Дар Кобул таркиш ба амал омад

ДУШАНБЕ, 03.11.2022. /АМИТ «Ховар»/. Таркиш субҳи дирӯз, 2 ноябр дар яке аз ноҳияҳои Кобул рух дод. Дар ин бора рӯзномаи «Hasht-e Subh» хабар додааст.

Ба маълумоти ин нашрия, дар маҳаллаи панҷуми шаҳр воситаи нақлиёте тарконида шуд, ки дар он кормандони Вазорати бозсозӣ ва рушди кишоварзии ҳаракати тундрави «Толибон»*, ки дар Афғонистон қудратро ба даст гирифтаанд, ҳаракат мекарданд. Ҷузъиёти ҳодиса муайян карда мешавад.

Толибон то ҳол ин хабарро шарҳ надодаанд.

Ба гузориши шабакаи телевизионии Қатар «Ал-Ҷазира», дар натиҷаи таркиш ҳалокшудагон ва захмиён ҳастанд, ки теъдоди онҳо мушаххас нест.

Моҳҳои охир дар вилоятҳои Афғонистон, аз ҷумла минтақаи пойтахт, силсилатаркишҳо, ҳамлаҳои мусаллаҳона ва тирпарронӣ мушоҳида мешаванд, ки бар асари онҳо ҳам ҷонибдорони толибон ва ҳам мардуми осоишта кушта мешаванд. «Давлати исломӣ» дар Хуросон» — як шохаи созмони террористии «Давлати исломӣ» масъулияти бисёре аз ҳамлаҳоро бар уҳда гирифтааст.

___________________

* Ташкилоти террористие, ки дар Тоҷикистон мамнӯъ аст

АКС аз манбаъҳои боз