ТАВАҶҶУҲ! ДАР РУСИЯ — МАВҶИ НОАЁНИ COVID-19. Шумораи гирифторони коронавирус дар ҷаҳон аз 514 миллион нафар гузашт

Май 4, 2022 11:12

ДУШАНБЕ, 04.05.2022 /АМИТ «Ховар»/. Иммунолог, директори генералии ширкати тадқиқотии шартномавии Русия «КЭГ», доктори илмҳои тиб Николай Крючков изҳор дошт, ки ҳоло дар Русия мавҷи ноаёни COVID-19 ҷараён дорад. Тавре АМИТ «Ховар» хабар медиҳад, гуфтаҳои ӯро URA.RU иқтибос овардааст.

Ба андешаи ӯ, афзоиши сироятёбӣ аз коронавирус дар Русия ба далели лағви тадбирҳои маҳдудкунанда ва коҳиши сатҳи ваксиназанӣ сурат гирифтааст. «Ҳоло мавҷи ноаёни COVID ҷараён дорад. Инҳо он мавҷҳое нестанд, ки дар давраи «омикрон» ва «делта» буданд. Мо аллакай дар шаҳрҳои бузург мушоҳида мекунем ва ба фикри ман, он нимаи дуюми моҳи апрел оғоз ёфт», — гуфт ӯ ва тахмин кард, ки он метавонад то моҳи июн коҳиш ёбад.

Крючков ин гуна ноустувориҳоро табиӣ номид. «Вақте мегӯем, ки дар мо ваксинатсия нест, тадбирҳо бекор карда мешаванд, ҳамаи ин барои ба осонӣ паҳн шудани сироятҳо шароит фароҳам меорад. Сироят тавре рафтор намекунад, ки муътадил шавад ва ҳама моҳҳо якхела бошад. Чунин намешавад. Бар асари омилҳои гуногун нишондиҳандаҳо тағйир меёбанд», — шарҳ дод ӯ. Иммунолог бар ин назар аст, ки одати пӯшидани ниқобҳо дар ҷойҳои ҷамъиятӣ бояд баргардонида шавад.

Бино ба иттилои Вазорати тандурустии Федератсияи Русия, 2 май дар ин кишвар 5466 ҳолати нави гирифторӣ ба COVID-19 ошкор шудааст. Аз ин шумора 1441 нафар дар беморхона бистарӣ шудаанд, ки нисбат ба рӯзи гузашта (1152 нафар) 25 фоиз зиёд аст. 7052 нафар шифо ёфта, аз беморхона рухсат шудаанд.

Дар ҳамин ҳол, то субҳи 4 май дар ҷаҳон шумораи гирифторони коронавирус беш аз 514 миллион нафар ва шумораи умумии фавтидагон зиёда аз 6,26 миллион нафарро ташкил дод. Дар ин бора АМИТ «Ховар» бо истинод ба хадамоти матбуоти Ташкилоти умумиҷаҳонии тандурустӣ (ТУТ) хабар медиҳад.

Ба ТУТ дар бораи 514 685 574 ҳолати сироятёбӣ ва 6 265 896 ҳолати фавт маълумот расидааст. Теъдоди гирифторон дар як шабонарӯз 595 340 нафар ва фавтидагон 1 862 нафар афзоиш ёфтааст.

Омори ТУТ танҳо маълумоти расман аз ҷониби давлатҳо тасдиқшударо дар бораи ҳолатҳо ва фавтҳо сабт мекунад.

ИМА аз рӯи шумораи ҳолатҳои тасдиқшуда дар ҷои аввал қарор дорад — 83 240 101 нафар. Баъд аз он Ҳиндустон (43 088 401), Бразилия (30 482 429), Фаронса (28 757 765), Олмон (24 949 403) ва Британияи Кабир (22 073 858) ҷойгир мебошанд.

Дар ИМА 1 021 581 ҳолати фавт, дар Бразилия — 663 765 ва дар Ҳиндустон — 523 920 ҳолат ба қайд гирифта шудааст. Дар Русия 376 292 нафар ва дар Мексика 324 350 нафар фавтидаанд.

Ёдовар мешавем, ки дар Тоҷикистон 3 ҳолати охири сирояти коронавирус моҳи феврали соли ҷорӣ ба қайд гирифта шуда буд. Аз оғози бақайдгирии COVID-19 то имрӯз дар маҷмӯъ 17388 нафар сироят ёфта, 17249 нафар (99,2%) аз ин беморӣ шифо ёфтаанд. Илова бар ин, то имрӯз 124 нафар шаҳрвандони кишвар бар асари ин беморӣ фавтидаанд.

АКС аз манбаъҳои боз

Май 4, 2022 11:12

Хабарҳои дигари ин бахш

ТАШАККУЛИ МАКТАБИ ЗЕҲНГАРОЁНАИ ИДОРАКУНӢ ДАР СИЁСАТИ ҶУМҲУРИИ ТОҶИКИСТОН. Мулоҳизаҳои докторони илми фалсафа Хайриддин Усмонзода ва Саидмурод Фаттоҳзода
Президенти Тоҷикистон: «Сарфакорона истифода бурдани обу неруи барқро дар тамоми фаслҳои сол, ҳатто дар тобистон қатъиян таъмин намоем»
Президенти Тоҷикистон: «Бояд ҳамеша сарҷамъ ва дар зери парчами миллиамон муттаҳид бошем»
ХАЙРУ САДАҚОТ – СУННАТИ НЕК. Андешаҳои вакили Маҷлиси намояндагон Файзулло Баротзода дар ин мавзуъ
Эмомалӣ Раҳмон: «Ба ҷойи намоишкориву исрофкорӣ мо бояд кӯшиш кунем, ки барои таълиму тарбияи фарзандонамон шароити беҳтарин муҳайё созем»
Сарвари давлат сокинони Тоҷикистонро ба роҳ надодан ба зиёдаравию исрофкорӣ ва намоишкориву риёкорӣ даъват намуданд
Эмомалӣ Раҳмон: «Анҷом додани хайру садақот ва саховат кардан анъана ва суннати нек мебошад»
МУҲАББАТ БА ВАТАН АЗ ИМОН АСТ. Андешаҳои раиси Шурои уламои Маркази исломии Ҷумҳурии Тоҷикистон Саидмукаррам Абдулқодирзода
МАЪРИФАТИ ҲУҚУҚӢ-МАСЪАЛАИ МУҲИМИ ЗАМОНИ МУОСИР. Андешаҳои профессор Махфират Хидирзода дар ин мавзуъ
Профессор Мурод Муродӣ: «Барои ислом худнамоӣ ва шуҳратпарастӣ бегона аст, мусулмони ҳақиқӣ амали хайрашро пинҳонӣ ба анҷом мерасонад»
Президенти Тоҷикистон: «Ҷашни Наврӯз ва истиқлолу озодӣ – ин ду мафҳуми барои ҳар яки мо азизу муқаддас аст»
«КАЪБА ЧӢ МЕРАВӢ, ДИЛЕРО ДАРЁБ…». Андешаҳо дар ҳошияи мулоқоти Президенти Тоҷикистон бо фаъолону намояндагони ҷомеа ва ходимони дин