Илҳом Алиев ба он бовар аст, ки бо сипарӣ намудани роҳи мақсаднок Тоҷикистон минбаъд низ ба самти пешрафт ҳаракат мекунад

ДУШАНБЕ, 05.10.2022 /АМИТ «Ховар»/. Президенти Озарбойҷон дар барқияи шодбошии худ ба муносибати 70-солагии зодрӯзи Эмомалӣ Раҳмон  зикр намуд, ки ҳамаи дастовардҳои Тоҷикистони муосир дар рушди иҷтимоиву иқтисодӣ ва ҷамъиятиву сиёсӣ, таҳкими обрӯву эътибори он дар арсаи байналмилалӣ бо номи он кас робитаи ногусастанӣ доранд.

Дар барқияи табрикотӣ гуфта мешавад, ки Эмомалӣ Раҳмон ба сифати пешвои ҳақиқии кишвари худ эҳтироми самимии миллионҳо ҳамватанони худро касб карда, намунаи дурахшони хизмат ба Ватан ва соҳиби обрӯву эътибори баланд дар арсаи байналмилалӣ гардидааст.

«Бовар дорам, ки дар пайравӣ ба сиёсати мақсадноки Шумо Тоҷикистон минбаъд низ бо роҳи пешрафту таҷдиди ҳамаҷониба дар тамоми  соҳаҳои ҳаёт ба сӯйи пеш ҳаракат карда, дар кори рушди давлат ва баланд бардоштани некӯаҳволии мардум қуллаҳои навро фатҳ хоҳад кард»,-зикр намуд Илҳом Алиев.

Ба гуфтаи Президенти Озарбойҷон, ин ду кишварро аз даврони қадим риштаҳои амиқи дӯстӣ ва эҳтироми якдигарӣ ба ҳам мепайванданд. «Итминон дорам, ки муносибатҳои дӯстӣ ва ҳамкории ҳамаҷонибаи мо дар такя ба ин анъанаҳои нек минбаъд низ ба хотири шукуфоии мардумони кишварҳои мо тавсеа ва таҳким хоҳанд ёфт. Мехоҳам бахусус таъкид намоям, ки дар Озарбойҷон саҳми бузурги шахсии Шуморо дар таъмиқи робитаҳои байнидавлатии мо баланд арзёбӣ менамоянд ва ба тақвияти минбаъдаи ҳамкории гуногунҷанба миёни кишварҳоямон аҳамияти хосса медиҳанд»,-изҳор дошт Президенти Озарбойҷон ва ба Сарвари кишвар  муҳтарам Эмомалӣ Раҳмон умри бардавом, саодатмандӣ ва дар фаъолияти давлатии сермаcъул бар нафъи мардуми бародари Тоҷикистон комёбиҳо таманно намуд».

 АКС: Хадамоти матбуоти Президенти ҶТ/АМИТ «Ховар»