душанбе оғози Даҳсолаи байналмилалии амал оид ба илмҳои яхшиносӣ (криосферӣ), солҳои 2025-2034 баррасӣ гардид
Дастовардҳои Тоҷикистон дар Форуми иқтисоди рақамии Созмони ҳамкории Шанхай-2025 муаррифӣ гардид
Дар ноҳияи Данғара корхонаи истеҳсоли маҳсулоти саноатӣ сохта мешавад
Имсол дар Бадахшон 45 корхонаву коргоҳҳои саноатӣ ба фаъолият оғоз намуд
Ҳайати Тоҷикистон дар ҷаласаи маҳдуди сатҳи вазирони иқтисоди СҲШ дар Чин иштирок намуд
Иттиҳоди Аврупо дар Тоҷикистон лоиҳаҳои соҳаи энергетикаро амалӣ менамояд
Дар Вазорати рушди иқтисод ва савдои Тоҷикистон татбиқи ташаббуси ҷаҳонии «Global Gateway» баррасӣ гардид
ДАРАИ АЛМОСӢ. Аз ҷониби ҷомеаи ҷаҳонӣ ҳамчун мавзеи беназири таърихии кишоварзӣ этироф гардид
Дараи Алмосии шаҳри Ҳисор расман ба феҳристи «Низоми мероси кишоварзии дорои аҳамияти ҷаҳонӣ» ворид карда шуд
Дар Бонки миллӣ бо ҳайати Дафтари Швейтсария оид ба ҳамкорӣ дар Ҷумҳурии Тоҷикистон вохӯрӣ доир гардид
Дар Хатлон масъалаи таъсиси корхонаи саноатии батареяҳои офтобӣ баррасӣ гардид
Имсол аз Тоҷикистон беш аз 90 ҳазор тонна маҳсулоти кишоварзӣ содирот гардидааст