Форуми байналмилалии «Помиринвест -2022» зарфияти сайёҳии Бадахшонро муаррифӣ менамояд

Август 18, 2022 10:10

ДУШАНБЕ, 18.08.2022 /АМИТ «Ховар»/. Бо мақсади муаррифии зарфияти сайёҳии кишвар дар арсаи байналмилалӣ дар панели сеюми Форуми байналмилалии соҳибкорию сармоягузории «Помиринвест -2022», ки ҳадафаш ҷалби сармоя ба рушди соҳаҳои иқтисодию иҷтимоии Бадахшон, тарғиби имконияти сармоягузории ин минтақа ба сармоягузорони ватанӣ ва хориҷӣ мебошад, масъалаҳои имконоти рушди соҳибкорӣ дар бахши сайёҳӣ ва ҷалби сармоя ба инфрасохтори соҳа баррасӣ гардиданд. Дар ин бора ба АМИТ «Ховар» дар Кумитаи рушди сайёҳии назди Ҳукумати Ҷумҳурии Тоҷикистон хабар доданд.

Дар кори ҳамоиш роҳбарияти Кумитаи рушди сайёҳӣ, Мақомоти иҷроияи ҳокимияти давлатии Вилояти Мухтори Кӯҳистони Бадахшон, ассотсиатсияҳо, ширкатҳои сайёҳӣ, меҳмонхонаҳо, осоишгоҳҳо ва созмону ташкилоти миллию байналмилалӣ иштирок доранд.

Мавриди зикр аст , ки Бадахшон яке аз минтақаҳои ҷолиби сайёҳӣ буда, бо табиати зебову нотакрор, рӯду кӯлҳо, қуллаҳои баланд дар ҷаҳон шӯҳрат дорад.

Ба рушди соҳаи сайёҳии вилоят мавҷудияти мавзеъҳои таърихию табобатӣ, ба монанди кӯли Сарез, чашмаҳои шифобахши Гармчашма, Авҷ, Ямчун, Ҷелондеҳ, Бибӣ Фотимаи Заҳро, қаторкӯҳҳои баландтарин дар ҷаҳон ва пиряхҳои Помир мусоидат менамоянд.

Бо мақсади мусоидат дар пешбурди фаъолияти сайёҳӣ ва таъмини рақобати озоду солим дар бозори сайёҳии вилоят бо тартиби муқарраргардида то имрӯз ба 49 субъекти хоҷагидори вилоят иҷозатномаи фаъолияти сайёҳӣ дода шудааст, ки фаъолиятро пеш бурда истодаанд. Бо дастгирии Ҳукумати Ҷумҳурии Тоҷикистон ва ҷалби сармоя аз Бонки ҷаҳонӣ Қалъаи «Ямчун» дар Бадахшон бозсозӣ шуда, ба сатҳи байналмилалӣ расонида мешавад.

Дар самти татбиқи сиёсати давлатии сайёҳӣ дар қаламрави вилоят ҳамасола якчанд чорабиниҳо, аз қабили Фестивали сайёҳию фарҳангии «Боми ҷаҳон», мусобиқаи қаиқронии «Regatta in Roof of the World», Форуми тиҷоратии “Помиринвест” баргузор ва имконоти сайёҳӣ бо мақсади ҷалби сармоя ба дӯстдорони сайру саёҳат муаррифӣ карда мешаванд.

Бадахшон барои сайёҳон ҳамчун минтақаи саёҳати экологӣ муаррифӣ гардидааст. Аз ҷумла, соли 2017 тибқи назарсанҷиҳои созмонҳои бонуфузи ҷаҳонӣ бори cеюм кӯҳҳои Помири Тоҷикистон ба рӯйхати «100 манзараи беҳтарини сайёҳӣ» дохил карда шуданд.

Соли 2013 Парки Миллии Ҷумҳурии Тоҷикистон ба рӯйхати Мероси ҷаҳонии ЮНЕСКО ворид гардид, ки муаррифи Тоҷикистон ба ҷаҳониён оид ба рушди сайёҳии экологӣ ва дарҳои кушод ба сайёҳии хориҷӣ мебошад.

Маводи иттилоотии Кумитаи рушди сайёҳӣ низ маконҳои тамошобоби минтақаро фаро гирифта, дар байни дӯстдорони сайру саёҳат ба тариқи ройгон паҳн мегардад.

Таҳлилҳо нишон медиҳанд, ки ҳамасола теъдоди зиёди сайёҳони хориҷӣ маҳз барои боздид аз мавзеъҳои сайёҳии вилоят ба кишвар ворид шуда, ба намудҳои сайёҳии кӯҳнавардӣ, экологӣ ва экскурсионӣ машғул мешаванд.

АКС: Кумитаи рушди сайёҳии назди Ҳукумати ҶТ

Август 18, 2022 10:10

Хабарҳои дигари ин бахш

ЛОИҲАИ БАРҚАРОРКУНИИ ҶАНГАЛ ВА БЕҲТАР КАРДАНИ НЕКУАҲВОЛИИ МАРДУМ. Дар Тоҷикистон маҷмӯаи селексионии киштзори писта ташкил ёфт
Намояндаи Тоҷикистон дар ҷаласаи Шӯрои сайёҳии кишварҳои узви Иттиҳоди Давлатҳои Мустақил тариқи маҷозӣ иштирок намуд
Гардиши савдои хориҷӣ миёни Тоҷикистон ва кишварҳои СҲШ дар шашмоҳаи якуми соли 2022 68 фоизро ташкил дод
Ҳаҷми маҳсулоти умумии кишоварзии вилояти Хатлон дар сатҳи 106-107 фоиз таъмин гардид
«ДУШАНБЕ-ШАҲРИ ИМКОНОТИ РУШДИ САЙЁҲИИ УСТУВОР». Таҳти чунин унвон Рӯзи ҷаҳонии сайёҳӣ таҷлил гардид
«БЕХАТАРИИ ОБӢ – АСОСИ РУШДИ УСТУВОР». Таҳти ин унвон дар Душанбе Конференсияи байналмилалии илмӣ-амалӣ доир мегардад
РОҒУН — МИНТАҚАИ САЙЁҲӢ. Дар ин бора Қарори Ҳукумати Ҷумҳурии Тоҷикистон ба тасвиб расид
Ориф Амирзода: «Маҳз бар асари гармшавии иқлим беш аз 1000 пиряхи Тоҷикистон комилан об шудаанд»
БА ИСТИҚБОЛИ ҶАШНИ 35-СОЛАГИИ ИСТИҚЛОЛИЯТИ ДАВЛАТӢ. Дар ноҳияи Рашт 5 бунгоҳи тиббӣ мавриди истифода қарор гирифт
Имконияти сайёҳии Тоҷикистон дар ЭКСПО-и сайёҳии Ҷопон муаррифӣ мегардад
Ҷаласаи навбатии Шӯро оид ба муайян намудани сатҳи камбизоатӣ ва табақаи миёнаи аҳолӣ баргузор шуд
Дар Душанбе масъалаи ҳамкорӣ бо Маркази минтақавии рушди иқтидори Хазинаи Байналмилалии Асъор баррасӣ гардид