Имрӯз Мусобиқаи «Grand Slam»-и Улан-Батор оид ба дзюдо оғоз мешавад

Июнь 24, 2022 08:51

ДУШАНБЕ, 24.06.2022 /АМИТ «Ховар»/. Имрӯз дар шаҳри Улан-Батори Муғулистон мусобиқаи «Тоскулоҳи бузург» («Grand Slam») оид ба дзюдо оғоз мешавад, ки он то 26 июни соли равон  идома меёбад. Дар ин мусобиқа аз Тоҷикистон  се  паҳлавони шинохтаи  тоҷик — Беҳрӯз Хоҷазода (73 кг),  Сомон Маҳмадбеков (73 кг) ва Амирҷон Насимҷон (90 кг)  иштирок мекунанд, хабар доданд ба шореҳи варзиши АМИТ «Ховар» Меҳрони Қурбон аз Федератсияи дзюдои Тоҷикистон.

Мавриди зикр аст, ки мусобиқаи «Grand Slam» яке аз бонуфузтарин мусобиқоти арсаи ҷаҳонист. Дар ин мусобиқаи байналмилалӣ 200 варзишгар аз 27 давлат иштирок мекунад.

Тоҷикистонро дар мусобиқаи мазкур ҳайати даста иборат аз Беҳрӯз Хоҷазода (73 кг), ки пас аз ду соли муолиҷа ба варзиш баргаштааст, Сомон Маҳмадбеков (73 кг) ва Амирҷон Насимҷон (90 кг) намояндагӣ мекунад.

Сомон Маҳмадбеков дар вазни то 73 кг дар даври аввал озод буда, дар даври дуюм бо ҷуфти Шаҳром Аҳатов (Ӯзбекистон) ва Бенс Борос (Маҷористон) қувваозмоӣ мекунад.

Беҳрӯз Хоҷазода паҳлавони дигари кишвар дар даври аввал дар вазни то 73 кг, бо варзишгари мизбон Уранбайар Одгерел вориди рақобат мешавад. Ёдовар мешавем, ки Сомон Маҳмадбеков ин варзишгаро дар мусобиқаи Paris Grand Slam 2021 шикаст дода буд.

Дар вазни то 90 кг дар мусобиқаи мазкур кишвари моро Амирҷони Насимҷон намояндагӣ мекунад. Амирҷон дар даври аввал бо варзишгари мизбон Мунхбайар Баттогтох рақобат мекунад.

Мавриди зикр аст, ки паҳлавонони шинохтаи мо – Сомон Маҳмадбеков ва Беҳрӯз Хоҷазода рӯзи дуюм (25 июн), Амирҷони Насимҷон рӯзи сеюм (26 июн) баҳри ба даст овардани нишонҳои фахрӣ рақобатҳоро шурўъ мекунанд.

Хотиррасон мешавем, ки дар мусобиқаи «Ulaanbaatar Grand Slam 2022» иштироки 270 варзишгар (161 мард, 109 зан) аз 30 давлат дар назар аст. Чун анъана қувваозмоиҳо давоми се рӯз доир мегарданд. Ба ғолибон дар баробари медал додани ҷоизапулӣ дар назар гирифта шудааст. Ғолиби ҳар вазн соҳиби 5000 евро, барандаи медали нуқра соҳиби 3000 евро ва барандаи медали биринҷӣ соҳиби 1500 евро мегардад.

Қобили зикр аст, ки марҳилаҳои боқимондаи мусобиқоти «Grand Slam» дар мавсими имсола дар Будапешт, Загреб, Абу-Даби, Боку ва Токио баргузор мешаванд.

Бояд зикр аст, ки  дар Мусобиқаи байналмилалии дзюдо «Tbilisi Grand Slam 2022», ки 3-5 июн дар пойтахти Гурҷистон – Тбилиси баргузор шуд, варзишгарони тоҷик низ иштирок намуданд. Тоҷикистонро дар ин мусобиқа 9 нафар: Нуралӣ Эмомалӣ, Шаҳбоз Саидаброров (ҳар ду дар вазни -66 кг), Маҳмадшариф Наҷмуддинов, Муҳаммадраҳим Сарахонов (ҳар ду дар вазни -73 кг), Шодмон Ризоев, Муҳаммадҷон Абдуҷалилов (ҳар ду дар вазни -81 кг), Кароматулло Ҳакимов (дар вазни -90 кг), Мансур Раҳмон ва Абубакри Акобир (ҳар ду дар вазни -100 кг) намояндагӣ карданд.Аз байни гўштигирони тоҷик се нафар — Шаҳбоз Саидаброров, Муҳаммадраҳим Сарахонов ва Шодмон Ризоев натиҷаҳои хубтар нишон дода, дар вазни худ ҷои ҳафтумро соҳиб шуданд.

                                                                           АКС: Федератсияи дзюдои Тоҷикистон

Июнь 24, 2022 08:51

Хабарҳои дигари ин бахш

Дастаи мунтахаби наврасони Тоҷикистон (U-16) дар мусобиқаи гиромидошти хотираи Мираброр Усмонов дар Тошканд иштирок мекунад
Санаҳои нави баргузории Бозиҳои 19-уми Осиё эълон шуданд
ФУТБОЛ. Дастаи мунтахаби Тоҷикистон дар Мусобиқаи байналмилалии «King’s Cup 2022» иштирок мекунад
БОЗИҲОИ ҲАМБАСТАГИИ ИСЛОМӢ. Варзишгарони Тоҷикистон дар рӯзи чорум якбора се медал ба даст оварданд
ЧЕМПИОНАТИ CAFA-2022. Мунтахаби ҷавонони Тоҷикистон ҷои сеюмро гирифт
ДЗЮДО. Ҳашт нафар паҳлавонони тоҷик дар Ҷоми кушоди Осиё дар Қазоқистон ширкат меварзанд
ИДИ БУЗУРГИ ТИРАМОҲ. Оғози Чемпионати ҷаҳон оид ба футбол дар Қатарро ба моҳи ноябр гузарониданд
ЧЕМПИОНАТИ CAFA-2022. Имрӯз ғолиб ва ҷоизадорони мусобиқа муайян мегарданд
БОЗИҲОИ ҲАМБАСТАГИИ ИСЛОМӢ. Варзишгарони кадом кишварҳо пешсафанд?
БОЗИҲОИ ҲАМБАСТАГИИ ИСЛОМӢ. Киҳо медалҳоро соҳиб мешаванд?
Олимпиадаи 46-уми ҷаҳонии шоҳмот дар Узбекистон доир мешавад
АҲСАН! Нуралӣ Эмомалӣ Чемпиони ҷаҳон оид ба ҷудо миёни ҷавонон гардид

Маводҳои таҳлилӣ