Дар мактабҳои миёнаи Тоҷикистон ба 544 нафар омӯзгорон эҳтиёҷ боқӣ мондааст

Август 8, 2022 10:57

ДУШАНБЕ, 08.08.2022. /АМИТ «Ховар»/. Дар натиҷаи ҳамарӯза гузаронидани Ситоди корӣ оид ба бартараф намудани норасоии кадрӣ дар муассисаҳои таҳсилоти умумии ҷумҳурӣ ниёз ба омӯзгорон 544 нафар паст фароварда шуда, ба ҳолати имрӯза эҳтиёҷ ба омӯзгорон чунин мебошад: ВМКБ –113,  Хатлон – 25 нафар, Суғд – 60 нафар, Душанбе – 35 нафар, шаҳру навоҳии тобеи ҷумҳурӣ  – 311 нафар. Дар ин бора АМИТ «Ховар» бо истинод ба маркази матбуоти Вазорати маориф ва илми Ҷумҳурии Тоҷикистон хабар медиҳад.

Тавре ба ҳамагон маълум аст, тибқи фармоиши Вазири маориф ва илми Ҷумҳурии Тоҷикистон аз 12 июли соли 2022, дар Вазорати маориф ва илм Ситоди корӣ оид ба таъмин намудани муассисаҳои таҳсилоти умумӣ бо омӯзгорони касбӣ таъсис дода шудааст. Ситоди корӣ фаъолияти худро аз 12 июл оғоз намуда, ҷаласаҳои он ҳамарӯза ба таври маҷозӣ (онлайн) бо иштироки сардорони сарраёсат, раёсатҳо ва мудирони шуъбаҳои маорифи вилоят ва шаҳру ноҳияҳои ҷумҳурӣ гузаронида мешавад. Натиҷаи кори ситод ҳамарӯза ҷамъбаст ва ба Вазири маориф ва илм пешниҳод карда мешавад.

То оғози фаъолияти ситод мувофиқи дархости раёсату шуъбаҳои маориф муассисаҳои таҳсилоти умумии ҷумҳурӣ ба 3406 нафар омӯзгор эҳтиёҷ доштанд, ки ин бештар аз фанҳои дақиқ ва ҷамъиятию гуманитарӣ ба қайд гирифта шуда буд. Тибқи дархости пешниҳоднамудаи сарраёсат, раёсатҳо ва шуъбаҳои маорифи вилоят ва шаҳру ноҳияҳо, дар охири соли таҳсили 2021-2022 ВМКБ ба 169 нафар, вилояти Хатлон ба 852 нафар, вилояти Суғд ба 720 нафар, шаҳри Душанбе ба 159 нафар, шаҳру ноҳияҳои тобеи ҷумҳурӣ ба 1506 нафар кадри омӯзгорӣ эҳтиёҷ доштанд.

Тавре АМИТ «Ховар» қаблан иттилоъ дода буд, сабаби асосии ҳозир нашудани омӯзгорони ҷавон ба мактабҳо дар баробари сабабҳои дигари иқтисодиву иҷтимоӣ таъмин нагардидани имтиёзҳои муқаррарнамудаи Ҳукумати Ҷумҳурии Тоҷикистон аз ҷониби мақомоти иҷроияи ҳокимияти давлатии шаҳру ноҳияҳои мамлакат  мебошад.

Тибқи Қонуни Ҷумҳурии Тоҷикистон «Дар бораи маориф» барои омӯзгорон якчанд имтиёзҳои муайян муқаррар гардидаанд, аз ҷумла, ҳамасола аз ҳисоби буҷети давлатӣ ба омӯзгорони ҷавон барои беҳбуди шароити зисташон ба маблағи 6 ҳазор сомонӣ қарзи имтиёзнок барои чорводорӣ ва занбӯрпарварӣ дода мешавад. Ин кумакпулии давлатӣ ҳамасола дар саросари кишвар ба 333 нафар омӯзгорон  пешниҳод карда мешавад.

Дар Қарори Ҳукумати Ҷумҳурии Тоҷикистон «Дар бораи муқаррар намудани имтиёзҳо барои омӯзгорони ҷавон», ки  соли 2006 қабул гардидааст,  ба омӯзгорони ҷавони дорои маълумоти олии касбӣ, ки дар муассисаҳои таҳсилоти умумӣ фаъолият мекунанд,  барои се соли аввали соли корӣ ба маблағи 6 ҳазор сомонӣ қарз ба андозаи 3 фоизи солона пешбинӣ шудааст.

Қарзҳо тавассути «Амонатбонк» пешниҳод карда шуда, яке аз шартҳои он  ҷой надоштани қарзҳо дар дигар бонкҳо ба ҳисоб меравад. Қаблан Вазорати маориф ва илм тасдиқ намуд, ки ҳарчанд ин қарзҳои имтиёзнок барои ҳамаи омӯзгорони ҷавони кишвар пешбинӣ шудаанд, аммо кори раёсат ва шуъбаҳои маориф дар ин самт кофӣ нест.

«Аз сабаби нокифоя будани корҳои фаҳмондадиҳӣ аз ҷониби раёсату шуъбаҳои маориф аксари омӯзгорон аз ин қарзҳо истифода бурда наметавонанд», — зикр карданд дар ин ниҳод.

Ба гуфтаи вазорат, барои дастрасии омӯзгорони ҷавон ба ин қарзҳо шуъбаҳои маорифи шаҳру ноҳияҳо ҳамасола рӯйхати омӯзгорони ҷавонро ба вазорат пешниҳод мекунанд.

Ҳамчунин тибқи моддаи 53-юми Қонуни Ҷумҳурии Тоҷикистон «Дар бораи маориф»  омӯзгорон ва дигар кормандони соҳаи маориф  чунин имтиёзҳоро бояд дошта бошанд:

— муҳлати даъвати омӯзгорон ба хизмати ҳарбӣ ба таъхир гузошта шавад;

— ба рухсатии эҷодӣ бо нигоҳ доштани музди меҳнат бароянд;

— ҳангоми беморӣ бо тартиби муқаррарнамудаи Ҳукумати Ҷумҳурии Тоҷикистон бо доруворӣ ва табобати ройгон таъмин гарданд;

— аз хизматрасонии коммуналӣ ройгон ё имтиёзнок истифода баранд, ки тартиби онро Ҳукумати Ҷумҳурии Тоҷикистон муқаррар менамояд;

— барои дастовардҳо дар фаъолияти омӯзгорӣ ва тарбияи насли наврас бо мукофотҳои соҳавӣ, давлатӣ ва унвонҳои фахрӣ сарфароз гардонида шаванд;

— барои меҳнати шоиста ва дастовардҳои педагогию илмӣ ба ҳавасмандии моддӣ ва маънавӣ сарфароз гардонида шаванд;

Маҳз барои бартараф намудани мушкилоти дар соҳа ҷойдошта тибқи талаботи фармоиши Вазири маориф ва илми Ҷумҳурии Тоҷикистон фаъолияти Ситоди корӣ то 31 августи соли 2022 идома ёфта, муассисаҳои таҳсилоти умумӣ бо мутахассисони ҷавон ва собиқ омӯзгорон таъмин карда мешаванд.

Дар ситоди мазкур тамоми сардорони сарраёсату раёсатҳо ва мудирони шуъбаҳои маорифи шаҳру ноҳияҳои ҷумҳурӣ, ректорони муассисаҳои таҳсилоти олии касбии дорои  равияи омӯзгорӣ иштирок намуда, барои бартараф намудани мушкилоти ҷойдошта кор мебаранд.

Зарангези ЛАТИФ,
АМИТ «Ховар»

АКС: АМИТ «Ховар»

Август 8, 2022 10:57

Хабарҳои дигари ин бахш

МУҚОВИМАТ БА ТЕРРОРИЗМ ВА ЭКСТРЕМИЗМ. Ҷиҳати пешгирии шомилшавии ҷавонон ба ҳизбу ҳаракатҳои гуногун мулоқот баргузор гардид
ЗАБОН ДОНӢ-ҶАҲОН ДОНӢ. Зодаи Тоҷикистон дар озмуни байналмилалӣ соҳиби ҷоизаву диплом гардид
Сарвари давлат Эмомалӣ Раҳмон пешниҳод намуданд, ки Донишкадаи давлатии забонҳои Тоҷикистон ба Донишгоҳи байналмилалӣ табдил дода шавад
Дар Ҷамоати деҳоти Шӯроободи ноҳияи Шамсиддини Шоҳин сохтмони бинои нави мактаб оғоз гардид
ҲАМЛАИ ТАҶОВУЗКОРОНАИ ҚИРҒИЗИСТОН. Душманони марзу бум ва истиқлолияту ягонагии Тоҷикистон аҳдшикану бадниятанд
«ХОНИКЕЙ ТОҶИК НАБУД…». Нависанда Қодири Рустам дар посух ба як дурӯғи машҳур, ки ду рӯз пеш Садир Жапаров дар қатори дурӯғҳои дигараш аз минбари СММ такрор кард
ҚИРҒИЗИСТОН ДАР ОСИЁИ МАРКАЗӢ РАВАНДИ ҲИССИ БАДБИНИИ МИЛЛИРО БА РОҲ МОНДААСТ. Он дар оянда метавонад суботи минтақавиро халалдор намояд
МАКТАБ МАКОНИ ИЛМУ МАЪРИФАТ АСТ, НА ҶОЙИ ТИРУ ТУФАНГ! Муроҷиати омӯзгорони Чоркӯҳ ба низомиёни Қирғизистон
ДАР ИДМ ҲАМТО НАДОРАНД. Дмитрий Волвач мактабҳои русиро дар Тоҷикистон беназир унвон кард
ҲАМЛАИ ТАҶОВУЗКОРОНАИ ҚИРҒИЗИСТОН. Роҳбарияти бемасъулияти кишвари ҳамсоя ба хотири беҳбуди молӣ давлату мардумашро ба бозии хатарнок кашид
Дар Душанбе маросими қадрдонии бонувони ихтироъкори тоҷик доир гардид
Дар Донишгоҳи давлатии омӯзгории Тоҷикистон озмуни «Ихтироъкор» гузаронида мешавад