ДЗЮДО. Паҳлавонони тоҷик дар Чемпионати Осиё миёни ҷавонон дар Бангкок соҳиби ду ҷои панҷум гардиданд

Июль 22, 2022 09:34

ДУШАНБЕ, 22.07.2022 /АМИТ «Ховар»/. Паҳлавонони шинохтаи тоҷик дар Чемионати Осиё миёни ҷавонон, ки 20-21 июл дар пойтахти Тайиланд — шаҳри Бангкок баргузор шуд, ширкат варзиданд. Дар ин бора шореҳи варзиш Муродалӣ Тешаев ба хабарнигори АМИТ «Ховар» Меҳрони Қурбон иттилоъ дод

Дар мусобиқаи мазкур варзишгарони соли таваллудашон 2002-2007 аз рӯи 14 вазн (бонувон: -48кг, -52кг, -57кг, -63кг, -70кг, -78кг, +78кг; мардон: -60кг, -66кг, -73кг, -81кг, -90кг, -100кг ва +100кг иштирок карданд.

Ба иттилои Федератсияи байналмилалии дзюдо (IJF), дар чемпионати мазкур 163 варзишгар аз 15 кишвари қораи Осиё миёни ҳам маҳорату малака санҷиданд. Ҷумҳурии Тоҷикистонро дар ин мусобиқаи сатҳи баланд 3 варзишгари шинохта – Суруш Эркаев дар вазни то 60кг, Сунатулло Лоиқов ва Муҳаммадҷон Абдуҷалилов- ҳарду дар вазни то 81кг намояндагӣ карданд.

Дар рӯзи аввали сабқатҳо дар вазни то 60 кг Суруш Эркаев баромад кард ва бо шикаст додани рақибонаш ба гирифтани нишони биринҷӣ наздик буд. Барои ба даст овардани нишони биринҷии вазни то 60 кг паҳлавони ҷавони тоҷик Суруш Эркаев аз варзишгари муғул Мандсайхан Нйамсурен бо имтиёзи иппон шикаст хӯрд ва дар чемпионати Осиё миёни ҷавонон оид ба ба гӯштини дзюдо мақоми 5-умро соҳиб шуд. То ба ин марҳила расидан варзишгари кишвари мо Алҳассан Сугҳаййир аз Арабистони Саудӣ, Каттион Фуинои аз Тайланд ва Нурканат Серикбайевро шикаст дода буд.

Дар рӯзи дуюми чемпионати Осиё миёни ҷавонон дар шаҳри Бангкок ду варзишгари тоҷик — Сунатулло Лоиқов ва Муҳаммадҷон Абдуҷалилов- ҳарду дар вазни то 81 кг баромад карданд.

Муҳаммадҷон Абдуҷалилов дар вазни то 81 кг бо шикаст додани ҳарифон то ба даври тасаллобахш рафта, дар идома ноком шуд.

Муҳаммадҷон Абдуҷалилов дар вазни то -81 кг бо шикаст додани Парвендер Парвенд аз Ҳиндустон ба марҳилаи ¼-ниҳоии мусобиқаи Осиё миёни ҷавонон баромад. Дар марҳилаи чаҳорякниҳоӣ — Муҳаммадҷон аз варзишгари кореягӣ Парк Ҷун Ҳйун мағлуб шуду ба марҳилаи тасаллобахш рафт.

Муҳаммадҷон Абдуҷалилов дар вазни то -81 кг дар даври тасаллобахши Чемионати Осиё -2022 ба муқобили Албарак Халед аз Кувайт ғалаба ба даст овард ва дар рақобати дигари ин давр аз варзишгари муғул Тумурсанаа Ренчиндорӣ шикаст хӯрда, аз идомаи мусобиқа бенасиб монд.

Сунатулло Лоиқов дар даври аввали рақобатҳо бо варзишгари Тайпеи Чин – Ли Вей Сун рӯи татамӣ мубориза бурд. Дар сонияҳои охири рақобат Сунатулло бо имтиёзи иппон ба муқобили ин варзишгари таҷрибадор зафар ёфт ва ба даври 1/4-ниҳоии мусобиқаи Осиё миёни ҷавонон оид ба гӯштини дзюдо роҳ ёфт. Дар марҳилаи чаҳорякниҳоӣ Сунатулло аз варзишгари қирғиз Алмазҷан Уулу мағлуб шуд ва ба даври тасалобахш рафт.

Сунатуло Лоиқов дар вазни то -81 кг дар даври тасаллобахши Чемпионати Осиё -2022 ба муқобили Алҳаҷрӣ Муҳаммад аз Арабистони Саудӣ музаффарият ба даст овард ва барои ба даст овардани нишони биринҷии мусобиқа аз варзишгари қазоқ Мейрлан Максим мағлуб гардида, зинаи 5-умро ишғол кард.

Ҳоло дастаи мунтахаби ҷавонони Тоҷикистон оид ба гӯштини дзюдо ба Чемпионати ҷаҳон миёни ҷавонон, ки аз 10 то 13 августи соли равон дар шаҳри Гуаякили Эквадор баргузор мешавад, омодагӣ мебинад.

АКС: Федератсияи дзюдои Тоҷикистон

 

Июль 22, 2022 09:34

Хабарҳои дигари ин бахш

«CAFA NATIONS CUP 2025». Дастаи мунтахаби Тоҷикистон бо дастаи Афғонистон бозӣ менамояд
Таҳкими ҳамкорӣ байни Тоҷикистон ва вилояти Форси Эрон дар бахши ҷавонон ва варзиш баррасӣ гардид
Дар Ҳисор мусобиқаи «CAFA Nations Сup 2025» дар гурӯҳи «В» оғоз мешавад
Ҳайати Кумитаи кор бо ҷавонон ва варзиши Тоҷикистон бо Академияи Кумитаи миллии олимпии Эрон шинос шуд
Барномаи иҷроии ҳамкорӣ байни Тоҷикистон ва Эрон дар соҳаи варзиш ва ҷавонон ба имзо расид
Бо иштироки ҷавонони Тоҷикистон ва Эрон ҳамоиш доир гардид
Дар Теҳрон густариши ҳамкории Тоҷикистон ва Эрон дар самти ҷавонон ва варзиш баррасӣ гардид
Ғолиби «Ҷоми Раиси ВМКБ» аз намуди волейбол муайян карда шуд
«Tojiktelecom» сарпарасти расмии мусобиқаи бонуфузи байналмилалии Осиёи Марказӣ ва Ҷанубӣ — CAFA Nations Cup 2025 гардид
ФУТБОЛ. Бозии ниҳоии Ҷоми Тоҷикистон-2025 байни «Регар-ТадАЗ» ва «Эсхата» дар Хуҷанд доир мегардад
Дар Тоҷикистон лоиҳаи «Football For Schools»-и ФИФА амалӣ карда мешавад
ҶОМИ ТОҶИКИСТОН. Дастаҳои футболи «Регар-ТадАЗ» ва «Эсхата» ба финали ин мусобиқа роҳ ёфтанд