«МО БОЯД ЭҲТИЁТ ШАВЕМ». Раиси Кумитаи давлатии амнияти миллии Тоҷикистон Саймумин Ятимов гуфт, ки ташкили муносибатҳо танҳо дар заминаи ҳуқуқӣ сабаби сулҳ, ваҳдат ва ҳамсоягии нек мегардад

Сентябрь 26, 2022 09:20

ДУШАНБЕ, 26.09.2022 /АМИТ «Ховар»/. Тавре АМИТ «Ховар» қаблан хабар дода буд, 25 сентябр кумитаҳои давлатии амнияти миллии Тоҷикистон ва Қирғизистон Протокол оид ба хатми низои сарҳадиро ба имзо расониданд. Протоколи хатми низоъ дар марзи ду кишварро Раиси Кумитаи давлатии амнияти миллии Тоҷикистон Саймуъмин Ятимов ва раиси Кумитаи давлатии амнияти миллии Қирғизистон Қамчибек Тошиев имзо карданд.

Раиси КДАМ Тоҷикистон Саймумин Ятимов дар шарҳи натиҷаҳои музокирот бо ҷониби Қирғизистон барои намояндагони расонаҳои хабарӣ изҳор дошт, ки 25 сентябр протоколе ба имзо расид, ки онро метавон протоколи демилитаризатсия (беяроқгардонӣ) номид. Ба гуфтаи ӯ, тадбирҳои қатъӣ андешида шуданд, ки онҳо дар протокол инъикос ёфтаанд ва бояд риоя шаванд.

«Мо дар ин ҷо ҳамзамон музокирот анҷом додем ва ба мувофиқа расидем, ки ба ҳеҷ ваҷҳ набояд дар сарҳади давлатии Тоҷикистон ва Қирғизистон низоъ рух диҳад», — шарҳ дод ӯ.

Дар ин робита Саймумин Ятимов аз сиёсатмадорони алоҳида, намояндагони ВАО ва блогнависон даъват намуд, ки дар истифодаи вожаву таъриф ва истилоҳот эҳтиёткор бошанд. “Мо бояд дар истифодаи калимаҳо, таърифҳо ва истилоҳот хеле эҳтиёткор бошем. Суханони ман, пеш аз ҳама, ба ВАО, блогнависони инфиродӣ, сиёсатмадорони алоҳида дахл доранд. Ҳар як сухан метавонад ба кор зарар расонад”, — гуфт Раиси КДАМ Тоҷикистон.

Вай дар баробари ин суханони Арастуро иқтибос овард: «Одами бесавод аз сиёсат берун аст, ба ӯ бояд аввал алифбо омӯхт. Бидуни ин сиёсат вуҷуд дошта наметавонад, бе ин танҳо овозаҳо, ғайбатҳо, афсонаҳо, таассубу хурофот вуҷуд доранд, аммо на сиёсат».

Саймумин Ятимов гуфт, ки агар мо асноду ҳуҷҷатҳои имзошударо қатъиян риоя кунем, дар сарзамини тоҷикону қирғизон сулҳ ҳукмрон мешавад. «Аз ҳама хоҳиш менамоям, ки бо Протоколи мазкур шинос шаванд, ин гуна ҳуҷҷатҳо махфӣ нестанд, танҳо ҳангоми шарҳу тавзеҳ санадҳои меъёрии ҳуқуқиро бояд қатъиян риоя намуд», — таъкид дошт Раиси КДАМ Тоҷикистон.

Вай ҳамчунин зикр намуд, ки «ҳангоми таҳияи санади дахлдор мо бо рӯҳияи ҳуқуқи римӣ кор мекунем, маҳз он муносибатҳои ҷамъиятӣ ва муносибатҳои дуҷонибаи байналмилалиро танзим мекунад. Дар он ҷо як шарт ва назарияи хеле аҷоиб мавҷуд аст — ирода, агар он давлатӣ бошад, бояд дар шакли қонун, санад, созишнома, шартнома ифода ёбад ва бо дастгоҳе таъмин карда шавад, ки қодир аст онро амалӣ намояд, вагарна ҳамаи ин — сухани беҳуда ва беасос хоҳад буд».

«Мо итминон дорем, ки татбиқи санадҳо ва ташкили муносибатҳоямон танҳо дар заминаи ҳуқуқӣ сабаби сулҳ, ваҳдат ва ҳамсоягии нек мегардад»,-афзуд дар охир Раиси КДАМ Тоҷикистон Саймумин Ятимов.

АКС: скриншоти видео

Сентябрь 26, 2022 09:20

Хабарҳои дигари ин бахш

НИШАСТИ МАТБУОТӢ. Дар Тоҷикистон 222 ҳодиса ва ҳолатҳои фавқулода ба қайд гирифта шуд
Хадамоти давлатии оташнишонӣ кафили бехатарии мардуми Тоҷикистон аст. Ба ифтихори иди касбии кормандони соҳа
Аз 26 то 29 июл дар баъзе кӯчаҳо ва хиёбони Рӯдакии пойтахт ҳаракати воситаҳои нақлиёт маҳдуд карда мешавад
НИШАСТИ МАТБУОТӢ. Дар бозорҳои истеъмолии Тоҷикистон беш аз 107 ҳазор килограмм маҳсулоти бесифат ва хавфнок нобуд карда шуд
Бо иштироки ҳайати роҳбарикунандаи Вазорати мудофиаи Тоҷикистон ҷамъомадӣ таълимӣ-методӣ доир гардид
Маркази матбуоти Қӯшунҳои сарҳадии Кумитаи давлатии амнияти миллии Ҷумҳурии Тоҷикистон хабар медиҳад
Дар вилояти Суғд кӯшиши интиқоли 70 кг маводи нашъадор пешгирӣ гардид
Дар Озмуни байналмилалии нозирони навраси ҳаракат 7 даста аз давлатҳои ИДМ иштирок менамояд
Вобаста ба малакаи амалии кӯдакон оид ба бехатарии ҳаракат дар роҳ конфронси байналмилалӣ доир шуд
Нақшаи Барномаи муштараки «Тағйири низомҳои озуқаворӣ барои беҳтар намудани сифати ғизо» қабул шуд
Ҳайати Тоҷикистон дар ҷаласаи Маҷмаи умумии фавқулодаи Созмони байналмилалии мудофиаи гражданӣ иштирок намуд
Ташаккули дониши кӯдакон оид ба бехатарии ҳаракат дар роҳ дар конфронси байналмилалӣ баррасӣ мегардад