Дар Душанбе ҷаласаи 3-юми Комиссияи муштараки байниҳукуматии Тоҷикистон ва Кувайт оид ба ҳамкории иқтисодӣ, тиҷоратӣ ва илмию техникӣ доир гардид

Сентябрь 20, 2022 16:24

ДУШАНБЕ, 20.09.2022. /АМИТ «Ховар»/. Масъалаи таъсиси корхонаҳои муштараки саноатӣ, аз ҷумла коркарди маҳсулоти аз лиҳози экологӣ тоза, коркарди нахи пахтаи Ҷумҳурии Тоҷикистон ва содироти он ба давлати Кувайт ва кишварҳои Халиҷи Форс дар ҷаласаи сеюми Комиссияи муштараки байниҳукуматии Тоҷикистон ва Кувайт оид ба ҳамкории иқтисодӣ, тиҷоратӣ ва илмию техникӣ баррасӣ гардид, иттилоъ медиҳад мухбири АМИТ «Ховар».

Дар ҷаласа Вазири рушди иқтисод ва савдои Тоҷикистон Завқӣ Завқизода, роҳбари ҳайати кувайтӣ, Ҳамраиси комиссия аз ҷониби Давлати Кувайт Асел Сулаймон ал- Саъд ал- Мунифӣ, соҳибкорону намояндагони ширкатҳои бонуфузи Кувайт ва намояндагони Палатаи савдо ва саноат ширкат варзиданд.

Зимни ифтитоҳи ҳамоиш Вазири рушди иқтисод ва савдои Тоҷикистон Завқӣ Завқизода иброз дошт, ки сафари расмии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ба давлати Кувайт соли 2016 ба рушди ҳамкории дуҷониба заминаи нав гузошт.

Дар ҷараёни ҷаласа ҷонибҳо вобаста ба густариш додани ҳамкорӣ дар бахшҳои тиҷорату иқтисод, ҷалби бештари сармояи кувайтӣ ба соҳаҳои иқтисоди миллӣ, таъсиси корхонаҳои муштараки саноатӣ дар ҳудуди Ҷумҳурии Тоҷикистон, аз ҷумла дар ҳудуди минтақаҳои озоди иқтисодӣ, содироти меваю сабзавоти тару тоза, меваҳои хушк, оби нӯшокӣ ва зиёд намудани содироти маҳсулоти дорандаи тамғаи «Ҳалол» мубодилаи афкор намуданд.

Инчунин вобаста ба таъсиси корхонаҳои муштараки саноатӣ, аз ҷумла коркарди маҳсулоти аз лиҳози экологӣ тоза, коркарди нахи пахтаи Ҷумҳурии Тоҷикистон ва содироти он ба давлати Кувайт ва кишварҳои Халиҷи Форс ибрози назар намуданд.

Ҳамзамон аз ҷониби Вазири рушди иқтисод ва савдо оид ба густариши ҳамкорӣ барои рушди инфрасохтори нақлиётию энергетикӣ аз ҳисоби маблағҳои кувайтӣ пешниҳодҳои мушаххас ироа гардиданд.

Дар фарҷоми ҳамоиш санади байниҳукуматӣ ба имзо расид, ки он тақвияти ҳамкорӣ дар самти энергетика, маориф, тандурустӣ ва дигар бахшҳои афзалиятноки мамлакатро дар бар мегирад.

Дар доираи ҷаласа ҳайати Давлати Кувайт 21 сентябр  аз  ҶДММ «Сиёма», ҶСК «Ширкати алюминийи тоҷик», ҶДММ «Артел –Авесто Электроникс» дидан намуда, бо фаъолияти корхонаҳои мазкур аз наздик шинос мешавад.

Дар ин рўз меҳмонон ҳамчунин бо мақсади бештар шинос шудан бо таъриху фарҳанги халқи тоҷик  аз Осорхонаи миллии Тоҷикистон дидан менамоянд.

Ёдовар мешавем, ки муносибатҳои дипломатӣ миёни Ҷумҳурии Тоҷикистон ва Давлати Кувайт 31 марти соли 1995 барқарор шудаанд.

Давлати Кувайт дар қатори нахустин давлатҳои ҷаҳон истиқлолияти Ҷумҳурии Тоҷикистонро ба расмият шинохт.

Сафорати Ҷумҳурии Тоҷикистон дар Кувайт 24 июни соли 2013 дар ҳузури Президенти Ҷумҳурии Тоҷикистон ва муовини Сарвазир, Вазири корҳои хориҷии Давлати Кувайт расман ифтитоҳ гардид.

Президенти Ҷумҳурии Тоҷикистон муҳтарам Эмомалӣ Раҳмон аввалин маротиба соли 1995 аз  Давлати Кувайт боздиди расмӣ ба амал оварданд. Зимни ин сафарҳо Сарвари давлат бо Амири Давлати Кувайт Шайх Аҳмад ал-Ҳамад ал-Ҷобир ас-Сабоҳ ва дигар шахсони расмӣ мулоқоти судманд анҷом доданд.

Хотиррасон мешавем, ки соли 2017 дар Кувайт ҷаласаи дуюми Комиссияи муштараки байниҳукуматии Тоҷикистон ва Кувайт оид ба ҳамкории иқтисодӣ, тиҷоратӣ, илмӣ ва техникӣ баргузор гардид.

Ҷумҳурии Тоҷикистон аз 24 то 28 марти соли 2016 дар  Кувайт намоиши барномаҳои консертӣ, аксҳо, ҳамчунин ярмарка-намоиши маҳсули дасти ҳунармандон ва хӯрокҳои миллиро баргузор намуда буд.

Зарангези ЛАТИФ,
АМИТ «Ховар»

АКС: АМИТ «Ховар»

Сентябрь 20, 2022 16:24

Хабарҳои дигари ин бахш

НИШАСТИ МАТБУОТӢ. Сатҳи таваррум дар шашмоҳаи якуми соли 2025 1,8 фоизро ташкил намуд
Дар вилояти Суғд ба маблағи 6,1 миллиард сомонӣ маҳсулоти кишоварзӣ истеҳсол карда шуд
Дар шаҳри Панҷакент Ниммарафони байналмилалии экологии кӯҳии «Seven Lakes» доир мегардад
Оид ба оғози раванди такмили Саҳми дар сатҳи миллӣ муайяншудаи Тоҷикистон (NDC 3.0.) ҳамоиш доир шуд
Вобаста ба истеҳсол ва истифодаи энергияи барқароршаванда дар иқтисодиёти «сабз» ҳамоиш доир шуд
НИШАСТИ МАТБУОТӢ. Палатаи савдо ва саноат иштироки соҳибкоронро дар 12 намоишгоҳи байналмилалӣ таъмин намуд
НИШАСТИ МАТБУОТӢ. Агентии хоҷагии ҷангал дар доираи Барномаи давлатии кабудизоркунӣ зиёда аз 102 ҳазор бех ниҳол шинонид
Муовини Сарвазири Тоҷикистон бо фаъолияти хоҷагиҳои кишоварзӣ, ҷамъоварии пахта ва ҷараёни кишти такрорӣ дар шаҳри Ҳисор шинос шуд
Ҳайати Тоҷикистон дар Машварати 10-уми вазирони кишоварзии Созмони ҳамкории Шанхай иштирок намуд
НАСБИ ПАНЕЛҲОИ ОФТОБӢ ДАР БИНОҲОИ НАВСОХТ ҲАТМӢ ГАРДИД. Истифодаи неруи Офтоб дар нақлиёти барқӣ низ муфид аст
Ҳамкории Тоҷикистону Узбекистон дар мубориза бо коррупсия тақвият меёбад
НИШАСТИ МАТБУОТӢ. Ҳаҷми истеҳсоли неруи барқ дар Тоҷикистон беш аз 8,9 миллиард кВт-соатро ташкил дод