Дар шаҳри Хоруғ анбори маҳсулоти ғайриозуқаворӣ ифтитоҳ шуд

Май 17, 2022 13:01

ДУШАНБЕ, 17.05.2022 /АМИТ «Ховар»/. 16 май дар шаҳри Хоруғ маросими ифтитоҳи анбори маҳсулоти ғайриозуқаворӣ барои аҳолие, ки дар ноҳияҳои сарҳадии Вилояти Мухтори Кӯҳистони Бадахшон зиндагӣ мекунанд ва эҳтимол дар офатҳои табиӣ зарар бинанд, доир шуд, хабар медиҳад АМИТ «Ховар» бо истинод ба Кумитаи ҳолатҳои фавқулода ва мудофиаи гражданӣ.

Дар маросими ифтитоҳ раиси Кумитаи ҳолатҳои фавқулода ва мудофиаи гражданӣ, генерал-полковники милитсия Рустам Назарзода, ҳамчунин Намояндаи доимии Созмони Милали Муттаҳид дар Ҷумҳурии Тоҷикистон Ленни Монтиел, Сафири Фавқулода ва Мухтори Ҷопон дар Ҷумҳурии Тоҷикистон  Тошихиро Аики, раиси ВМКБ Алишер Мирзонабот, раиси шаҳри Хоруғ Ризо Назарзода, роҳбарон ва намояндагони ташкилоти  байналмилалии муқими Тоҷикистон иштирок намуданд.

Ин анбор дар доираи ҳамкории байналмилалӣ дар самти коҳиши хатари офатҳои табиӣ ва татбиқи лоиҳаи «Таҳкими зарфияти коҳиши хатари офатҳо ва эътино» миёни Кумита, Сафорати Ҷопон дар Ҷумҳурии Тоҷикистон ва Барномаи Рушди СММ сохта шуд.

Рустам Назарзода зикр кард, ки «ин дуюмин анборест, ки дар қаламрави кишвари мо бунёд ёфтааст. Тамоми талошҳои Ҳукумати кишвар барои расонидани кумаки саривақтӣ ба аҳолии ниёзманд нигаронида шудаанд».

Намояндаи доимии Созмони Милали Муттаҳид дар Тоҷикистон  Ленни Монтиел ва Сафири Фавқулода ва Мухтори Ҷопон дар Ҷумҳурии Тоҷикистон Тошихиро Аики изҳор доштанд, ки ҳамкориро дар самти пешгирӣ ва рафъи оқибатҳои офатҳои табиӣ идома хоҳанд дод.

Анбор имкон медиҳад дар сурати рӯй додани офати табиӣ ва ё дигар ҳолати фавқулода ба одамоне, ки хонаю амволи худро аз даст медиҳанд, кумаки фаврӣ расонида шавад. Интиқоли ҳар гуна ёриҳои аввалиндараҷа дар сурати вуқӯи ин ё он ҳодиса аз ҷойи дигар мушкил ва вақти зиёд мехоҳад. Аммо мавҷудияти чунин анбори эҳтиётӣ то ҳадде ин мушкилро осон месозад. Дар анбор кулли лавозимоти зарурии мавриди ниёзи аввал, аз ҷумла бастаҳои беҳдоштӣ, зарфҳои обгириву ғизопазӣ, косаву табақҳо, болишту кӯрпаву кӯрпачаҳо ва лавозимоти ошхона нигаҳдорӣ мешаванд.

Дар умум 60 номгӯй лавозимоти зарурии мавриди ниёзи аввал барои 150 оила дар ин анбор ҷо дода шудааст, ки 60% он барои кӯдакону наврасон мебошанд.

Ҳамчунин дар чаҳорчӯби ин чорабинӣ аз ҷониби Агентии Оғохон оид ба муҳити зист лоиҳаи бунёди паноҳгоҳи муваққатӣ барои зарардидагони эҳтимолии офатҳои табиӣ муаррифӣ гардид.

Мувофиқи лоиҳа, сохтмон бояд моҳи майи соли оянда анҷом ёбад. Ин панҷумин паноҳгоҳи муваққатӣ хоҳад буд, ки дар минтақаҳои махсусан хавфнок аз офати табиии ҳудуди кишвари мо сохта мешавад. Лоиҳа аз ҷониби Иттиҳоди Аврупо маблағгузорӣ мешавад.

Акс: КҲФ ва МГ

Май 17, 2022 13:01

Хабарҳои дигари ин бахш

Ҷавонон бояд қарзи шаҳрвандӣ — таҳсили илму дониш ва саҳмгузорӣ дар пешрафти Ватанро софдилона иҷро намоянд
Тоҷикистон дар мубориза бо қочоқ ва муомилоти ғайриқонунии маводи нашъаовар нақши калидӣ дорад
Ҳайати Тоҷикистон дар чорабиниҳои канорӣ дар доираи иҷлосияи 67-уми Комиссияи Созмони Милали Муттаҳид оид ба воситаҳои нашъадор иштирок намуд
Дар Вена ҳамкории Тоҷикистон бо Чин ва Эрон дар мубориза бо муомилоти ғайриқонунии маводи нашъадор баррасӣ шуд
Ҷаласаи гурӯҳҳои кории ҳайатҳои ҳукуматии Ҷумҳурии Тоҷикистон ва Ҷумҳурии Қирғизистон баргузор гардид
Ҳайати Тоҷикистон дар чорабинии канории Қазоқистон дар Вена иштирок намуд
Дар Вена оид ба сиёсати зиддимухаддиротии Ҷумҳурии Тоҷикистон маълумот дода шуд
Мулоқоти ҳамраисони ҳайатҳои ҳукуматии Тоҷикистон ва Қирғизистон оид ба делимитатсия ва демаркатсияи сарҳади давлатӣ доир гардид
Тарбияи ватандӯстӣ — омили муттаҳидии миллат дар мубориза бар зидди ифротгароӣ ва хурофотпарастӣ
Ҳайати Тоҷикистон дар иҷлосияи 67-уми Комиссияи Созмони Милали Муттаҳид оид ба воситаҳои нашъадор дар Вена иштирок дорад
14 МАРТ-ИДИ КАСБИИ КОРМАНДОНИ ПРОКУРАТУРА. Давоми 32 сол фаъолияти ин ниҳоди давлатӣ ба таври назаррас тақвият ёфт
Эмомалӣ Раҳмон: «Хурофот хатарест, ки ба имрӯзу ояндаи Тоҷикистон ва минтақа таҳдиди ҷиддӣ дорад»