ОМОДАГӢ БА ЗИМИСТОН. Дар шаҳру ноҳияҳои тобеи Тоҷикистон зеристгоҳҳои барқии 35/10 кВ таъмири ҷорӣ ва 31 трансформатори нав насб шуд

Октябрь 19, 2022 10:11

ТУРСУНЗОДА,  19.10.2022 /АМИТ «Ховар»/.  Филиалҳои ҶСК Шабакаи тақсимоти барқ дар ноҳияҳои тобеи ҷумҳурӣ ба давраи тирамоҳу зимистони солҳои 2022-2023  дар асоси нақшаи чорабиниҳо, ки иборат аз 20 банд мебошад,  омодагии ҳамаҷониба дида истодаанд. То имрӯз дар 15 шаҳру ноҳияҳои тобеи ҷумҳурӣ зеристгоҳҳои барқии 35/10 кВ таъмири ҷорӣ гардида, ҷиҳати кам кардани талафоти қувваи барқ 31  адад трансформатори нав насб карда шудааст. Ҳамзамон қисме аз трансформаторҳои иқтидорашон паст бо трансформаторҳои иқтидорашон баланд иваз карда шудаанд. Дар ин давра ба  трансформаторҳои қудратию иқтидорашон паст дар ноҳияҳои тобеи ҷумҳурӣ мувофиқи меъёри муайяншуда равған илова карда шуд, ки миқдори он  зиёда аз 14 ҳазор литр мебошад.

Дар ин бора сардори шуъбаи истеҳсоли техникии филиали ҶСК Шабакаи тақсимоти барқ дар ноҳияҳои тобеи ҷумҳурӣ Мирсангин  ИБРОҲИМЗОДА ба хабарнигори минтақавии АМИТ «Ховар» Субҳониддини МАҲМУД иттилоъ дод.     

Кормандони филиали ҶСК Шабакаи тақсимоти барқ дар ноҳияҳои тобеи ҷумҳурӣ барои таъмини сокинон бо барқи хушсифат дар фасли зимистон  дар ин рӯзҳо ба таъмири трансформаторҳо ва санҷиши хатҳои барқу тоза намудани онҳо аз навдаҳои дарахтон сафарбар гардида, кӯшиш доранд дар фасли зимистон ягон мушкилӣ сабаби бебарқӣ нагардад. Дар айни замон шароити кормандони шабакаҳои барқи ноҳияҳои тобеи ҷумҳурӣ  хуб буда, онҳо бо либосҳои махсуси корӣ, таҷҳизоти алоқавӣ ва зимни навбатдории шабонарӯзӣ бо маҳсулоти хӯрокворӣ  ва дигар шароити зарурӣ таъмин мебошанд.

Мутахассисони филиали ҶСК Шабакаи тақсимоти барқ дар ноҳияҳои тобеи ҷумҳурӣ гуфтанд, ки дар ин муддат дар навоҳии тобеи марказ 600 адад пояҳои пӯсида бо пояҳои бетонӣ иваз карда шуданд. Ду адад транформатори пурбори 630кВА-и шаҳри Роғун бо трансформатори 1000кВА  иваз гардид.  Зиёда аз 17,7 километр ноқилҳои пӯлодӣ бо ноқилҳои алюминӣ иваз карда шуда, 2833 адад муҳофизакҳои намуди ПН  насб карда шуданд.

Ба хотири бе душворӣ паси сар намудани давраи тирамоҳу зимистони солҳои 2022-2023  барои мутахассисони шабакаҳои барқи ноҳияҳои тобеи ҷумҳурӣ шароити мусоиди корӣ фароҳам оварда шуда, онҳо бо зиёда аз ҳазор ҷуфт либоси кории зимистона ва пойафзолҳои корӣ таъмин карда шуданд.

Дар ин рӯзҳо дар шабакаҳои барқи ноҳияҳои тобеи ҷумҳурӣ корҳои таъмирӣ ва омодагӣ ба тирамоҳу зимистон муташаккилона идома доранд. Дар ин давра навбатдории шабонарӯзӣ ва бригадаҳои иловагӣ ташкил ва назорат ҷиддӣ карда шудааст, то садамаҳои рухдода сари вақт бартараф гарданд.

Барои бартараф кардани камбудиҳо ва кам кардани талафоту ҷамъоварии пурраи маблағи истифодаи неруи барқ дар шаҳри Ҳисор ба таври ройгон аз тарафи кормандони филиали ҶСК Шабакаи тақсимоти барқ  дар истгоҳҳои трансформаторӣ ҳисобкунакҳои барқӣ насб карда истодаанд. Ҳисобкунакҳои барқиро  аз хонаҳои муштариён ба роҳи маҳаллаҳо бароварда, насб доранд. Ин гуна амал дар шаҳри Роғун низ идома дорад.

АКС: Шабакаҳои барқи шаҳри Турсунзода

Октябрь 19, 2022 10:11

Хабарҳои дигари ин бахш

Маркази тадқиқоти стратегӣ ва ЮНИСЕФ вобаста ба пажуҳиши осебпазирӣ ва хатарҳои мансуб ба наврасон ҳамкорӣ менамоянд
Дар Хуҷанд даври шаҳрии Озмуни ҷумҳуриявии «Кадбонуи беҳтарин» баргузор гардид
МАДАНИЯТИ ШАҲРНИШИНӢ. Дар Хатлон нисбат ба онҳое, ки сабабгори ифлосшавии муҳити зист мегарданд, тадбирҳои қонунӣ меандешанд
Дар Душанбе таҷрибаи мусбати ҳамкории коршиносии минтақавӣ ва густариши он баррасӣ шуд
Дар Кумитаи ҳолатҳои фавқулода ва мудофиаи граждании Тоҷикистон бо намояндагони якчанд ниҳоди хориҷӣ мулоқот доир шуд
Дар Хатлон дар самти ҳифзи сирри давлатӣ ва ҳифзи техникии иттилоот конференсияи минтақавӣ баргузор гардид
Дар шаҳри Гулистон озмуни «Кадбонуи беҳтарин» баргузор шуд
ГРАНТИ ПРЕЗИДЕНТИ ТОҶИКИСТОН ДАР СОЛИ 2024. Вазорати меҳнат, муҳоҷират ва шуғли аҳолӣ ҳунармандонро барои дарёфти ин грант ба озмун даъват менамояд
Вазири адлияи Тоҷикистон ва Ёвари Дабири кулли Созмони Милали Муттаҳид густариши ҳамкории дуҷонибаро баррасӣ намуданд
Дар ҳудуди Хадамоти зидди жола ду бино ба истифода дода шуд
Вазорати меҳнат, муҳоҷират ва шуғли аҳолӣ ҷиҳати дарёфти гранти Президенти Ҷумҳурии Тоҷикистон барои дастгирии ҳунармандон озмун эълон менамояд
Ҷавонони Тоҷикистон барои иштирок дар Фестивали ҷаҳонии ҷавонон ба шаҳри Сочи мераванд