Доир ба афзалияти логистика дар рушди робитаҳои нақлиётии Тоҷикистон бо кишварҳои минтақа конфронси байналмилалӣ доир мешавад

ДУШАНБЕ, 07.10.2022 /АМИТ «Ховар»/. «Логистика ва афзалияти он дар рушди робитаҳои нақлиётии Тоҷикистон бо давлатҳои минтақа»-таҳти чунин унвон  18-19 октябр Душанбе  мизбони конфронси байналмилалии илмӣ-амалӣ мегардад, иттилоъ медиҳад АМИТ «Ховар» бо истинод ба Вазорати нақлиёти Тоҷикистон.

Вазорати нақлиёти Ҷумҳурии Тоҷикистон аз созмондиҳандагони конфронси байналмилалӣ буда, дар он намояндагони сохторҳои соҳаи нақлиёту роҳ аз кишварҳои хориҷи дуру наздик, инчунин мутахассисону  коршиносони  соҳаи роҳу нақлиёти ватанӣ  иштирок намоянд.

Дар конфронси байналмилалӣ масъалаҳои марбут ба танзими фаъолияти давлатии таъмини логистика —  дастовардҳои  илмӣ ва амалии фаъолияти логистика, таълим ва тарбияи мутахассисон оид ба таъминоти логистикӣ, рақамикунонии инфрасохтори логистика, мушкилоти  ташкил ва рушди техникаи логистика, таҷрибаи пешрафти ширкатҳо ва марказҳои  нақлиётию логистикӣ, саҳми бонувон дар логистика, воқеият, назар ба оянда  ва имконияти захираи кадрии соҳа баррасӣ мегарданд.

Интизор меравад, ки дар доираи конфронс истифодаи Ҳуҷҷати глобалии транзитӣ (GTfarD) аз истгоҳи Кӯлоби КВД «Роҳи оҳани Тоҷикистон» роҳандозӣ шавад.

                АКС аз манбаъҳои боз