Меҳмонон ва иштирокдорони Конфронси байналмилалии Душанбе аз НБО-и «Норак» дидан намуданд

Июнь 9, 2022 15:23

ДУШАНБЕ, 09.06.2022 /АМИТ «Ховар»/. Меҳмонон ва иштирокдорони Конфронси дуюми байналмилалии сатҳи баланд бахшида ба Даҳсолаи байналмилалии амал «Об барои рушди устувор, солҳои 2018-2028», ки аз 6 то 9 июни соли равон дар Душанбе баргузор гардид, имрӯз аз яке аз иншооти муҳими стратегии Тоҷикистон — Неругоҳи барқи обии «Норак» дар ҷануби кишвар дидан намуданд.

Меҳмонон ва иштирокдорони Конфронси байналмилалии Душанберо дар даромадгоҳи шаҳри Норак сокинон бо нону намак, рақсу тарона ва бо меҳмоннавозии хоссаи тоҷикона пешвоз гирифтанд. Онҳоро раиси шаҳри Норак Дилшод Асозода ба шаҳри энергетикҳо хайрамақдам гуфт.

Меҳмонон ва иштирокдорони конфронс бо фаъолияти ин неругоҳи азим шинос шуда, аз обанбори Норак, агрегатҳо ва Осорхонаи ин иншооти бузурги гидроэнергетикӣ дидан намуданд. Сармуҳандиси НБО-и «Норак» Маҳмадамин Маҳмадсаидзода ба меҳмонон доир ба таърих ва фаъолияти неругоҳ маълумот дод.

Номбурда зикр кард, ки агрегати якуми НБО-и «Норак» 50 сол муқаддам —  соли 1972  ба истифода дода шуда, моҳи декабри соли 1979 агрегати охирини неругоҳ барои истеҳсоли неруи барқ мавриди истифода қарор гирифт.

Иттилоъ дода шуд, ки дар натиҷаи сохтмони неругоҳ обанбори Норак ба вуҷуд омад, ки масоҳаташ 98 км мураббаъ, ҳаҷмаш 10,5 миллиард метри мукааб буда, 4,5 миллиарди мукааб оби обанбор ҳамчун оби тоза истифода бурда мешавад. Дарозии обанбор  70 км, бараш то 1 км, жарфияташ ба ҳисоби миёна 107 метрро ташкил медиҳад. Аз тарафи чап нақби обқабулкунак ва аз самти  рост нақби обпарто мавҷуд аст.

Зикр гардид,  ки дар бунёди ин  иншооти бузурги стратегию энергетикӣ  намояндагони 50 халқу миллатҳои гуногуни  ҷаҳон саҳм гузоштаанд. Неругоҳи Норак бо истеҳсоли неруи барқи аз лиҳози экологӣ тоза барои пешрафти саноати кишвар заминаи мусоид фароҳам овард. Корхонаҳои бузурги саноатии Тоҷикистон-заводи алюминийи тоҷик, комбинати кимиёвии Ёвон ба кор даромаданд, ҳазорон гектар заминҳои ташналабу бекорхобида дар Ёвону Данғара шодоб ва ба қитъаҳои сабзу хуррами ҳосилхез табдил ёфтанд.

Гуфта шуд, ки неругоҳ дар як соат се ҳазор мегаватт неруи барқ   ва дар як шабонарӯз  41,5 миллион кВт соат неруи барқ истеҳсол намуда,  дорои 9 агрегат аст, ки ҳоло 8-тоаш фаъолият доранд. Дар як агрегат корҳои навсозӣ идома дошта, дар мавриди ба кор андохтани он  дар маҷмӯъ дар як соат  3350 мегаватт неруи барқ  тавлид мегардад.

Таъкид гардид, ки солҳои қабл НБО –и «Норак» беш аз 75 фоизи аҳолии кишварро бо неруи барқ таъмин мекард. Баъди ба истифода додани силсиланеругоҳҳо дар дарёи Вахш, аз қабили НБО-и  «Сангтӯда-1», «Сангтӯда-2» ва агрегати якуму дуюми НБО-и  «Роғун» ҳоло  беш аз 55 фоизи аҳолии Тоҷикистон аз НБО-и  «Норак» бо неруи барқи аз лиҳози экологӣ тоза таъмин мегарданд.Сарбанди НБО-и  «Норак» 300 метр буда, бо истифода аз қуму шағал сохта шудааст ва дар асоси сертификатҳое, ки аз ҷониби созмонҳои бонуфузи байналмилалӣ дода шудаанд, яке аз сарбандҳои бехатар ва амн дар ҷаҳон маҳсуб мешавад.

Мавриди зикр аст, ки  обанбори  калони неругоҳ  барои рушди  сайёҳӣ имконияти васеъ фароҳам овардааст. Дар  поёни неругоҳ, қад-қади соҳилҳои дарёи Вахш тӯли солҳои соҳибистиқлолии кишвар аз ҷониби соҳибкорони маҳаллӣ инфрасохтори гуногуни  соҳаи сайёҳӣ-истироҳатгоҳҳо бунёд гардидаанд, ки дар рушди сайёҳӣ, хусусан сайёҳии обӣ-варзишӣ дар  ҷануби Тоҷикистон мусоидат менамоянд.

Бояд тазаккур дод, ки меҳмонону иштирокдорони конфронси дуюми сатҳи баланди Душанбе ҳамзамон  аз Неругоҳи барқии обии «Роғун»,  мавзеъҳои таърихию фарҳангӣ ва истироҳатии Душанбе, Ҳисор ва  Варзоб боздид намуда, бо захираҳои бой ва иқтидори обию энергетикӣ ва ёдгориҳои бостониву фарҳангии Тоҷикистон шинос гардида,  таасуроти нек бардоштанд, ки дар гузоришҳои оянда онҳоро пешкаши хонандагони сомонаи АМИТ «Ховар» менамоем.

 

                                                          Марзия САИДЗОДА
АМИТ «Ховар»,

                                                                      Душанбе-Норак-Душанбе

АКС: АМИТ «Ховар»

Июнь 9, 2022 15:23

Хабарҳои дигари ин бахш

«МАН БА МАРДУМИ ТОҶИК ҲАВАС МЕБАРАМ, КИ ДАР ЧУНИН ТАБИАТИ ЗЕБО УМР БА САР МЕБАРАНД…». Таассуроти меҳмонон ва иштирокдорони Конфронси сеюми оби Душанбе аз тамошои манзараҳои Тоҷикистон
ИҚДОМҲОИ ПРЕЗИДЕНТИ ТОҶИКИСТОН ҶОМЕАИ ҶАҲОНРО БА ҲАМ ОВАРД! Таассуроти меҳмонон ва иштирокдорони Конфронси сеюми оби Душанбе аз тамошои дараи Ромит
ТОҶИКИСТОН — ШВЕЙТСАРИЯИ ДУЮМ. Меҳмонон ва иштирокдорони Конфронси оби Душанбе аз тамошои манзараҳои дилфиреби Варзоб, хусусан оби мусаффои дарёи Сиёма ангушти ҳайрат газиданд
Эмомалӣ Раҳмон: «Ватанамонро соҳибӣ мекунем, обод мекунем ва намегузорем, ки халқамон дастнигари дигарон шавад»
ИҚТИСОДИ «САБЗ». Намояндаи Ироқ Ҳотам Ҳусейн: «Шумораи зиёди электромобилҳо дар Душанбе аз тадбирҳои тоза нигоҳ доштани муҳити зист дарак медиҳад»
«ТОҶИКИСТОНРО ЧУН БИҲИШТИ РӮИ ЗАМИН ДАРЁФТЕМ». Бардошти меҳмонон пас аз шиносоӣ бо сохтмони Неругоҳи барқи обии «Роғун»
Эмомалӣ Раҳмон: «Иди Қурбон тӯй ё маросиме нест, ки боиси вазнин шудани вазъи молии инсон ва аъзои оилаи вай гардад»
РАВАНДИ ОБИ ДУШАНБЕ. Рен Чинг Чун: «Иқдоми ҷаҳонии Тоҷикистонро дар масъалаи обу иқлим ва ҳифзи пиряхҳо ҷонибдорӣ менамоем»
Давоми ду даҳсола ташаббусҳои ҷаҳонии Тоҷикистон дар пешбурди масъалаҳои об нақши муҳим гузоштанд
РАВАНДИ ОБИ ДУШАНБЕ. Хабарнигор аз Африқо Омва Баблин: «Тоҷикистон дар раванди ҳалли мушкилоти обу иқлим саҳми арзанда гузоштааст»
РАВАНДИ ОБИ ДУШАНБЕ. Таҳти раёсати Сарвазири Тоҷикистон Қоҳир Расулзода ҷаласаи хотимавии Конфронси сеюми байналмилалии сатҳи баланд доир гардид
РАВАНДИ ОБИ ДУШАНБЕ. Конфронси сеюми байналмилалии сатҳи баланд оид ба Даҳсолаи байналмилалии амал «Об барои рушди устувор, солҳои 2018-2028» анҷом ёфт