Чин ба рушди аълосифат тамаркуз хоҳад кард-Си Ҷинпин

ДУШАНБЕ, 17.10.2022 /АМИТ «Ховар»/. Чин ба рушди аълосифат тамаркуз хоҳад кард. Ин изҳорот рӯзи якшанбе дар ифтитоҳи Анҷумани 20-уми Ҳизби Коммунистии Чин аз сӯи Котиби генералии Кумитаи марказии Ҳизби Коммунистии Чин Си Ҷинпин садо дод. Дар ин бора АМИТ «Ховар» бо истинод ба хадамоти иттилоотии замимаи мобилии «Россия -Чин: асосӣ» хабар медиҳад.

 «Бе заминаи мустаҳками моддию технологӣ давлати муосири сотсиалистии аз ҳар ҷиҳат тавоно барпо кардан мумкин нест»,-иброз дошт Си Ҷинпин дар маърӯзаи ҳисоботӣ.

Ба ақидаи ӯ, рушди аълосифат афзалияти асосии Чин боқӣ мемонад, аммо ислоҳот дар самти иқтисодиёти бозаргонии сотсиалистӣ ва ошкорбаёнии дараҷаи олӣ гузаронда мешаванд.

Си Ҷинпин иттилоъ дод, ки Чин дар чанд соли охир дар якчанд фанновариҳои калидӣ, аз ҷумла лоиҳаҳои кайҳонӣ ва ҳастаӣ, компютерҳои пурқудрат ва технологияҳои биологӣ, ки дар дорусозӣ истифода мешаванд, пешрафт кардааст.

Вай ҳамчунин таъкид кард, ки маориф, технология ва истеъдод заминаи рушди кишвар маҳсуб мешаванд. Чин ташаббуси «Як камарбанд, як роҳ»-ро қабул кард, ки ба барномаи ҳамкории байналмилалӣ табдил ёфта, шарики асосии тиҷоратии беш аз 140 кишвар ва минтақа гардид, дар ҷаҳон доир ба ҳаҷми умумии савдои мол ҷои аввалро ишғол мекунад, инчунин  дар самти  ҷалби сармояи хориҷӣ ва берунӣ пешсаф аст.

Қаблан иттилоъ расида буд, ки Анҷумани 20-уми Ҳизби Коммунистии Чин дар Пекин 16 октябр ифтитоҳ ёфт.

      АКС: Xinhua