«ҲАСТИИ МО ДАР НИШОНУ ПАРЧАМ АСТ…». Ливои Тоҷикистон дар пешгоҳи бинои Созмони Милали Муттаҳид парафшон аст

Ноябрь 23, 2022 13:57

ДУШАНБЕ, 23.11.2022. /АМИТ «Ховар»/. Мояи ифтихору сарфарозист, ки Парчами давлатии тоҷикон дар пешгоҳи бинои Созмони Милали Муттаҳид ва созмонҳои ҷаҳоние, ки Тоҷикистон узви онҳост, инчунин сафоратҳо ва намояндагиҳои кишварамон дар давлатҳои дигар пайваста партавфишонӣ мекунад. Чунин иброз намуд декани факултаи китобдорӣ ва иттилоотшиносии Донишкадаи давлатии фарҳанг ва санъати Тоҷикистон ба номи Мирзо Турсунзода Зафари Шариф бахшида ба Рӯзи Парчами давлатии Тоҷикистон.

Зафари Шариф бо ифтихор мегӯяд, ки «шарафманд аз онем, ки Пешвои миллат ба ҳар кишваре сафар карда, мулоқот анҷом диҳанд ё варзишгарони тоҷик дар мусобиқаҳо пирӯзӣ ба даст оранд, баробари садо додани Суруди миллӣ Парчами давлатии Тоҷикистон низ афрохта мешавад.

Дар чорабиниҳои гуногуни сатҳи олӣ ва фарҳангии берун аз кишвар низ ҳунармандон ба хотири гиромидошти арзишҳои миллӣ парчамро парафшон мекунанд. Ҳунармандони машҳури кишварамон меҳру муҳаббати худро нисбат ба Парчами давлатӣ дар шеъру суруд ва таронаҳои худ таҷассум мекунанд, ки нишони арҷгузорӣ ба рамзи давлатӣ мебошад».

Ҳамсуҳбати мо чунин пешниҳод дорад, ки барои дар замири насли наврас бедор намудани ҳисси хештаншиносиву ватанпарварӣ ва арҷ гузоштан ба муқаддасоти миллӣ хуб мешуд озмуни ҳарсолаи «Парчам-нишони ҳастии миллат» баргузор карда шавад. Онро метавон ҳар сол дар китобхонаҳои марказии вилоятҳо ва шаҳру ноҳияҳо доир намуд.

«Инчунин ба роҳ мондани гӯшаи доимамалкунандаи «Парчами мо – ифтихори мо» дар китобхонаҳои марказии вилоятҳо ва шаҳру ноҳияҳо, ташкили чорабиниҳои китобхонавию иттилоотӣ таҳти унвони «Парчамат бодо парафшон, Тоҷикистон!» дар китобхонаҳои марказии вилоятҳо ва шаҳру ноҳияҳо ба баланд бардоштани донишҳои иттилоотии мардум нисбат ба рамзҳои давлатӣ мусоидат мекунад», — мегӯяд ӯ.

Дар баробари ин, олимону муҳаққиқони тоҷикро зарур аст, ки саҳифаҳои норавшани давлатдорию парчамдории моро бо ҳусни зеҳн ва мӯшикофона мавриди таққиқ қарор диҳанд, сарнавишти «Дирафши Ковиён» ва кӯшишу заҳматҳои шабонарӯзии Пешвои миллатро дар самти андешидани тадбирҳои зарурӣ оид ба қабули Парчами давлатӣ ва дигар муқаддасоти миллӣ бо далелҳои муътамад ба мардум нишон диҳанд.


Шоире барҳақ фармуда:

Ҳастии мо дар Нишону Парчам аст,
Ҳар яке дар маънии худ олам аст.

«Рамзҳои муқаддаси миллии мо, аз ҷумла Парчами давлатӣ дар лаҳзаҳои ниҳоят ҳассоси таърихи миллати мо қабул карда шуданд. Барои расидан ба ҳадаф дар он айём дар баробари нангу номус доштан боз ҷасуриву далерӣ ва фидокориву қаҳрамонӣ зарур буд. Бинобар ин, мо бояд шукӯҳу шаҳомати онҳоро барои хештаншиносӣ, истиқлолияту сарҷамъӣ, ваҳдату ягонагӣ дар адабиёти бадеии ватанӣ ва хориҷӣ тараннум ва таҷассум намоем»,- изҳор намуд декани факултаи китобдорӣ ва иттилоотшиносии Донишкадаи давлатии фарҳанг ва санъати Тоҷикистон ба номи Мирзо Турсунзода Зафари Шариф.

Зарангези ЛАТИФ,
АМИТ «Ховар»

АКС: Хадамоти матбуоти Президенти ҶТ/АМИТ «Ховар»

Ноябрь 23, 2022 13:57

Хабарҳои дигари ин бахш

НАРХИ ТУХМИ МУРҒ БА ЧӢ ВОБАСТА АСТ? Ба ин савол муовини якуми Вазири кишоварзии Тоҷикистон Музаффар Мирзозода посух дод
ЭҲТИЁТ ШАВЕД! Коронавирус дар Осиёи Марказӣ боз хуруҷ кард
БЛОГ ЧИСТ ВА БЛОГЕР КИСТ? Назари коршиносон оид ба танзими муносибатҳо дар фаъолияти корбарони интернетӣ
ДИҚҚАТ, ЭҲТИЁТ НАМОЕД! Миқёси маҳдудият дар Чин бар асари афзоиши COVID рекордӣ шудааст
ПАРЧАМИ ДАВЛАТӢ БАРОИ ШУМО ЧИСТ? Бо ин суол хабарнигорони АМИТ «Ховар» ба роҳбарони вазорату идораҳо ва намояндагони касбу кори гуногун муроҷеъ шуданд
ДИРАФШИ КОВИЁН. Аз қадим то имрӯз тоҷикон парчамро ҳамчун рамзи Истиқлолу Ваҳдати халқ ва Пойдории давлатдории миллӣ истифода мебаранд
ҲАДИСИ МУСАВВАР. Пешвои миллат Эмомалӣ Раҳмон ба сокинони кишвар муҳаббати ҳақиқӣ ва эҳтироми амиқ ба Парчами давлатии Тоҷикистони соҳибистиқлолро талқин намуданд
Пешвои миллат Эмомалӣ Раҳмон: «Мардуми Тоҷикистон, хусусан наврасону ҷавонон аз рӯзи қабули Парчами миллӣ ҳамеша ба он эҳтиром мегузоранд»
ПАРЧАМ- РАМЗИ ИТТИҲОД ВА ҲАМБАСТАГӢ. Дар Осорхонаи миллӣ конфронси илмӣ-назариявии ҷумҳуриявӣ баргузор гардид
ТАЪРИХИ ПАРЧАМЕ, КИ ДАР ИҶЛОСИЯИ ШЎРОИ ОЛӢ ҲАМАРО САРҶАМЪ НАМУД. Онро Комбинати абрешими шаҳри Хуҷанд омода карда буд
«ПАРЧАМИ МО ХУД САРИ БОЛОИ МИЛЛАТ ГАШТААСТ…». Дар нашриёти «Ирфон» ба бузургдошти ливои Ватан ҳамоиши тантанавӣ доир шуд
Пешвои миллат Парчами Тоҷикистонро нишонаи ҳастӣ ва пойдории давлатдории миллии тоҷикон унвон карданд