Дар Суғд фаъолияти муштараки доираҳои тиҷоративу соҳибкории Тоҷикистон ва Ҷопон баррасӣ гардид

ДУШАНБЕ, 08.08.2022 /АМИТ «Ховар»/. Раиси вилояти Суғд Раҷаббой Аҳмадзода бо намояндаи Палатаи савдои Ҷопон дар Осиёи Марказӣ Накамура Дайсеки ва соҳибкори ҷопонӣ Чида Хикару мулоқот намуд, ки зимни он ҷонибҳо густариши робитаҳои иқтисодӣ ва дурнамои ҳамкорӣ миёни Тоҷикистон ва Ҷопонро мавриди баррасӣ қарор доданд, хабар медиҳад АМИТ «Ховар» бо истинод ба Хадамоти матбуоти Раиси вилоят.

Ҷонибҳо ҳамзамон ба масъалаи ташкили корхонаи коркарди партов дар шаҳри Хуҷанд таваҷҷуҳ зоҳир карданд.

Раиси вилоят иброз намуд, ки дар Тоҷикистон саноатикунонии мамлакат ҳадафи стратегӣ эълон гардида, ҷиҳати расидан ба он бо доираҳои тиҷоративу соҳибкории кишварҳои гуногун ҳамкорӣ густариш меёбад.

Вилояти Суғд дорои имконияти фаровон буда, доираҳои соҳибкории вилоят ҳавсманданд, ки якҷо бо шарикони рушд тарҳҳои муштарак амалӣ намоянд.

Накамура Дайсеки оид ба фаъолияти Палатаи савдои Ҷопон дар Осиёи Марказӣ маълумот дода, изҳори боварӣ намуд, ки соҳибкорони ду ҷониб дар оянда барои тақвияти робитаҳо аз тамоми имконот истифода мекунанд.

АКС: Хадамоти матбуоти Раиси вилояти Суғд