Дар Душанбе мусобиқаҳои варзишӣ оид ба футболи хурд ҷамъбаст гардиданд

ДУШАНБЕ, 25.11.2022. /АМИТ «Ховар»/. Дар шаҳри Душанбе мусобиқаҳои варзишӣ оид ба футболи хурд (мардон) миёни дастаҳои вазорату идора ва ташкилоту муассисаҳои ҷумҳуриявию шаҳрӣ ҷамъбаст гардиданд. Ҷойи якумро дастаи Вазорати корҳои дохилӣ, мақоми дуюмро Вазорати адлия ва зинаи сеюмро Вазорати мудофиа соҳиб гаштанд, хабар дод ба АМИТ «Ховар» муовини сардори Раёсати тарбияи ҷисмонӣ ва инкишофи варзиши дастгоҳи марказии Кумитаи кор бо ҷавонон ва варзиши ҷумҳурӣ Муҳаммадтолиб Шокирзода.

Мусобиқаи мазкур бо ташаббуси Кумитаи кор бо ҷавонон ва варзиш дар ҳамкорӣ бо вазорату идораҳои мамлакат доир гардида, дар он 44 даста аз вазорату идораҳо ва ташкилоту муассисаҳои ҷумҳуриявию шаҳрӣ миёни ҳам рақобат намуданд.

Ба ғолибону ҷоизадорони мусобиқаи варзишӣ оид ба футболи хурд аз ҷониби муовини Раиси Кумитаи кор бо ҷавонон ва варзиши назди Ҳукумати Ҷумҳурии Тоҷикистон Сураҷ Чоршанбезода Ҷом, Диплом, медал ва мукофоти пулӣ дар ҳаҷми 12 000 сомонӣ тақдим гардиданд.

АКС: Кумитаи кор бо ҷавонон ва варзиши назди Ҳукумати Ҷумҳурии Тоҷикистон