«ВАТАНАТОНРО ДӮСТ ДОРЕД!». Эрна Ҳайзер мегӯяд ба Олмон меҳмонӣ омадааст, ватанаш Тоҷикистон аст

Август 28, 2022 12:00

ДУШАНБЕ, 28.08.2022 /АМИТ «Ховар»/. Мусиқишинос ва оҳангсоз Эрна Ҳайзер, муаллифи як қатор асарҳо оид ба таърихи мусиқии тоҷик, чанде пеш 80-солагии зодрӯзашро таҷлил намуд. Ӯ 23 августи соли 1942 дар оилаи геологҳои немис Роберт Ҳаййзер ва Вера Рутинг дар шаҳри Ленинград (ҳозира Санкт-Петербург) ба дунё омадааст, вале баъдтар ба Тоҷикистон кӯчидааст. Тавре қаблан АМИТ «Ховар» иттилоъ дод, Сафири Тоҷикистон дар Олмон Имомудин Сатторов ба наздикӣ дар Берлин меҳмони Эрна Ҳайзер шуд ва ӯро бо зодрӯзаш табрик намуд. 

Соли 1941 тибқи фармони Раёсати Шӯрои Олии собиқ ИҶШС «Дар бораи кӯчонидани немисҳое, ки дар Поволже зиндагӣ мекунанд», бисёр немисҳо ба манотиқи ҷанубии кишвар, аз ҷумла ба Қазоқистон ва Тоҷикистон   муҳоҷир шуданд.

Эрна Ҳайзер, мусиқишинос ва ҳамсари оҳангсози маъруфи тоҷик Фирӯз Баҳор, 23-юми августи 1942 дар оилаи геологҳои олмонӣ – Роберт Гейзер ва Вера Рутинг – таваллуд шудааст. Оилаи Гейзерҳоро пас аз хатми Ҷанги дуюми ҷаҳон ба Ленинобод, Хуҷанди имрӯза,  кӯчиданд.

Дар суҳбат бо хабарнигори Радиои «Озодӣ» Хиромон Бақозода, ки моҳи майи ҳамин сол сурат гирифт, Эрна Ҳайзер қисса кард, ки аввал оилаи онҳоро ба Ленинобод, ҳозира Хуҷанд оварданд. Дар он ҷо ӯ мактабро хонда тамом карда, шуъбаи фортепианои омӯзишгоҳи мусиқӣ ва сипас факултети забону адабиёти руси Донишкадаи педагогиро ба итмом расонидааст. Вале азбаски мусиқиро дӯст медоштааст, вақте ба Душанбе мекӯчанд, ба Донишкадаи ҳунарҳои зебои Тоҷикистон шомил мешавад.

«Дар он ҷо бо ҳамсарам ҳангсоз Фирӯз Баҳор. – Тавз. АМИТ «Ховар») шинос шудам ва пас аз хатми донишгоҳ тӯй кардем. Баъди он ба аспирантураи Академияи илмҳо дохил  шудам», — мегӯяд Эрна Ҳайзер.

Яъне ӯ ду донишкада – педагогӣ ва  ҳунарҳои зебо ва сипас аспирантураро хатм карда, дар Академияи илмҳои Тоҷикистон ба ҳайси ходими хурд ва ходими калони илмӣ кор кардааст.  Мақолаву рисолаҳои илмиаш чоп шудаанд.  «Он чи мехостам, ба он ноил шудам», — изҳор мекунад ӯ бо қаноатмандӣ.

Ҳамин тариқ, фарзанди муҳоҷирони немис Эрна Ҳайзер дар Тоҷикистон ба камол расида, ба ҳайси омӯзгор ва корманди илмӣ ифои вазифа намудааст.  Соли 1996 ҳамроҳи ҳамсараш ба Берлин мекӯчад. Онҳо инак 48 сол боз бо ҳам зиндагӣ мекунанд.

Дар бораи рафтанашон ба Олмон Эрна Ҳайзер чунин мегӯяд:

«[…] Агар ҷанг (ҷанги шаҳрвандии солҳои 1992-1997 дар Тоҷикистон. – Тавз. АМИТ «Ховар») намебуд, ба ҳеҷ куҷо намекӯчидем… Менталитети ман дигар аст, немисӣ нест… Ман як духтаре ҳастам, ки тарбияи дуруст гирифтаам, ман ватанамро дӯст медорам. Ватани ман Тоҷикистон аст. Ман дар ҳамон ҷо калон шудаам… Ман ғусса мехӯрам…Мо ин ҷо (дар Олмон. – Тавз. АМИТ «Ховар») меҳмон ҳастем… Ман ҳоло ҳам ҳамаи онҳо — тоҷикони азизи худро дӯст медорам».

Эрна Ҳайзер ба саволи хабарнигор дар бораи он ки ба ҳаммеҳанони худ – тоҷикистониён чӣ гуфтан мехоҳад, кутоҳ чунин посух дод:

«Ватанатонро дӯст доред, он (Ватан. – Тавз. АМИТ «Ховар») яккаву ягона  аст. Ман ин ҷо омадам, вале Ватани ман он ҷо монд…».

АКС аз бойгонии шахсии Э. Ҳайзер

Август 28, 2022 12:00

Хабарҳои дигари ин бахш

Бо ташаббуси Агентии ҳифзи мероси таърихию фарҳангӣ дар ноҳияи Ховалинг Рӯзи Ваҳдати миллӣ ҷашн гирифта шуд
Шоири халқии Тоҷикистон Камол Насрулло: «Ҳақиқат ин аст, ки Пешвои миллат ваҳдатро бунёд гузошту таҳким доду қавӣ сохт»
Дар Осорхонаи миллӣ гӯшаи доимоамалкунандаи «Ваҳдати миллӣ» ташкил гардидааст
Тамоми комёбиҳои миллат ва саодати рӯзгори мардум аз иттиҳоди миллӣ ибтидо мегирад
«ЭМОМАЛӢ РАҲМОН – МЕЪМОРИ СУЛҲУ ВАҲДАТ». Дар Вазорати фарҳанг ҳамоиши илмӣ доир гардид
Таҳти унвони «Қисса ва ҳикояҳо» китоби Абдурофеъ Рабизода нашр гардид
«ДАР МЕҲМОНИИ ДУШАНБЕ». Фестивали байналмилалии эҷодиёти бадеии кӯдакон ва наврасони ИДМ оғоз гардид
Дар Агентии ҳифзи мероси таърихию фарҳангӣ таҳти унвони «Ваҳдати миллат — бақои миллат!» ҳамоиш баргузор шуд
Дар ёдгории Ҳалқаҷари ноҳияи Хуросон бозёфти нодири таърихӣ — «обкӯзаи хонуми Сагкин» кашф гардид
«Душанбе — нусхае аз биҳишт». Таҳти ин унвон дар васфи пойтахти Тоҷикистон китоб ба нашр расид
Донишҷӯдухтарони Донишгоҳи давлатии Кӯлоб ба меҳмонони хориҷӣ либосҳои миллиро намоиш доданд
Дар Институти биологии Помир озмоишгоҳи биотехнологӣ ба истифода дода шуд