«ПЕШВОИ МИЛЛАТ — ТАШАББУСКОРИ ҲАДАФҲОИ ҶАҲОНИИ РУШДИ УСТУВОР ДАР СОҲАИ ОБ». Таҳти ин унвон дар Душанбе конференсия доир шуд

Май 6, 2022 10:44

ДУШАНБЕ, 06.05.2022. /АМИТ «Ховар»/. 5 май бо ташаббуси Кумитаи иҷроияи Ҳизби Халқии Демократии Тоҷикистон дар шаҳри Душанбе Конференсияи илмӣ-назариявӣ таҳти унвони «Пешвои миллат — ташаббускори ҳадафҳои ҷаҳонии рушди устувор дар соҳаи об» баргузор гардид, хабар доданд ба АМИТ «Ховар» дар КИМ Ҳизби Халқии Демократии Тоҷикистон.

Дар конференсияи илмӣ- назариявӣ роҳбарияти Кумитаи Иҷроияи Марказии Ҳизби Халқии Демократии Тоҷикистон, Кумитаи иҷроияи ҲХДТ дар шаҳри Душанбе, Академияи миллии илмҳои Тоҷикистон, Муассисаи давлатии илмии «Маркази омӯзиши пиряхҳо»-и Академияи миллии илмҳои Тоҷикистон, Институти масъалаҳои об, гидроэнергетика ва экологияи Академияи миллии илмҳои Тоҷикистон, Вазорати энергетика ва захираҳои оби Ҷумҳурии Тоҷикистон, кормандону масъулини сохторҳои ҳизбии шаҳри Душанбе, раисони кумитаву ташкилоти ибтидоии ҳизбии пойтахт, вакилони маҷлиси вакилони халқи шаҳриву ноҳиявӣ, олимону муҳаққиқон, коршиносону мутахассисон ва намояндагони воситаҳои ахбори омма иштирок намуданд.

Ҳамоиши илмиро раиси Кумитаи иҷроияи ҲХДТ дар шаҳри Душанбе Иброҳим Мирзозода ифтитоҳ намуда, иброз дошт, ки “ҳадаф аз баргузории конференсияи имрӯза- ин таблиғу ташвиқи ташаббуси байналмилалии Тоҷикистон оид ба Даҳсолаи байналмилалии амал “Об барои рушди устувор, солҳои 2018-2028” ва дар амал татбиқ намудани Барномаи пешазинтихоботии Ҳизби Халқии Демократии Тоҷикистон барои солҳои 2020-2025 мебошад”.

Муовини Раиси Ҳизби Халқии Демократии Тоҷикистон Хайринисо Юсуфӣ зикр кард, ки «23 сол муқаддам, яъне 1 октябри соли 1999  Пешвои миллат муҳтарам Эмомалӣ Раҳмон зимни суханронии худ дар Иҷлосияи 54-уми Маҷмааи Умумии Созмони Милали Муттаҳид иброз дошта буданд, ки бояд таваҷҷуҳи ҷомеаи ҷаҳонӣ ба масоили оби тоза равона гардад ва дар ин самт ташаббусҳои ҷиддиро рӯйи даст гирад».


«Аз ин ҷост, ки дар ин самт муҳтарам Эмомалӣ Раҳмон муаллифи чор ташаббуси байналмилалӣ: «Соли байналмилалии оби тоза, 2003», Даҳсолаи байналмилалии амал «Об барои ҳаёт, 2005 – 2015», «Соли байналмилалии ҳамкорӣ дар соҳаи об, 2013» ва ниҳоят Даҳсолаи байналмилалии амал «Об барои рушди устувор, 2018 – 2028», ки он дар ҷараёни татбиқ қарор дорад, мебошад»,-афзуд Хайринисо Юсуфӣ.

Президенти Академияи миллии илмҳои Тоҷикистон Фарҳод Раҳимӣ гуфт, ки “бо дарназардошти боз ҳам афзудани сатҳи нуфус ва аҳолии рӯйи Замин зарурати ҷустуҷӯ намудани роҳҳои нави коркард ва истеҳсоли об ба миён омадааст. Тағйири иқлим ва буҳронҳои экологӣ аз зумраи мушкилиҳое мебошанд, ки мамлакати мо дар ҳалли онҳо дар симои Сарвари давлат ҷойгоҳи соҳибнуфуз пайдо намудааст”.

Фарҳод Раҳимӣ ташаббусҳои Президенти мамлакат муҳтарам Эмомалӣ Раҳмонро дар мавриди пешгирии норасоии об дар сайёра ибтикори ҷаҳонӣ номида, иброз дошт, ки айни замон башар дар пешорӯи ин мушкилӣ қарор дорад. Ӯ роҳҳои таваҷҷуҳ ва баррасии обро дар тафаккури ориёҳои аҳди бостон ҷустуҷӯ карда, зикр намуд, ки ҳанӯз дар китоби «Авасто» ҷиҳати истифода ва коркарди об афкори густурдае баён гардида буд. Президенти АМИТ дар ин самт ду омилро асосӣ муаррифӣ намуд: яке авзои тағйирёбандаи глобалии иқлим ва дигар- истифодаи омилони об дар асри ҳозира.

Сипас директори Муассисаи давлатии илмии «Маркази омўзиши пиряхҳо»-и Академияи миллии илмҳои Тоҷикистон Абдуҳамид Қаюмов дар мавзӯи   «Тоҷикистон — пешоҳанги масоили ҳифзи пиряхҳо дар ҷаҳон», директори Институти масъалаҳои об, гидроэнергетика ва экологияи Академияи миллии илмҳои Тоҷикистон Ориф Амирзода  дар бораи  «Тоҷикистон – сарчашмаи обҳои мусаффо» ва сардори Раёсати захираҳои оби Вазорати энергетика ва захираҳои оби Ҷумҳурии Тоҷикистон Тағоймурод Ғафурзода  доир ба  «Нақши Президенти Ҷумҳурии Тоҷикистон дар пешбурди ташаббусҳои глобалӣ дар соҳаи об” маърӯза  карданд.

Об- асоси ҳаёт буда, он на танҳо барои ташнагишиканӣ ва нигоҳ доштани саломатӣ зарур аст. Захираҳои об ҳамчунин аз нуқтаи назари шуғл аҳамияти бузург доранд, ки дар навбати худ ба рушди иқтисодӣ, иҷтимоӣ ва инсонӣ мусоидат мекунанд. «Аз ин рӯ, ташаббусҳои ҷаҳонии Президенти мамлакатамон, Пешвои миллат муҳтарам Эмомалӣ Раҳмон дар соҳаи об аз ҷониби Созмони Милали Муттаҳид ва ҷомеаи ҷаҳонӣ ҳамчун ташаббусҳои муҳим ва мубрами замони муосир дастгирӣ ёфтанд. Аз соли 2000 инҷониб дар асоси ташаббусҳои Сарвари давлатамон Маҷмаи Умумии СММ 7 қатънома қабул намуд, ки ба ҳалли масъалаҳои об нигаронида шудаанд»,-иброз доштанд  нотиқон  дар конференсия.

Ҳамзамон дар заминаи ин конференсия аз ҷониби намояндагии Ташкилоти ҷамъиятиии ҷавонон “Созандагони Ватан” дар шаҳри Душанбе аксияи умумишаҳрӣ бо дастрас намудани тақвиму варақаҳои иттилоотӣ дар кӯчаи хиёбонҳои марказии пойтахт ташкил ва баргузор карда шуд.

Ёдовар мешавем, ки аз 6 то 9 июни соли 2022 дар шаҳри Душанбе Конфронси дуюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» таҳти унвони «Такон бахшидан ба амалҳо ва шарикӣ дар соҳаи об дар сатҳҳои маҳаллӣ, миллӣ, минтақавӣ ва ҷаҳонӣ» баргузор мешавад. Конфронс бо ташаббуси Ҳукумати Ҷумҳурии Тоҷикистон дар ҳамкорӣ бо Созмони Милали Муттаҳид ва дигар шарикон баргузор шуда, ҳамчун пайванди марказӣ ба Конфронси СММ оид ба баррасии миёнамуҳлати Даҳсолаи об, ки 22-24 марти 2023 дар Ню Йорк таҳти раёсати Тоҷикистон ва Нидерланд баргузор мешавад, хидмат хоҳад кард.

АКС: Кумитаи Иҷроияи Марказии Ҳизби Халқии Демократии Тоҷикистон

Май 6, 2022 10:44

Хабарҳои дигари ин бахш

ХАБАРИ ХУШ! Номинатсияи муштараки Тоҷикистон «Кирмакпарварӣ ва истеҳсоли анъанавии абрешим барои бофандагӣ» ба Феҳристи мероси фарҳанги ғайримоддии башарият ворид шуд
НАРХИ ТУХМИ МУРҒ БА ЧӢ ВОБАСТА АСТ? Ба ин савол муовини якуми Вазири кишоварзии Тоҷикистон Музаффар Мирзозода посух дод
ЭҲТИЁТ ШАВЕД! Коронавирус дар Осиёи Марказӣ боз хуруҷ кард
БЛОГ ЧИСТ ВА БЛОГЕР КИСТ? Назари коршиносон оид ба танзими муносибатҳо дар фаъолияти корбарони интернетӣ
ДИҚҚАТ, ЭҲТИЁТ НАМОЕД! Миқёси маҳдудият дар Чин бар асари афзоиши COVID рекордӣ шудааст
ПАРЧАМИ ДАВЛАТӢ БАРОИ ШУМО ЧИСТ? Бо ин суол хабарнигорони АМИТ «Ховар» ба роҳбарони вазорату идораҳо ва намояндагони касбу кори гуногун муроҷеъ шуданд
ДИРАФШИ КОВИЁН. Аз қадим то имрӯз тоҷикон парчамро ҳамчун рамзи Истиқлолу Ваҳдати халқ ва Пойдории давлатдории миллӣ истифода мебаранд
ҲАДИСИ МУСАВВАР. Пешвои миллат Эмомалӣ Раҳмон ба сокинони кишвар муҳаббати ҳақиқӣ ва эҳтироми амиқ ба Парчами давлатии Тоҷикистони соҳибистиқлолро талқин намуданд
Пешвои миллат Эмомалӣ Раҳмон: «Мардуми Тоҷикистон, хусусан наврасону ҷавонон аз рӯзи қабули Парчами миллӣ ҳамеша ба он эҳтиром мегузоранд»
ПАРЧАМ- РАМЗИ ИТТИҲОД ВА ҲАМБАСТАГӢ. Дар Осорхонаи миллӣ конфронси илмӣ-назариявии ҷумҳуриявӣ баргузор гардид
ТАЪРИХИ ПАРЧАМЕ, КИ ДАР ИҶЛОСИЯИ ШЎРОИ ОЛӢ ҲАМАРО САРҶАМЪ НАМУД. Онро Комбинати абрешими шаҳри Хуҷанд омода карда буд
«ПАРЧАМИ МО ХУД САРИ БОЛОИ МИЛЛАТ ГАШТААСТ…». Дар нашриёти «Ирфон» ба бузургдошти ливои Ватан ҳамоиши тантанавӣ доир шуд