Барои навсозии роҳи мошингарди Тугарак-Саричашма-Шӯрообод ва Чашмасор-Лангар 800 ҳазор доллар ҷудо мегардад

Ноябрь 4, 2022 10:03

ДУШАНБЕ, 04.11.2022. /АМИТ «Ховар»/. Барои татбиқи лоиҳаҳои таҷдиди роҳи мошингарди Тугарак — Саричашма — Шӯрообод ва Чашмасор-Лангар ба маблағи 800 ҳазор доллари ИМА грант ҷудо мегардад. Роҳи мошингарди Тугарак — Саричашма — Шӯрообод (дарозиаш 48 км) аз ҳудуди ноҳияҳои Восеъ ва Шамсиддини Шоҳини вилояти Хатлон мегузарад. Роҳи мошингарди Чашмасор — Лангар бо дарозии 8,5 км дар ноҳияи Муъминободи вилояти Хатлон ҷойгир мебошад. Ин масъала дар ҷаласаи навбатии Иҷлосияи чоруми Маҷлиси намояндагони Маҷлиси Олии Ҷумҳурии Тоҷикистон, даъвати шашум, ки 2 ноябри соли равон таҳти раёсати Раиси Маҷлиси намояндагон Маҳмадтоир Зокирзода баргузор гардид, баррасӣ шуд.

Дар назди вакилон Вазири нақлиёти Ҷумҳурии Тоҷикистон Азим Иброҳим аз рӯи масъала «Дар хусуси Созишномаи грантӣ байни Ҷумҳурии Тоҷикистон ва Фонди кувайтии рушди иқтисодии Араб барои маблағгузории омодасозии асосноккунии техникиву иқтисодии лоиҳаи таҷдиди роҳи мошингарди Тугарак — Саричашма — Шӯрообод ва Чашмасор — Лангар» сухан кард.

«Дар натиҷаи ба роҳ мондани ҳамкории боэътимод бо Фонди кувайтии рушди иқтисодии Араб фонди мазкур ҳавасмандиро вобаста ба маблағгузории асосноккунии техникиву иқтисодии лоиҳаҳои таҷдиди роҳи мошингарди Тугарак — Саричашма — Шӯрообод ва Чашмасор-Лангар баён намуд. Шӯрои директорони фонди мазкур ҷиҳати ҷудо намудани грант ба маблағи 250 ҳазор динори кувайтӣ (муодили 800 ҳазор доллари ИМА) розигӣ дод. Маблағи барои омодасозии асосноккунии техникиву иқтисодии ин ду қитъаи роҳ пешбинишуда ба ширкати машваратчӣ пардохт мешавад ва он ҳамчун кумаки бебозгашти техникӣ барои Ҷумҳурии Тоҷикистон пешбинӣ гардида, сарбории иловагӣ ба буҷети кишвар эҷод намекунад»,- гуфт Вазири нақлиёт.

Иттилоъ дода шуд, ки оғози роҳи мошингарди Тугарак — Саричашма — Шӯрообод дар километри 168- и шоҳроҳи Душанбе — Кӯлоб — Хоруғ — Кулма ҷойгир мебошад. Татбиқи лоиҳаи мазкур ба сифатан беҳтар гардидани роҳҳои мошингарди байнидеҳавӣ, осон гардидани рафтуомади сокинон, афзоиши ҳамлу нақли бор, рушди иқтисодиву иҷтимоии сокинони деҳаҳои пайвастшаванда ба роҳи байналмилалии Душанбе — Кӯлоб — Хоруғ — Кулма, беҳтар гардидани инфрасохтори сайёҳӣ, таъсиси ошхонаҳои канори роҳ, меҳмонхонаҳо, истгоҳҳои таъмири техникӣ, мағозаҳои фурӯши маҳсулоти кишоварзӣ ва ба ин тартиб таъсис додани ҷойҳои нави корӣ мусоидат менамояд.

Оғози сохтмони роҳи мошингарди Чашмасор — Лангар аз километри 23-юми роҳи Кӯлоб — Муъминобод шурўъ мегардад. Сохтмони ин қитъаи роҳ низ аҳамияти иҷтимоиву иқтисодӣ дошта, ба афзоиш ёфтани ҳаракати воситаҳои нақлиёт, васеъ гардидани имконияти интиқоли молу маҳсулоти кишоварзӣ ба бозорҳои минтақа ва беҳтар гардидани сатҳи некуаҳволии сокинон мусоидат мекунад.

Ёдовар мешавем, ки Лоиҳаи Қарори Маҷлиси намояндагони Маҷлиси Олии Ҷумҳурии Тоҷикистон «Дар хусуси Созишномаи грантӣ байни Ҷумҳурии Тоҷикистон ва Фонди кувайтии рушди иқтисодии Араб барои маблағгузории омодасозии асосноккунии техникиву иқтисодии лоиҳаи таҷдиди роҳи автомобилгарди Тугарак-Саричашма — Шӯрообод ва Чашмасор — Лангар» ба овоз монда шуда, тасдиқ гардид.

Рухсораи НУР,
АМИТ «Ховар»

АКС: Маҷлиси намояндагон/АМИТ «Ховар»

Ноябрь 4, 2022 10:03

Хабарҳои дигари ин бахш

Саридораи геологияи Тоҷикистон дар мавзуи «Усулҳои муосири кор бо маълумоти геологӣ» машварати омӯзишӣ баргузор намуд
Роҳбарони бонкҳои амонатгузории аъзои WSBI дар Бонн бо таҷрибаи бонкҳои пешрафтаи Олмон шинос гардиданд
Дар Душанбе масъалаи татбиқи минбаъдаи ихтирооти сабтшуда байни Тоҷикистон ва Ташкилоти патентии авруосиёӣ баррасӣ гардид
ИМРӮЗ — РӮЗИ УМУМИҶАҲОНИИ БЕХАТАРИИ МАҲСУЛОТИ ОЗУҚАВОРӢ. Танҳо як ҳолати назарногири риоя накардани ин талабот боиси сар задани бемориҳо ва марги инсонҳо мешавад
СУПОРИШИ ПРЕЗИДЕНТ. Дар ноҳияи Ҷайҳун 500 гектар замин ба гардиши кишоварзӣ дароварда шуд
Дар Душанбе ҷаласаи 16-уми Кумитаи ҳамоҳангсоз оид ба содагардонии расмиёти савдо доир гардид
«Еximbank»-и Корея дар Минтақаи озоди иқтисодии «Кӯлоб» Маркази логистикӣ бунёд менамояд
Дар шаҳри Ганҷаи Озарбойҷон ҷаласаи 76-уми Шӯрои роҳбарони хадамоти гумруки ИДМ баргузор гардид
Дар корхонаи «Пойафзоли Кангурт» давоми 4 моҳи соли равон 5490 ҷуфт пойафзоли мардона истеҳсол гардидааст
Дар Душанбе бо иштироки Ноиби Президенти Бонки ҷаҳонӣ оид ба Аврупо ва Осиёи Марказӣ Антонелла Бассани машварат доир шуд
Ноиби Президенти Бонки ҷаҳонӣ оид ба Аврупо ва Осиёи Марказӣ Антонелла Бассани аз НБО «Роғун» боздид намуд
Дар ноҳияи Бобоҷон Ғафуров таъмини заминҳои кишоварзӣ бо оби полезӣ таҳти таваҷҷуҳи доимӣ қарор дорад